Read luo Isaya 47 Bible Online

Isaya 47 - luo bible

Isaya 47

¹ In Babulon, dala ma pok olo, bed piny e lowo. Ee, in dala maduong’ mar jo-Kaldai, we komlochni, ibed piny e buru. Ji ok nochak odendi ka gima in nyako ma dende yom, kendo mosedak e ngima maber!

²Kaw nyapong’ mondo ireggo, kendo igol kitamba ma iuomogo wang’i. Lony lawi mabor mirwako, mondo thochi odong’ nono king’ado aore.

³Dugi nonen, kendo wichkuot ma in go nonere e lela.

⁴Abiro chulo kuor, kendo onge ng’ama notama. Ng’ama Ler mar Israel ma jawarwa, ma nyinge Ruoth Nyasaye Manyalo Gik Moko Duto, owacho kamanoo.

⁵Yaye, dala maduong’ mar jo-Kaldai, bed kiling’ thi, kendo gumbi idhiyo e mudho mandiwa, nimar ok nochak oluongi ni min pinje mang’eny.

⁶Kane mirima omaka gi joga, ne ajwang’ogi ka gima ok gin joga awuon, mi aketogi e tekoni. Ne ok ikechogi, to ne iketo kum mapek koda ka kuom joma oti.

⁷Ne iwacho niya, “Abiro bedo ruoth nyaka chieng’.” To ne ok iparo gik mane isetimogo, kata gik ma gibiro kelo achien!

⁸ Emomiyo koro winj wachni, in dala machalo nyako mohero ngima mamalo, kendo obet e kom loch ka ok dew gimoro, to wacho e chunye niya, “An kenda ema antie. Onge ng’at moro machielo marom koda. Ok nachal gi chi liel, kendo nyithinda ok notho ngang’.”

⁹To kata obedo ni iparo kamano, to piyopiyo nono gik moko ariyogo notimreni riat odiechieng’ achiel, mi inidong’ chi liel, kendo nyithindi bende notho. Mago duto notimreni, ma kata yiendi mang’enygo ok nokonyi.

¹⁰Ne iparo ni onge gima ditimi nikech timbeni mamonogo, mi iwacho niya, “Onge ng’ama nena.” To rieki mathoth ne owuondi, “An kenda ema antie. Onge ng’at moro machielo marom koda.”

¹¹Kuom mano masira biro maki, kendo ok ning’e kaka dithiedhri. Adier, masira biro nyori, kendo ok ning’e misango minyalo geng’ogo. Ee, masira biro poyi, mi tieki pep!

¹²Dhi adhiya nyime gi yiedhi gogogo, misebedo kitiyogo nyaka ne ia e nyathi, mondo waneye ane ka dikonyi, kata di gibwog ji.

¹³Isechandori gi jogi mang’adoni rieko kuom ndalo mang’eny, to koro we jokor wach ma rango polo gi sulue, kendo manyisi gik mabiro timore due ka duego, otim ane chir mondo oresi, ka ginyalo!

¹⁴To winji, gichalo tiang’ ma mach wang’o. Ok ginyal kata mana resore gin giwegi e mach, kendo majno ok nobed mach maberber, minyalo bet bute kioyo.

¹⁵Kamano e kaka jathieth misechandorigo nyaka ne ia e nyathi biro bet. Moro ka moro nokwang’ kochiko yore owuon, kendo onge ng’ama noresi.