Read luo Isaya 48 Bible Online

Isaya 48 - luo bible

Isaya 48

¹Winjuru, un joka Jakobo, miluongo ni jo-Israel, kendo ma koth Juda. Ukuong’oru gi nying Ruoth Nyasaye, kendo ulamo Nyasach Israel, to ok ulame gi adiera, kata e yo makare,

²kata obedo ni upakoru ni un jo-Jerusalem, dala maler, ma nyinge en Ruoth Nyasaye manyalo Gik Moko Duto kamano.

³Chon gi lala ne akoro gik ma koro osetimore. Ne ahulogi gi dhoga awuon. Bang’e ne atiyo piyopiyo nono, mi gitimore.

⁴Ne ang’eyo ni wiu tek ta, ka rwath ma ng’ute opong’, kendo ma pat wang’e tek ka lwanda.

⁵Mano emomiyo ne ahulonu gigo chon, ka anyisou kapok moro otimore, nikech dipo ka ng’ato kuomu owacho niya, “Nyasacha mane aloso gi chuma ema ne omiyo gitimore.”

⁶Usewinjo gima ne awacho, omiyo pareuru maber, eka ubiro yie ni en adier. To koro anyisou gik manyien ma pok ung’eyo, mosebet kopondo.

⁷Ne ok achueyogi chon, to achueyogi mana e sechegi. Ne ok uwinjogi chon, to uwinjogi mana kawuono, omiyo ok unyal wacho ni useng’eyogi.

⁸Chutho ne ok ung’eyogi, bende ne ok uwinjogi, nikech ne ok uyawo itu chon, nimar ne ang’eyo ni un joma andhoga ma ok nyal gen, kendo ma jopiem nyaka ne a e ich.

⁹Kar tiekou to ne aterora mos, mi ageng’o mirimba mana nikech nyinga gi duong’na.

¹⁰Asepwodhou, to ok kaka ipwodho fedha e mach.

¹¹Ne atimo kamano nikech nyinga. Ee, mana nikech nyinga awuon, nimar ere kaka dayie mondo nyinga okethre? Ok ayie mondo duong’ ma imiya omi nyasaye moro machielo.

¹² “Winjauru un joka Jakobo. Ee, chikuru itu, un jo-Israel, un joma aseluongo. An e En. An e mokwongo, kendo an e mogik.

¹³Ne aketo mise mag piny gi lweta awuon, kendo ne ayaro polo gi lweta ma korachwich. Kane aluongogi to ne githinyore ka diemo wang’.

¹⁴Chokreuru un duto, mondo uwinji. Ere nyasachu moro mosehulo gima biro timore, kawacho niya, ‘Ng’at ma ahero ema nokum Babulon kaka adwaro, mi lo jo-Kaldai.’

¹⁵An awuon ema asewacho kamano. Adier, an ema aseluonge, mi akele, omiyo gik mochano duto biro dhi maber.

¹⁶Suduru machiegni koda mondo uwinj wachnani: Nyaka nene pok asewuoyo ling’ling’. Chieng’ mane gigo duto chakore ne antie.” (To koro Ruoth Nyasaye oseora, kaachiel gi Roho mare.)

¹⁷Ruoth Nyasaye ma jawaru, kendo ma Ng’ama ler mar israel, wacho kama: “An Ruoth Nyasaye ma Nyasachu. Apuonjou mondo uyud konyruok, kendo atelonu e yo ma onego uluw.

¹⁸Dine bed ni uwinjo chikena, to hapu domol ka aora, kendo pok muyudo kuom timu makare dotiak ka pi nam.

¹⁹Nyithindu gi nyikwau dobedo mang’eny ka kuoyo mokadho akwana, kendo nyingu ok dong’ad oko, kata ok doruchi e wang’a.”

²⁰ Wuoguru ua Babulon! Ee, ringuru ua kuom jo-Kaldai! Wachuru ni, Ruoth Nyasaye ema osewaro joka Jakobo jotichne. Nyisuru wachno, kuwer gi mor mar loch, kendo kulande e tung’ piny gi tung’ piny.

²¹Kane otelonigi e thim, to riyo ne ok oloyogi, nikech ne omiyo pi owuok e lwanda. Ee, nobaro lwanda, mi pi obubnie.

²² Ruoth Nyasaye owacho ni, “Joricho onge gi kue.”