Read luo Isaya 50 Bible Online

Isaya 50 - luo bible

Isaya 50

¹Ruoth Nyasaye wacho niya, “Un jo-Israel ma nyithinda, en adier ni ne ariembou nikech timbeu maricho, to bende nitie gima nyiso ni nariembou chuth, kaka ng’ato riembo chiege? Koso ng’ato nitie mane achiwoune? Ooyo, ne ang’iewou mana nikech timbeu mamono.

²Kuom mano, ere gima omiyo ne ok ayudo ng’ato, kane abiro iru? Koso kane aluongo, to ere gima omiyo ng’ato ne ok odwoka? Uparo ni bada chiek ma ok nyal warou, kata ni aonge gi teko ma daresugo? Ooyo, ka akok, to nam duono, bende aore lokore piny motwo, mi rech manie igi tho kendo dum marach nikech pi onge.

³Aloko polo doko marateng’ ti, mana ka gima aume gi pien.”

⁴Ruoth Nyasaye osemiya lep mar puonj, mondo ang’e kaka anyalo hoyo ng’at ma ojony. Opiago ita mabith gokinyi pilepile, ni mondo achik ita ka ng’at mipuonjo.

⁵Ruoth Nyasaye oseyawo ita, mi ok asetamora winjo wachne, bende ok aselokora mi aweye.

⁶ Ne aloko dieng’eya ni joma goya, kendo nachiwo tika ni joma dwaro pudho. Wang’a bende ne ok apando kiyanya, kata king’udho kuoma olawo.

⁷To Ruoth Nyasaye biro konya, omiyo onge ayany moro ma nyalo hinya. Kuom mano aseguro wiya matek ka lwanda, ka ang’eyo ni ok nayud wichkuot,

⁸ bende ang’eyo ni ng’at ma biro pogo wachna kare ni buta. Kuom mano, ng’at ma hedhore piem koda mondo obi waradi! Adier, ng’at ma dwaro kwero wechena mondo owuog ane!

⁹Ruoth Nyasaye ema biro chwaka. Koro ere ng’ama biro loya gi bura? Ooyo, mano ok nyalre! Giduto gibiro ti ka law, ma olwenda ochamo.

¹⁰Ere ng’ato kuomu moluoro Ruoth Nyasaye, kendo winjo dwond jatichne, bende ma wuotho kuonde motimo mudho, to ok ne ler kata matin? Ng’at ma kamano mondo ogen kuom Ruoth Nyasaye.

¹¹Winjuru, un duto joma kudho mach, kendo moko meny, mi liel. Wuothuru awuotha e ligek mach musekudho kendo e meny ma usemokono! Ubiro rieru piny gi rem malit kutho.