Read luo Isaya 52 Bible Online

Isaya 52 - luo bible

Isaya 52

¹ A malo! A malo, mondo ibed motegno, in dala Sayun. Rwak lepi mabeyoe moloyo, yaye Jerusalem, dala maler, nimar chakre kawuono, joma ok oter nyangu, kaachiel gi joma ogak, ok nochak odonj kuomi.

²In dala Jerusalem, machalo misumba moriere piny e lowo, a malo iteng’ri mondo buru oa kuomi. Adier, in dala Sayun, machalo nyako ma misumba, gony tonde motuego ng’uti.

³Ruoth Nyasaye wacho ni jo-Israel niya: “Ne ong’iewu, maonge gima ochul kuomu, omiyo koro ibiro warou maonge chudo moro.”

⁴Ee, Ruoth Nyasaye wacho kama: “Mokwongo, joga ne odhi Misri mondo odagie, to achien jo-Asuria nosandogi malit kayiem nono.

⁵ To koro, en ang’o ma anenoni? Aneno ka joga okaw nono, maonge gima ochul. Joma ne omakogi goyonigi siboi, kendo odiechieng’ kodiechieng’ gitugo gi nyinga marach.

⁶To chieng’ resruok, joga nong’e nyinga. Gining’e ni kara en mana an ema wuoyo kodgi.”

⁷ Mano kaka ji mor ka neno jaote makelo wach maber, ka wuotho ewi gode. Jaote wacho ni gik moko koro dhi maber, kendo olando wach resruok. Bende owacho ni jo-Sayun niya, “Nyasachu e ruoth kuonde duto.”

⁸Winjuru! Jorito mau nokog gi mor, nikech gibiro neno Ruoth Nyasaye gi wengegi, ka duogo Sayun.

⁹Un kuonde mokethore mag Jerusalem, koguru gi mor, nikech unuyud ka Ruoth Nyasaye osekecho joge, kendo owaro Jerusalem.

¹⁰Ruoth Nyasaye osenyiso tekone, mana e nyim ogendini duto ka neno, omiyo ji duto modak e tung’ piny koni gi koni none ka Ruoth Nyasaye reso joge.

¹¹ Wuoguru! Wuoguru ua Babulon, ka ok umulo gimoro mogak. Adier, un muting’o gik lemo, wuoguru Babulon chuth, kusepwodhoru maler.

¹²To ok unuwuog kurikni, kendo ok noriembu, nikech Ruoth Nyasaye ma Nyasach Israel ema biro telo nyimu, kendo en bende ema obiro dong’nu chien.

¹³Winjuru! Jatichna biro dhi nyime maber. Enoting’e malo, kendo nomiye duong’ mang’ongo.

¹⁴Kaka ne ji mang’eny obwok ka onene, nikech rem malit oloko wang’e, mi ondoko gima ok chal dhano,

¹⁵ e kaka ogendini mang’eny nobwogi ka onene, kendo ruodhi noling’ thi e nyime, nikech ginine gima ne pok giwinjo.