Read luo Isaya 54 Bible Online

Isaya 54 - luo bible

Isaya 54

¹ Ruoth Nyasaye owacho niya, “Wer matek, in Jerusalem machalo gi dhako ma migumba mane ok onywol. Adier, kog gi mor, in michalo dhako ma pok muochh okayo, nikech dhako ma chwore oweyo nobed gi nyithindo mang’eny, moloyo dhako man gi dichwo.

²Med odi, obed maduong’ Adier, yar rageng’ mag hembi malach, bende tud tondene obed maboyo, kendo igur loyene obed motegno,

³nimar ibiro nya kuonde duto, kendo nyikwayi noma ogendini pinjegi, mi gidag e mier ma koro owe gundni.

⁴Kik ibed maluor, kata kik chunyi nyosre, nikech ok niyud wich kuot. Ndalo biro chopo ma wiyi nowilie gi wich kuot mane iyudo ka pod itin, kendo ok nichak ipar chandruok mane ineno kane idong’ chi liel,

⁵nimar Jachwechni e chwori! Nyinge en Ruoth Nyasaye Manyalo Gik Moko Duto. Adier, Jawarni en Ng’ama Ler mar Israel, ma iluongo ni Nyasach piny ngima.

⁶Ruoth Nyasaye oseduoki ire, mana ka dhako mane oyudo osejwang’ ma chunye lit ahinya, Ruoth Nyasaye penjo niya, Bende ng’ato dijwang’ chiege mane okendo ka en wuowi adier?

⁷Chutho, ne ajwang’i kuom kinde manok, to koro abiro dwoki dala gi hera matut.

⁸Kane mirima ohinga, ne apandoni wang’a kuom ndalo matin, to koro asekechi gi ng’wono mochwere. An Ruoth Nyasaye ma Jawarni ema awacho kamano.

⁹ Gik mosetimore miyo aparo ndalo mag Nowa. Kaka ne akuong’ora e ndalogo ni pi mane oimo piny ok nochak oime kendo, e kaka koro akuong’ora ni mirima ok nochak omaka kodi kendo, bende ok nachak adhawni.

¹⁰Kata da bed ni gode madongo lal nono, kendo gode matindo gol, to an herana ok nolal nono, bende singruok mar kue mane atimo ok nogol kuomi. An Ruoth Nyasaye ma kechoi ema awacho kamano.

¹¹ “Winji, in Jerusalem, dala mosandi, ma ahiti oyiecho, mi odong’ gunda kokuyo, maonge ng’ama hoyo. Abiro keto mise mari gi kite motegno, mi ageri gi kite mabeyo.

¹²Diriseni to abiro loso gi kite makwar, mi aket kite mang’ang’ni e dhorangeyeni, kendo ager ohingani gi kite ma nengogi tek.

¹³ Ruoth Nyasaye ema nopuonj joma geri duto, kendo nyithindi nodhi nyime maber ahinya.

¹⁴Enogeri e mise mar tim makare, kendo inibed mabor gi kuonde mithiroe ji, omiyo ok nibed maluor, bende nibed mabor gi masiche, mi ok ginisud machiegni kodi.

¹⁵Ka ipo ni ng’ato omonji, to ok nakonye. Adier, ng’ato ang’ata momonji norum, nikech aheri.

¹⁶An ema achueyo jatheth ma chwako chuma e mach, eka athedhogo gi lweny. Bende an ema achweyo jolweny ma kedo gi gigo, ka kethogo gik moko.

¹⁷To koro onge gir lweny molosi ni mondo ohinyi, ma nohinyi, bende inilo buche duto modonjnie. Mano e pok ma jotich Ruoth Nyasaye yudo. Adier, mano e gueth ma asemiyogi. An Ruoth Nyasaye ema awacho kamano.”