Read luo Isaya 6 Bible Online

Isaya 6 - luo bible

Isaya 6

¹ E higa mane ruoth Uzia othoe, ne aneno Ruoth Nyasaye ka obet e kome moting’ore malo kendo moluor, ka lawe morwako opong’o Hekalu.

²Malaike miluongo ni serafi ne ni bute. Moro ka moro ne nigi buombe auchiel, ma ariyo oumogo wang’e, to ariyo mamoko oumogo tiendene, kendo ariyo modong’ ohuyogo.

³ Ne giluongore, ka moro ka moro kok ni wadgi niya, “Mano kaka Ruoth Nyasaye Manyalo Gik Moko Duto ler! Oler adier! Yaye mano kaka oler! Piny duto opong’ gi duong’ne.”

⁴ E kinde ka kinde mane gikokie kamano, mise mag dhoudi ne yiengni, kendo iro ne pong’o Hekalu.

⁵Kane aneno kamano, ne aywak, ka awacho niya, “A yaye, piny lichna! Aruenyo, nimar an ng’at ma dhoge ochido, kendo adak e kind ji ma dhogi ok ler, to eka aseneno Ruoth Nyasaye Manyalo Gik Moko Duto gi wang’a awuon!”

⁶Eka malaika moro nohuyo, mobiro ira koting’o mach

⁷mane osegolo e kendo-mar-misango gi ramaki. Ne orewo dhoga ka owacho niya, “Winji, majni oserewo dhogi, omiyo timbeni mamono oweni. Adier, richoni opwodhi.”

⁸Bang’ manoo ne awinjo ka Ruoth Nyasaye wacho niya, “Ere ng’ama daor? Koso ng’ano ma dibed jaotena?” An to ne adwoko niya, “Era e, an ema mondo iora.”

⁹ Eka nowachona niya, “Dhiyo mondo inyis jogi kama ‘Kata da bed ni uchiko itu machal nade, to ok unuwinji. Bende kata da bed ni ung’icho matek machal nade, to ok unufweny gimoro.’

¹⁰To in Isaya, nyaka imi, chuny jogi dok mapek, mondo kik wach donjnigi, kendo imi itgi dinre mondo kik giwinj wach, bende imi wengegi imre mondo kik ginen, eka dipo ka gilokore, mi ochanggi.”

¹¹Bang’e ne apenjo niya, “Yaye Ruoth Nyasaye, gima kamano biro timore nyaka karang’o?” Eka nodwoka niya, “Mano biro timore nyaka mier lokre gundni, mi udi dong’ nono, ma onge ng’ama odakie, kendo piny kethre chuth,

¹²ka Ruoth Nyasaye oseriembo ji duto mabor, mi piny Israel olokore gima ojwang’.

¹³Kata ka achiel kuom apar mar ji odong’ kanyo, to gin bende notiekgi pep, mana ka yien motong’, mi osiki kende ema odong’. Kamano jo-Nyasaye ma biro dong’ nochal gi osikino.”