Read luo Isaya 63 Bible Online

Isaya 63 - luo bible

Isaya 63

¹ Mano ng’a, mabiro koa Bozra e piny Edom, ka lepe otimo remono? Orwakore gi lep duong’. Kendo owuotho gi tekone duto. “An Ruoth Nyasaye ema abiro, ka ahulo ni Jerusalem oseresi, kendo an ema an gi teko mar waro ji.”

²To ere gima omiyo lepi duto kwar, mana ka lep ng’ama nyono mzabibu ka biyo?

³ “Gikwar kamano nikech asenyono mzabibu kenda kar bicho. Onge ng’ato kata achiel kuom ogendini mane ni koda. Ne anyono wasika piny ka akecho. Adier, ne anyonogi ka an gi mirima mager, mi rembgi okirore e lepa. Mano ema omiyo lepa duto otimo remo.

⁴Ne asechano chieng’ ma achuloe kuor kendo higa ma aresoe joga osechopo.

⁵ Ne arango ng’ama dikonya, to ne ok ayudo. Kuom mano ne adhier nono, kane ayudo ni onge ng’ama nyalo konya. To kata kamano tekona awuon ne omiyo alocho, kendo mirimba awuon ema ne okonya.

⁶Ne anyono ogendini piny ka akecho. Ee, ne atong’ogi atong’ogi, mi rembgi obubni piny.”

⁷Abiro pako ber mar Ruoth Nyasaye kod timbene madongo miwuoro ka agoyo erokamano kuom gik moko duto mosetimonwa, kendo kuom hera maduong’ moseherowago wan jo-Israel. Notimonwa kamano nikech ng’wonone kod herane mogundho.

⁸Ruoth Nyasaye nowacho niya, “Jogi gin joga adier. Gin yawuota ma ok nyal wuonda.”

⁹Omiyo ne odoko jaresgi e chandruok duto. Onge jaote kata malaika moro mane oresogi, to mana en ema osebedo ka owarogi gi herane kod ng’wonone, koting’ogi nyaka nene.

¹⁰To kata kamano, ne gidagi lochne, mi gimiyo Roho mare maler okuyo, eka ne olokore jasikgi, mi okedo kodgi en owuon.

¹¹Bang’e ne giparo ndalo machon mi gipenjore niya, “Ere Nyasaye mane ogolo joge e aora Nael, ka Musa otelonigi? Adier, ere Jal mane oketo Roho mare kuomgi,

¹² kendo mane otiyo gi tekone mang’ongo e dir Musa korachwich, mobarogo pi e nyimgi, mondo nyinge oyud duong’ mochwere?

¹³Ne omiyo ging’ado nam mayot, mana kaka faras ng’ado thim,

¹⁴kendo mana kaka jamni ridore e holo to ok chwanyre. Roho mar Ruoth Nyasaye notelonigi ka gidhi kar yueyo. Mano e kaka ne otelo ni joge mondo nyinge oyud duong’.”

¹⁵A Ruoth Nyasaye, rang piny gie polo mondo ine. Ee, rang piny gi kuma ler ma idakie gi duong’. Tinde ere hera matut ma yande iherowago cha? Koso ere tekoni kod kinda mane in go chon?

¹⁶In e wuonwa, omiyo kik idagi konyowa. Kata obedo ni Ibrahim ok ong’eyowa, kendo Israel ok oyie ni wan joge, to in Ruoth Nyasaye, in e wuonwa, kendo in e jawarwa nyaka nene.

¹⁷A Ruoth Nyasaye, ere gima omiyo iweyowa aweya, mi wabaro waweyo yoreni? Koso ang’o momiyo imiyo chunywa doko matek, mondo kik waluori? Duogi nikech wan, wan jotichni. Wan dhoudi mikwano ka mwanduni.

¹⁸Ere gima omiyo joricho osedonjo e Hekalu mari? Koso ang’o momiyo wasikwa osenyono kama ilamie?

¹⁹Kuom ndalo mang’eny osekwanwa ka joma ok nie bwo lochni, mana ka gima ok wan jogi iwuon.