Read luo Isaya 7 Bible Online

Isaya 7 - luo bible

Isaya 7

¹ E kinde mane Ahaz wuod Jotham ma nyakwar Uzia obet ruodh Juda, Rezin ruodh Aram kod Peka wuod Remalia ma ruodh Israel ne jodhi monjo Jerusalem, to kawe notamogi.

²Kane joka Daudi owinjo ni jo-Aram osewinjore gi jo Efraim, ne gitetni kaachiel gi Ahaz ma ruodhgi, mana ka yien manie bungu ma yamo uko.

³Eka Ruoth Nyasaye nowacho ni Isaya niya, “Dhiyo gi wuodi Shear-jashub ir Ahaz kama fereji mar pi mamalo ogikie but yo mochiko puodho miluongo ni puoth Jalwok Lewni, mondo iwachne kama:

⁴‘Nyaka ibed gi kue, ma ok ibedo maluor. Kik iwe mirima mager ma Rezin gi jo Aram kod wuod Remalia nigo, nyos chunyi, nikech gin mana meny ariyo mag mach motimo iro.

⁵Adier, jo-Aram gi jo-Efraim kaachiel gi wuod Remalia osechano mondo otieku, ka giwacho niya,

⁶“Wamonj piny Juda mondo wakedgo, kendo kwasekawe to waket wuod Tabeel obed ruoth kuno.” ’

⁷To Ruoth Nyasaye wacho kama: ‘Mano ok notimre e ndalogi kata e ndalo mabiro,

⁸nimar kata obedo ni Damaski e dala maduong’ mar Aram, kendo Efraim, kendo wuod Remalia e jatend dalono,

⁹bende kata ni Samaria e dala maduong’ mar Efraim nokethi, mi ok nochak obed oganda kendo. Kuom mano, bed gi yie motegno kuom Nyasaye, nono to ok ibi chung’ mogurore.’ ”

¹⁰Ruoth nochako owuoyo kendo gi Ahaz, kowacho niya,

¹¹“Kwa Ruoth Nyasachi mondo omiyi ranyisi moro amora, moa mwalo e bur piny, kata moa e polo malo.”

¹²To Ahaz nodwoko niya, “Ooyo, ok natem Ruoth Nyasaye ka akwaye mondo omiya ranyisi.”

¹³Bang’e Isaya nowacho niya, “Un joka Daudi, chikuru itu. Olo chuny ji ma uolo pok oromou koso, ma pod udwaroe mana olo Nyasacha bendeni?

¹⁴ Koro Ruoth Nyasaye owuon biro miyou ranyisi ma chalo kama: Nyako moro osemako ich, kendo obiro nywolo wuowi, ma obiro chako ni Emanuel, (ma tiende ni, Nyasaye ni kodwa.)

¹⁵E kinde ma nyathino nong’ee pogo gima rach gi gima ber, to enobed ka ochamo mor dhiang’ gi mor kich,

¹⁶nikech kata obedo ni koro uluoro ruodh Efraim gi ruodh Aram, to ka pok nyathino ong’eyo pogo gima rach gi gima ber, to pinje ruodhi ariyogo nobed mojwang’

¹⁷To in Ahaz, Ruoth Nyasaye biro keloni kaachiel gi jogi kod joodi masira ma pok oneye nyaka ne jo-Israel pogre kuom jo-Juda. Ruodh Asuria ema nokel masirano.

¹⁸“E ndalogo, Ruoth Nyasaye noluong jolwenj Misri modak kuonde ma aora Nael ochakoree, kod jolweny mag Asuria.

¹⁹Giduto ginibi, mi gipong’ piny mana ka lwang’ni gi kich mopoto e hohni kod buche mag lwendni kendo e kuthe gi lege duto.

²⁰E ndalogo Ruoth Nyasaye nokel ruodh Asuria mondo oyaku mi weu nono, mana ka gima wembe ema olielo dendu duto koda ka tiku bende.

²¹E ndalogo ka ng’ato nigi roya achiel kod rombe ariyo,

²²to enocham mo nikech chak mathoth moyudo kuom jamnigo. Adier, joma odong’ e piny Juda nocham mor dhiang’ gi mor kich.

²³E ndalogo puothe ma yande nitie mzabibu mang’eny ma nengogi tek nolokre bunge mogawore gi kuthe kod pedo.

²⁴Ji nodhi kuondego gi asere kod atung’ mana ni mondo odwarie le, nimar piny duto nobed koyugno.

²⁵Ji ok nodhi e kor gode ma yande ipuro nikech ginitim pedo gi kuthe, to dhok gi rombe ema nobed ka kwayoe.”