Read luo Isaya 8 Bible Online

Isaya 8 - luo bible

Isaya 8

¹Ruoth Nyasaye nowachona niya, “Dwar bao moro malach mondo indikie ni, MAHER-SHALAL-HASH-BAZ, (tiende ni, yeko biro timore machiegni.)

²Eka iluong Uria jadolo gi Zekaria wuod Jeberekia obed janeno, nikech gin joma long’o.”

³Bange ne ariwowa gi janabi madhako ma chiega, mi omako ich, monywolo nyathi ma wuowi. Eka Ruoth Nyasaye nowachona niya, “Chake ni Maher-shalal-hash-baz,

⁴nimar kapok ong’eyo wacho ni ‘Baba’, kata ni ‘Mama,’ to ruodh Asuria nomonj Damaski kod Samaria, mi yak mwandugi duto.”

⁵Bang’e Ruoth Nyasaye nochako owachona niya,

⁶“Ogandani osedagi wechena mamuol machalo pi Shiloa mamol mos gi kue,

⁷kendo gitetni e nyim Resin kod wuod Remalia, emomiyo abiro kelo kuomgi ruodh Asuria gi joge mag lweny, mabiro pong’o pinygi chuth, mana kaka aora Yufrate maduong’ kendo matut pong’o wang’e kendo mwomo genge, mi o oko.

⁸Yaye, Emanuel! Obiro mwomo piny Juda mi ochop koni gi koni mana kaka ohula mwomo genge mi im piny duto gi pi matut.”

⁹Un ogendini, ng’euru ni ibiro negou! Chikuru itu, un pinje man kuonde maboyo, nimar kata umanoru gi gi lweny, to pod nonegu anega.

¹⁰Kata dabed ni uchano gik ma udwaro timo, to gik ma uchanogo nokethre. Adier, kata dabed ni ugolo chik mondo otimgi, to ok ginitimre, nikech Nyasaye ni kodwa.

¹¹Weche mane Ruoth Nyasaye owuoyogo koda gi tekone maduong’, kosiema ni kik aluw timbe jo-Israelgi e magi:

¹² Gik ma jogi luongo ni ler, kik iluong ni ler. Bende gik ma giluoro gik iluor, kata kik goyi kibaji.

¹³Ruoth Nyasaye Manyalo Gik Moko Duto, ema nyaka ikwan ni ler. En ema nyaka imiye luor, kendo en ema nyaka kibache goyi.

¹⁴ En e Kar Ler, kendo e kidi ma chwanyo ji. Adier, en e lwanda mamiyo pinje jo-Israel ariyo duto podho. Chutho en e obadho mamako jo-Jerusalem.

¹⁵Ji mang’eny biro chwanyore e lwandano, mi gore piny kendo tur. Adier, obadhono biro mako ji mathoth.

¹⁶Koro atueyo kalatas mondikie wechego matek, kendo achano puonjno e chuny jopuonjrena.

¹⁷ Arito Ruoth Nyasaye ma pando wang’e ni joka Jakobo, ka ageno mana en.

¹⁸ An kaachiel gi nyithindo ma Ruoth Nyasaye osemiya, wan ranyisi ma Ruoth Nyasaye Manyalo Gik Moko Duto modak e got Sayun oseoro, manyisogi gik mabiro timore.

¹⁹Kamoro dipo ka ji biro wachonu ni mondo udhi upenj wach kuom ajuok nyakalondo kod ajuoke mamoko majajni kendo madhum. To bende ber ka joma ngima penjo joma otho wach adier? Nyasachgi donge ema onego gipenj wach? Ee, ber mondo giwinj mana chik Nyasaye gi wachne!

²⁰Adier, ji nyalo wachonu weche makamago, to kata kamano gima giwacho onge tich.

²¹Ginikadhi e piny ka githagore kendo ka gidenyo. Kamano igi nowang’, mi giyany ruodhgi kendo Nyasachgi.

²²Kata ka giting’o wang’gi malo, kata ka girango piny, to chandruok gi mudho kod chuny malit ema ginine kuonde duto, kendo noriembgi, mi witgi e mudho mandiwa.