Read luo Isaya 9 Bible Online

Isaya 9 - luo bible

Isaya 9

¹ To ndalo biro ma piny ma yande neno chandruok nobed gi mor. Chon Nyasaye nomiyo piny Zebulun gi piny Naftali obedo pinje michayo, to e ndalo mabiro nomi pinjego duong’. Tiende ni Galili piny ogendini man yo podho chieng’ man aora Jordan, e yo madhi nam Mediterenian.

² Ji ma wuotho e mudho none ler maduong’. Adier, ler norieny kuom jogo modak e piny motimo mudho mandiwa.

³Yaye Nyasaye, inimi oganda Israel nya, kendo inimi gimed bedo mamor. Ginibed mamor e nyimi kaka ji mor e ndalo keyo, kendo mana kaka ji mor ka pogo gik moyaki.

⁴Mano notimre nikech ibiro turo jok ma giting’o, kaachiel gi luth misandogigo, mana kaka nitimo e ndalo mane olo jo-Midian.

⁵Gik moko duto ma jolweny omanorego kod lewni duto ma omienore gi remo, nowang’ mana ka yien michwakogo mach,

⁶nikech nonywolnwa nyathi. Adier, ibiro miyowa wuowi, kendo loch nobed e lwete. Noluong nyinge ni Jabura Mahono, Nyasaye Maratego,, Wuoro ma nyaka chieng’, kendo Ruodh Kue.

⁷ Lochne nobed maduong’ kendo kue mokelo nobed maonge giko. Enobed e kom Daudi kendo norit pinye gi adiera kod tim makare mondo ogurre obed motegno. Chakre kawuono nyaka chieng’, Ruoth Nyasaye Manyalo Gik Moko Duto oseketo chunye mondo otim gigo.

⁸Ruoth Nyasaye oseoro wachne kosiemogo joka Jakobo. Ee, wachno otundo kuom jo-Israel.

⁹Jo-Efraim kod jo-Samaria duto nobolre, kata obedo ni giwuoyo gi sunga kod wang’ teko niya,

¹⁰“Adier, udi moger gi matafari osepodho, to koro wabiro gedo mana gi kite mopa, bende kata obedo ni osetong’ yiend ng’owo, to wabiro pidho yiend sida kargi.”

¹¹Ruoth Nyasaye biro kelo wasigu mondo oked kodgi. Adier, obiro thuwo wasikgi kodgi mondo otiekgi.

¹²Jo-Aram biro kedo kodgi gi yo wuok chieng’, to jo-Filistia biro monjogi gi yo podho chieng’, kendo gibiro mwonyo jo-Israel mana dichiel. To kata kamano, mirimb Ruoth Nyasaye ok norum, kendo pod nosik kokumogi akuma.

¹³To ji ok noduog ir jal ma nobed ka kumogi. Ooyo, ok ginidwar mondo Ruoth Nyasaye Manyalo Gik Moko Duto otelnigi.

¹⁴Emomiyo Ruoth Nyasaye nogol wich gi yip kod odundu gi yiend othith e odiechieng’ achiel.

¹⁵(Wich en joma oti kod joma ogen, to yip en jonabi mawacho miriambo.)

¹⁶Jotend jogi osewitogi. Omiyo joma onego telnigi ok ong’eyo gima onego gitim.

¹⁷Mano, emomiyo Ruoth Nyasaye ok nokech yawuotgi, bende ok nobed mamuol gi nyithi kiye kata gi mond liete, nikech giduto gin joricho, kendo gikia Nyasaye, bende ng’ato ka ng’ato kuomgi wacho mana weche mofuwo. Kata kamano, mirimb Ruoth Nyasaye ok norum, kendo pod nosik kokumogi akuma.

¹⁸Richo liel mana ka mach mager mobolie kudho, kendo wang’o koda ka bungu ka iro dhuolore.

¹⁹Omiyo mirimb Ruoth Nyasaye Manyalo Gik Moko Duto biro wang’o piny Israel, kendo ji ema nobed yien michwakogo mach.

²⁰Ng’at achiel biro mecho konchiel, to pod nodeny adenya, kendo ng’at machielo biro mwonyo gik moko komachielo, to ok noyieng’ ngang’. Moro ka moro biro chamo ringre nyithinde, bende onge ma nowe owadgi mak ochamo.

²¹To kata kamano mirimb Ruoth Nyasaye ok norum kendo pod nosik kokumogi akuma.