Read luo Tim jo-Lawi 10 Bible Online

Tim jo-Lawi 10 - luo bible

Tim jo-Lawi 10

¹Nadab gi Abihu, ma yawuot Harun, nokawo tepgi mag mach, mi giketoe mach, eka ne gioloe ubani. Ne gidonjo e nyim Ruoth Nyasaye, mi giyiegoe mach ma ok ni kare, mane Ruoth Nyasaye ok ochiko mondo ochiwne.

²Mi mach nomwoch e nyim Ruoth Nyasaye, motiekogi pep. Kamano ne githo kanyo e nyim Ruoth Nyasaye.

³Bang’ mano Musa nowacho ni Harun niya, “Ma e gima Nyasaye nowuoyoe niya, ‘Joma sudo buta nyaka ng’e ni an Ng’ama Ler, kendo nyaka gimiya duong’ e nyim ji duto.’ ” To Harun noling’ aling’a thi, ka dhoge omoko.

⁴Musa nooro wach, mi oluongne Mishael gi Elzafan ma yawuot Uziel, ma owadgi wuon Harun kod yawuote ma Eleazar gi Ithamar niya, “Biuru uting’ ringre oweteu ugol oko mondo oa Kama Ler.”

⁵Omiyo ne gibiro mi giting’ogi gi lepgi, kendo gigologi oko mar kambi kaka Musa nosechikogi.

⁶Bang’e Musa nowacho ni Harun kod yawuote ma Eleazar gi Ithamar niya, “Kik uwe wiu yugno, kendo kik uyiech lepu, manyiso ni uywak, nimar dipo ka utho, mi Ruoth Nyasaye okecho gi oganda duto. Joweteu ma jo-Israel nyalo ywago joma ne Ruoth Nyasaye otieko gi mach.

⁷To un kik ua e dho Hemb Romo, nono to utho, nimar osewiru gi mor wir mar Ruoth Nyasaye.” Mi ne gitimo kaka Musa nowacho.

⁸Ruoth Nyasaye nowacho ni Harun niya,

⁹“In kod yawuoti kik umadh kong’o kata gimoro mamero ji, ka udhi e Hemb Romo, nono to utho. Mano en chik momako nyikwau nyaka chieng’.

¹⁰Nyaka umak chikno, kupogo gik mowal ni Ruoth Nyasaye, kod gik moko nono, kendo kupogo gik mokwer kod gik ma ok okwer,

¹¹kendo kupuonjo jo-Israel chike mane Ruoth Nyasaye omiyogi gi dho Musa.”

¹² Musa nowacho ni Harun gi yawuote modong’ ma Eleazar gi Ithamar niya, “Kawuru mogo modong’ kuom misango mar cham miwang’o gi mach ni Ruoth Nyasaye mondo ucham maonge thowi but kendo-mar-misango, nikech en gima ler moloyo.

¹³Mano emomiyo nyaka uchame Kama Ler, nimar en pokni kaachiel gi yawuoti. Pok onogo ogol kuom misengni miwang’o ni Ruoth Nyasaye nikech kamano e kaka nochika.

¹⁴ Un gi yawuotu unucham agoko gi em mar mich moyiedhi michiwo ni Ruoth Nyasaye, to nyaka uchamgi kamoro amora mowal ni Ruoth Nyasaye, nimar osemiugi kuom misengni mag sawo ma jo-Israel timo.

¹⁵Em kod agoko nyaka kel kaachiel gi boche mag misengni miwang’o ni Ruoth Nyasaye, mondo obed mich moyiedhi michiwo ni Ruoth Nyasaye. To bang’e em gi agoko nodong’ni gi nyithindi kaka poku mosiko nyaka chieng’, nikech Ruoth Nyasaye ochiko kamano.”

¹⁶Musa nopenjo wach diel mane otimgo misango mar golo richo, mi ne onyise ni osewang’e. Omiyo mirima nomake gi Eleazar kod Ithamar ma yawuot Harun mane odong’. Nopenjogi niya,

¹⁷ “Marang’o ne ok uchamo misango mar golo richo Kama Ler, to en misango maler moloyo? Ne omiugo mondo ugolgo richo mar oganda jo-Israel kupwodhogi kuom richogi e nyim Ruoth Nyasaye.

¹⁸Ne ok ukelo rembe ei Kama Ler, omiyo ne onego uchame ei Kama Ler kaka nochika.” To Harun nodwoko Musa niya,

¹⁹“Kawuono yawuota osetimo ni Ruoth Nyasaye misango mar golo richogi giwegi kod misango miwang’o pep, to kata kamano neye gima osetimorena! To koro ka da acham misango mar golo richo kawuono, bende datimo maber e nyim Ruoth Nyasaye?”

²⁰Kane Musa owinjo kamano, noneno ni Harun ni kare.