Read luo Tim jo-Lawi 11 Bible Online

Tim jo-Lawi 11 - luo bible

Tim jo-Lawi 11

¹Ruoth Nyasaye nowacho ni Musa gi Harun

²ni mondo onyis jo-Israel kama:

³Unyalo chamo kit le moro amora, kata kit chiayo moro amora ma ombong’ne opogore ariyo kendo nyamo kambula.

⁴To kik ucham mago ma ombong’gi opogore ariyo to ok nyam kambula, kata mago manyamo kambula to ombong’gi ok opogore ariyo. Nyaka ukuer ngamia,

⁶kod apuoyo, nikech kata ginyamo kambula kamano, to ombong’gi ok opogore ariyo.

⁷Mbidhi bende nyaka ukuer, nikech kata ombong’ne opogore ariyo kamano to ok onyam kambula.

⁸Kik ucham lego, kata mana mulogi ka gisetho kik umulgi. Unukwan-gi ka gik makuero.

⁹To kuom gik modak e thim unyalo chamo mago duto man gi thuokgi kod kagahla, bed ni gidak e pi chumbi, kata e pi maonge chumbi.

¹⁰To nyaka ukuer mago duto maonge gi thuokgi kata kagahla, kata ka gin gik matindo manywolore, kata ka gin gik madongo.

¹¹Ginibednu gik makuero. Ok omuchamgi, kendo kata mana mago motho nobednu gik makuero.

¹²Gimoro amora modak e pi maonge thuoke kata kagahla nobednu gik makuero.

¹³Winy ma nyaka kuer e magi: Ongo gi koga gi kwasi

¹⁴gi otenga kod kit okunekune duto,

¹⁵gi kit agak duto

¹⁶gi udo gi nyatawo gi okok kod kit olith duto,

¹⁷gi tula matin gi osou gi tula maduong’

¹⁸gi tula ma ite dongo gi mbusi gi achuth

¹⁹gi nyamnaha gi kit ng’ang’a duto gi cherwa kot oliktik.

²⁰Gik mahuyo kanyakla duto, kendo ma wuotho gi tiende ang’wen, nobednu gik makuero,

²¹mak mana mago ma tiendegi ochomore e ogwendegi mondo gichikrego.

²²Kuom gik makamago unyalo chamo kit bonyo madongo duto, gi git osialo duto, gi kit onjiri duto, kod kit dede duto.

²³To gik moko duto mahuyo kanyakla, kendo man gi tiende ang’wen, nobednu gik makuero.

²⁴Ka ng’ato omulo gik makamago to obedo mogak, kendo gimoro amora mogere kuomgi ka gisetho nobed mogak nyaka odhiambo.

²⁵Ng’at moting’ogi ka gisetho nyaka lwok lepe, to nosik kogak nyaka odhiambo.

²⁶Unukuer le duto ma ombong’gi ok opogore ariyo, kendo ma ok nyam kambula, kendo ng’ato ang’ata momulogi nobed mogak.

²⁷Bende unukuer le duto man gi tiende ang’wen, ma wuotho ka nyono piny gi i tiendegi kaka paka kata guok. Ng’at momulogi ka gisetho nobed mogak nyaka odhiambo.

²⁸Ng’at moting’ogi ka gisetho nyaka lwok lepe, to nosik kogak nyaka odhiambo. Le makamago nyaka ukuer.

²⁹Gik mamol ma nyaka ukuer e magi: Oyieyo gi gudhugudhu kod kit ng’ech duto,

³⁰gi ogue gi kalagwena gi olele gi obongo kod ong’ongruok.

³¹Unukuergi, kendo ng’at momulogi ka gisetho nobed mogak nyaka odhiambo.

³²Ka achiel kuomgi otho, molwar kuom gimoro, to gino nobed mogak, bed ni en gima olos gi yien, kata en law, kata pien kata ogunia, kata gimoro amora mikonyruokgo pile. Nyaka nyume e pi, to nosik kogak nyaka odhiambo. Bang’e nobed maler.

³³Ka achiel kuom gigo olwar e agulu, to gik manie agulugo duto nobed mogak, kendo aguluno nyaka negi.

³⁴Chiemo moro amora moolie pi moa e aguluno nobed mogak, kendo gimoro amora mimadho manie aguluno bende nobed mogak.

³⁵Ka achiel kuom gigo otho mi olwar kuom gimoro amora, to gigo nobed mogak. Ka olwar kuom kendo, to kendono nyaka kethi, nimar odoko mogak, kendo nyaka okwane kamano.

³⁶Kata obedo ni gimoro amora mogere kuom gima othono bedo mogak kamano, to soko kata dago ma pi gudore nosik ka ler, kata bed ni gima kamano olwarie.

³⁷Kapo ni achiel kuom gigo otho, molwar kuom kodhi mipidho, to kodhigo nosik ka ler,

³⁸to ka kodhigo osebudi e pi, to unukwane ka gima ogak.

³⁹Ka chiayo moro michmo otho, to ng’ato ang’ata momule nobed mogak nyaka odhiambo.

⁴⁰Ng’at mochame nyaka lwok lepe, to nosik kogak nyaka odhiambo. Kata ng’at moting’o chiayono bende nyaka lwok lepe, kendo nosik kogak nyaka odhiambo.

⁴¹Gik mamol duto gin gik makuero, omiyo kik chamgi:

⁴²Gin gik ma lak gi bund igi, kata ma wuotho gi tiende ang’wen, kata man gi tiende mathoth. Ok nuchamgi, nikech gin gik makuero mamiyo ji bedo mogak.

⁴³Kik uchidru gi gimoro amora ma lak e lowo. Kik uduwru kodgi, nono to ubedo joma ogak.

⁴⁴ An e Ruoth Nyasaye ma Nyasachu, omiyo nyaka opuodhru kendo ubed joma ler, nikech an aler. Kik uchidru gi gimoro mamol kata malak e lowo.

⁴⁵An e Ruoth Nyasaye mane ogolou e piny Misri mondo ubed Nyasachu. Omiyo nyaka obed maler nikech aler.

⁴⁶Mago e chike mag le gi winy kod gik moko duto modak e pi, kaachiel gi gik moko duto malak e lowo.

⁴⁷Chikego oket mondo opog gik makuero kod gik ma ok kuero, kendo opog gik mangima michamo kod mago ma ok cham.