Read luo Tim jo-Lawi 12 Bible Online

Tim jo-Lawi 12 - luo bible

Tim jo-Lawi 12

¹Ruoth Nyasaye nowacho ni Musa

²ni mondo onyis jo-Israel kama: Ka dhako omako ich mi onywolo nyathi ma wuowi, to enobed mogak kuom ndalo abiriyo, mana kaka obedo mogak ka en e due.

³ Chieng’ mar aboro to nyaka ter nyathi nyangu.

⁴Bang’ mano dhakono nyaka rit kuom ndalo piero adek gadek mondo rembe opuodhre. Kik omul gimoro mowal ni Ruoth Nyasaye, kata kik odonj Kama Ler nyaka ndalone mag puodhruok rum.

⁵To ka onywolo nyathi manyako, to nobed mogak kuom ndalo apar gang’wen, mano kaka obedo mogak ka en e due. Bang’ mano nyaka orit kuom ndalo piero auchiel gauchiel mondo rembe opuodhre.

⁶Ka kindene mar puodhruok kuom nyathi mawuowi kata manyako oserumo, to enokel nyaim mondo otimgo misango miwang’o pep, kaachiel gi nyathi akuru kata akuch odugla mondo otimgo misango mar golo richo, mi omi jadolo e dho Hemb Romo.

⁷Jadolo nochiwe e nyim Ruoth Nyasaye mondo opuodhgo dhakono, mi dhakono nodok maler kuom rembe mosechuer. Mano e chik momako dhako monywolo nyathi mawuowi kata manyako.

⁸ Ka dhakono odhier ma ok nyal yudo nyaim, to nokel akuch odugla ariyo, kata nyithi akuru ariyo. Achiel kuomgi notimgo misango miwang’o pep, to machielo notimgo misango mar golo richo. Jadolo notim misengnigo, ka opwodhogo dhakono, mi dhakono nodok maler.