Read luo Tim jo-Lawi 13 Bible Online

Tim jo-Lawi 13 - luo bible

Tim jo-Lawi 13

¹Ruoth Nyasaye nowacho ni Musa kod Harun niya,

²“Ka dend ng’ato obokore kata oluro kata olokore mamarmar, mi opar ni dipo kobedo dhoho, to nyaka ter ng’atno ir Harun jadolo kata ir achiel kuom yawuote.

³Jadolo norang kama litno, to ka oyudo ni yier man kanyo olokore rachar, kendo tuone nenore ni odonjo ei pien, to mano nyiso ni en dhoho. Ka oserange kamano, to nong’ad wach ni nga’tno ogak.

⁴To ka kama litno rachar, kendo ok nenre ni odonjo ei pien, to yier man kanyo bende ok olokore rachar to jadolo noket ng’at matuono kar kende kuom ndalo abiriyo.

⁵Jadolo nochak orange chieng’ mar abiriyo, kendo koyudo ni kama litno pod psiko kaka chon, kendo ok olandore, to nochak oket ng’atno kar kende kuom ndalo abiriyo mamoko.

⁶Chieng’ mar abiriyo jadolo nochak orange, kendo koyudo ni kama litno odok chien, kendo ok olandore, to mano nyiso ni en mana kama oroch, omiyo noland wach ni ng’atno ok ogak.

⁷To ka bang’ mano kama orochno ochako olandore e dend ng’atno, to nyaka odog ir jadolo.

⁸Jadolo nyaka chak range, kendo koyudo ni kama litno landore, to mano nyiso ni en tuo mar dhoho, omiyo nong’ad wach ni ng’atno ogak.

⁹Ka tuo machalo dhoho omako ng’ato, to nyaka tere ir jadolo,

¹⁰mi range. Ka nitie kido marachar kama litno, mi yier man kanyo olokore marachar, kendo kanyo onogo otimo adhola,

¹¹to mano nyiso ni en dhoho mosedak e del, omiyo jadolo nyaka ng’ad wach ni ng’atno ogak, kuom mano ok onego kete kar kende kuom ndalo abiriyogo, nikech ong’ere ni ng’atno ogak.

¹²To ka tuono nenore ni jadolo ka gima olandore motieko dend ng’atno duto,

¹³to jadolo nyaka range. Koyudo ni tuono olandore e dende duto adier, to nong’ad wach ni ng’atno ok ogak, nikech dende duto oselokore marachar, omiyo oler.

¹⁴To ka dende ochako dholore, to nokwane ka ng’ama ogak.

¹⁵Jadolo norang adhondeno, mi nong’ad wach ni ogak. Kama dholore nyaka kwan ka gima ok ler, nikech onyiso ni tuono en dhoho.

¹⁶To bende ka adholano ochango, molokore rachar, to ng’atno nyaka dog ir jadolo.

¹⁷Jadolo nyaka range, kendo koyudo ni adhondego oselokore rachar, to nyaka ong’ad wach ni ng’at matuono koro ok ogak, nikech adier oler.

¹⁸Ka bur omako ng’ato, mi ochango,

¹⁹to bang’e kanyono olokore rachar, kata obokore mamarmar, to ng’atno nyaka nyis jadolo kama litno.

²⁰Jadolo norange, kendo ka tuono nenore ni odonjo ei pien, kendo yier man kanyo olokore rachar, to mano nyiso ni dhoho otuch kama bur ne nitie, omiyo nyaka ong’ad wach ni ng’atno ogak.

²¹To ka jadolo orange, mi oyudo ni yier man kanyo ok olokore rachar, kendo tuono ok odonjo ei pien, to osedok chien, to nyaka oket ng’atno kar kende kuom ndalo abiriyo.

²²Bang’ mano, koyudo ni tuono olandore e dende kata mana matin, to mano nyiso ni en tuo mar dhoho, omiyo nyaka jadolo ng’ad wach ni ng’atno ok ler.

²³To ka kama obokoreno odong’ adong’a mana kaka ne en, kendo pok olandore, to kara en mana mbala mar bur, omiyo jadolo nyaka ng’ad wach ni ng’atno ler.

²⁴Ka mach owang’o dend ng’ato, to bang’e kanyo ochako dhe mamarmar kata marachar,

²⁵to jadolo nyaka rang kama litno. Ka oyudo yier man kanyo olokore rachar, kendo tuono nenore ni odonjo ei pien, to mano nyiso ni tuo mar dhoho otuch kama owang’no. Jadolo nong’ad wach ni ng’atno ogak, nimar tuono en dhoho.

²⁶To ka jadolo orange, moyudo ni yier marachar onge kanyono, kendo tuono ok odonjo ei pien, to odok chien, to nyaka oket ng’atno kar kende kuom ndalo abiriyo.

²⁷Chieng’ mar abiriyo jadolo nyaka ng’iye kendo, to ka oyudo ni tuo oselandore e dende, mano nyiso ni en dhoho, omiyo nyaka ong’ad wach ni ng’atno ogak.

²⁸To ka kama litno ok omedore, to odok chien, mano nyiso ni en mana kama owang’. Jadolo nyaka ng’ad wach ni ng’atno ok ogak, nikech en mana mbala mar mach.

²⁹Ka ng’at moro, ma dichwo kata ma dhako nigi adhola e wiye kata e tike,

³⁰to jadolo nyaka rang adholano. Ka oyudo ni tuono odonjo ei pien, kendo yier man kanyo olokore mamarmar, kendo okelore okelore to mano nyiso ni kit dhoho mawuok buk ema omako wich kata tik. Omiyo jadolo nyaka ng’ad wach ni ng’at matuono ogak.

³¹To ka jadolo orango kama litno, moneno ni ok odonjo ei pien, kendo onge yier moselokore mamarmar to nyaka oket ng’at matuono kar kende kuom ndalo abiriyo.

³²Nyaka orang kama litno chieng’ mar abiriyo, to koyudo ni kama otimo bukno ok olandore, kendo ni yier man kanyo ok olokore mamarmar, kendo ni kama litno ok odonjo ei pien,

³³to jatuo nyaka liel wiye kama buk nitieno, mi jadolo nokete kar kende kuom ndalo abiriyo.

³⁴Jadolo nochak orang kanyo chieng’ mar abiriyo, to ka oyudo ni kama otimo bukno ok olandore, kendo nenore ni ok odonjo ei pien, to nyaka ong’ad wach ni ng’atno ok ogak. Ng’atno nyaka lwok lepe, mi bed maler.

³⁵To bang’ mano, ka kama otimo bukno ochako olandore,

³⁶to jadolo nochak orange. Ka onwang’o ni oselandore adier, to ok onego odew ng’iyo ka yier oselokore mamarmar, nimar onge kiawa ni ng’atno ogak.

³⁷To ka kama otimo bukno osiko mana kaka chon, kendo yier marateng’ ochako twi kanyono, to mano nyiso ni osechango. Adier ng’atno koro ler, kendo jadolo nyaka ng’ad wach kamano.

³⁸Ka ng’at moro ma dichwo kata ma dhako nigi kuonde moko marachere e dende, to jadolo norange.

³⁹Ka oyudo ni kuondego rachere, kendo dok chien, to mano nyiso ni en mana kit dhoho moro maloko del marachar, omiyo ng’atno ok ogak.

⁴⁰Ka yie wi ng’atno oluny, modoko rabondo gi e dier wiye to mano ok mi odok mogak.

⁴¹Kata ka yie wiye oluny ka nyiem wang’e mano bende nyiso ni orabondo to ok ogak.

⁴²To ka adhola mamarmar omako bondono, to mano nyiso ni dhoho otuch kanyo.

⁴³Jadolo norange, kendo koyudo ni adhola olokore mamarmar, machalo gi dhoho matuch e del,

⁴⁴to mano nyiso ni ng’atno nigi tuo dhoho, kendo ogak. Omiyo jadolo nyaka wach kamano, nimar tuo mar dhoho omakoo wi ng’atno.

⁴⁵Ng’at man gi tuo mar dhoho norwak lewni moyiech, kendo wiye bende nowe mak ogolo. Noum dhoge gi yo ka malo, kendo noywag niya, “Abet mogak! Abet mogak!”

⁴⁶To kinde duto ma pod en gii dhoho, nyaka kwane ka ng’at mogak. Kuom mano enodag oko kar kende, ma ok odonj e kambi.

⁴⁷Ka law kata usi kata pien kata gimoro molos gi pien opur molokore makwar kata maratiglo, to nyaka tere ir jadolo mi range. Mano nyaka timre kata ka lawno olos gi yie rombo kata gi katana.

⁴⁸

⁴⁹

⁵⁰Jadolo norang gima opurno, eka nokete kar kende kuom ndalo abiriyo.

⁵¹To chieng’ mar abiriyo nochak orang gino, to ka kama opurno olandore, mano nyiso ni en gima ketho gik moko kaka dhoho ketho del.

⁵²Nyaka owang’ lawno, kata usino, bed ni en mar yie rombo kata mar katana, kata ka en gima olos gi pien, nikech gima landoreno en gima rach ka dhoho. Mano emomiyo nyaka wang’e gi mach.

⁵³To ka jadolo oneno ni kama opurno ok olandore e gino,

⁵⁴to enogol chik mondo olwok gino, eka nochak okete kar kende kuom ndalo abiriyo mamoko.

⁵⁵Bang’e jadolo nyaka chak range. Kata koyudo ni kama opurno ok olandore, to osiko mana kaka chon, mano pod nyiso ni ogak. Emomiyo nyaka wang’e gi mach, kata bed ni kama opurno nigi yo ka iye kata gi yo ka oko.

⁵⁶To ka jadolo orange moyudo ni kama opurno odok chien bang’ lwoko, to nong’ad kanyo oko, bed ni en kuom law kata kuom pien kata kuom usi.

⁵⁷To ka kama opurno ochako othinyore e lawno, kata e usino kata e gima olos gi pienno, to mano nyiso ni gima rachno landore e gino, omiyo nyaka wang’ gino gi mach.

⁵⁸To ka oneno ni kidono olal bang’ lwoko, to nyaka chak lwoke, eka gakne rum.

⁵⁹Mano e chik mar gima rach ka dhoho man kuom law molos gi yie rombo, kata mar katana, kata man kuom usi, kata kuom gima olos gi pien, mondo ong’e ka gima kamano ogak kata ok ogak.