Read luo Tim jo-Lawi 14 Bible Online

Tim jo-Lawi 14 - luo bible

Tim jo-Lawi 14

² Ma e chik mar ng’at mipwodho kuom tuo dhoho. Chieng’ mipwodhe to nyaka ter ir jadolo.

³Kuom mano jadolo nyaka wuog oko mar kambi mondo odhi orange. Ka oyudo ni ng’atno ochango kuom tuoneno,

⁴to nyaka ogol chik mondo okelni ng’at mipwodhono winy ariyo mangima michamo, kaachiel gi yiend sida gi usi makwar kod bad owino.

⁵Eka jadolo nogol chik mondo winyo achiel onegi e agulu moting’o pi aora.

⁶Bang’ mano nokaw winyo mangima gi yiend sida gi usi makwar kod owino, mi nolutgi e remb winyo mosenegno.

⁷Eka nokir remono nyadibiriyo kuom ng’at mipwodhone tuo dhoho. Bang’e nong’ad wach ni ng’atno ler, kendo nowe winyo mangima cha dhi e thim.

⁸Ng’at mipwodhono nolwok lepe, kendo noliel yie dende duto, mi nolwokre gi pi, eka nobed mopwodhore. Bang’ mano onyalo donjo e kambi, to ok nonind e hembe nyaka ndalo abiriyo rum.

⁹Chieng’ mar abiriyo nochak oliel yie wiye duto gi yie tike kod yie wang’e kaachiel gi yie dende mamoko duto. Bang’e nolwok lepe kendo nolwokre gi pi, eka nobed mopwodhore chuth.

¹⁰Chieng’ mar aboro nyaka okel imbe ariyo ma hikgi achiel achiel, kod rombo ma swini ma bende hike achiel. Jamnigo duto nyaka bed maonge songa. Bende nokel mogo moromo kilo apar moruw gi mo, mondo otimgo misango mar cham, kaachiel gi mo moromo nus lita.

¹¹Jadolo mapwodho ng’atno nokete kaachiel gi chiwone e nyim Ruoth Nyasaye e dho Hemb Romo.

¹²Bang’e jadolo nokaw im achiel gi morno, mondo otimgo misango mipwodhogo ketho mar gowi, kendo nochiwgi e nyim Ruoth Nyasaye mondo gibed mich moyiedhi.

¹³Imno nyaka yang’ ei Kama Ler miyang’oe jamni mitimogo misengni mag golo richo kod misengni miwang’o pep, nimar misango mipwodhogo ketho mar gowi dong’ni jadolo mana kaka misango mar golo richo. En gima ler moloyo.

¹⁴Jadolo nokaw remb misango mipwodhogo ketho mar gowi, mi nomien e dho it ng’at mipwodhono ma korachwich, kendo e lith lwete mathwon ma korachwich, kendo e lith tiende mathwon ma kotachwich.

¹⁵Bang’ mano jadolo nokaw mo, mi nool moko e tat lwete owuon ma koracham.

¹⁶Eka enolut lith lwete ma korachwich e mo man e tat lwete ma koracham, kendo nokir nyadibiriyo e nyim Ruoth Nyasaye.

¹⁷Bang’e nokaw mo moko modong’ e tat lwete, mi nowir e dho it ng’at mipwodhono ma korachwich, kendo e lith lwete ma korachwich, kendo e lith tiende mathwon ma korachwich, mana kuonde ma nomienie remb misango mipwodhogo ketho mar gowi.

¹⁸Modong’ e tat lwet jadolo, to nool ewi ng’at mipwodhono. Kamano jadolo nopwodhe e nyim Ruoth Nyasaye.

¹⁹Bang’e jadolo notim misango mar golo richo mondo opwodhgo ng’atno kar gakne.

²⁰Eka enowang’ chiayo mitimogo misango miwang’o pep, kendo nochiwe e kendo-mar-misango kaachiel gi misango mar cham. Kamano e kaka jadolo nopwodhe, kendo nodok maler.

²¹Kapo ni ng’atno jachan, ma ok nyal yudo gigo, to nokel nyaim mondo otimgo misango mipwodhogo ketho mar gowi. Imno nobed mich moyiedhi, kendo mitimogo misango mipwodhogo gakne. Kendo nokel mogo moromo kilo apar moruw gi mo mondo otimgo misango mar cham, kaachiel gi mo moromo nus lita,

²²kod akuch odugla ariyo kata nyithi akuru ariyo kaka onyalo yudo. Winyo achiel notimgo misango mar golo richo, to machielo notimgo misango miwang’o pep.

²³Chieng’ mar aboro nokel gigo ni jadolo e dho Henb Romo e nyim Ruoth Nyasaye mondo pwodhego.

²⁴Jadolo nokaw im mi bi timgo misango mipwodhogo ketho mar gowi, kaachiel gi morno, mi nochiwgi e nyim Ruoth Nyasaye ka mich moyiedhi.

²⁵Eka noneg imno, kendo nokaw rembe moko, mi nomien e dho it ng’at mipwodhono ma korachwich, kendo e lith lwete mathwon ma korachwich, kendo e lith lwete ma korachwich.

²⁶Bang’e jadolo nool mo moko e tat lwete owuon ma koracham,

²⁷kendo nokir mo moko nyadibiryo e nyim Ruoth Nyasaye gi lith lwete ma korachwich.

²⁸Eka nokaw mo moko modong’ e tat lwete, kendo nowir e dho it ng’at mipwodhono ma korachwich, kendo e lith lwete mathwon ma korachwich, kendo e lith tiende mathwon ma kotachwich, mana kuonde ma nomienie remb misango mipwodhogo ketho mar gowi.

²⁹Mo modong’ e tat lwet jadolo, to nool ewi ng’at mipwodhono mondo opuodhego.

³⁰Jadolono nokaw winyo achiel kuom winy mane ng’atno okelo, kata bed ni gin akuch odugla kata gin nyithi akuru,

³¹mi notimgo misango mar golo richo, to machielo notimgo misango miwang’o pep. To bende enotim misango mar cham. Kamano e kaka jadolo nopwodh ng’atno e nyim Ruoth Nyasaye.

³²Mano e chik moket ni ng’at modhier man gi tuo mar dhoho, kendo ma ok nyal yudo chiwo mitimogo misengni piwodhego.

³³Ruoth Nyasaye nowacho ni Musa gi Harun niya,

³⁴“Ka usedonjo e piny Kanaan ma abiro miyou mondo udagie, mi akelo gimoro marach momiyo kor ot moro opur,

³⁵to wuon odno nyaka dhi ir jadolo kendo nyise ni gima rach ni e ode.

³⁶Jadolo nyaka gol chik mondo gik moko duto manie odno ogol ka pok odhi range, nono to gigo duto obedo mogak. Bang’e jadolo nodonj e odno mondo orangi.

³⁷Ka onwang’o ni kuonde ma gigo nitie olokore ratiglo kata makwar, kendo nenore ni odonjo e kor ot,

³⁸to nyaka owuog oko e dhot, kendo olor odno kuom ndalo abiriyo.

³⁹Chieng’ mar abiriyo nyaka oduogi mi ochak orang ot, to koyudo ka gima rachno oselandore e kor ot,

⁴⁰to nyaka ogol chik mondo kite ma gino nitie ogol oko kendo owiti e tok dala kamoro ma ok ler.

⁴¹Bang’ mano nogol chik mondo ochwer kor odno duto gi yo ka iye, kendo gipuk lowo ma gichwero e tok dala kamoro ma ok ler.

⁴²Eka giniket kite manyien kuonde ma gisegoloe moko ka, mi gimwon ot gi lowo manyien.

⁴³To ka gino ochako owuok molandore, kosegol kite ka, kendo ochuer kor ot, mi ochak omwon,

⁴⁴to jadolo nyaka duog rang odno. Ka oyudo ni gino oselandore, to mano nyiso ni en gima rach ka dhoho. Kuom mano odno obedo mogak,

⁴⁵kendo nyaka muke, mi kitene gi yiende kod lope ter e tok dala, mi wit kamoro ma ok ler.

⁴⁶Ng’ato ang’ata mane oyudo odonjo e odno e kinde mane olore nobed mogak nyaka odiambo,

⁴⁷kendo ng’ato ang’ata ma osenindo e odno kata ochiemoe, nyaka lwok lepe.

⁴⁸To ka jadolo odhi morango odno kendo oyudo ni gino ok oselandore bang’ mwone, to nong’ad wach ni odno osepwodhi, nikech gima rachno orumo.

⁴⁹Jadolo nyaka kaw winy ariyo matindo kendo kaw yiend sida gi usi makwar kod owino opwodhgo ot, mondo odok maler.

⁵⁰Eka noneg winyo achiel e agulu moting’o pi aora,

⁵¹kendo nokaw yiend sida gi owino kod usi makwar kaachiel gi winyo mangima cha, mi nolutgi e remb winyo mosenegno, kendo e pi malerno, mi nokir nyadibiriyo kuom ot.

⁵²Kamano e kaka nopwodh ot, kokonyore gi remb winyo gi pi maler gi winyo mangima gi yiend sida kaachiel gi owino kod usi makwar.

⁵³Winyo mangima to nowe ring dhi e thim. Kosepwodho ot kamano, to ot nodok maler.

⁵⁴Mano e chik man kuom tuo dhoho kido mopogore opogore, kod tuo mawuok buk,

⁵⁵gi pur mamako nanga kata mamako ot

⁵⁶gi kuonde mobokore e del, kata moluro kata mamarmar.

⁵⁷Chikno nyiso kaka ipogo gik mogak kod gik ma ok ogak. En chik mar tuo dhoho gi mar gik mopur.