Read luo Tim jo-Lawi 18 Bible Online

Tim jo-Lawi 18 - luo bible

Tim jo-Lawi 18

¹Ruoth Nyasaye nowacho ni Musa

²ni mondo onyis jo-Israel kama: An e Ruoth Nyasaye ma Nyasachu.

³Kik utim timbe jo-Misri, mane udak e pinygi, kata kik utim timbe jo-Kanaan ma aterou e pinygi. Kik ulu chike jogo duto,

⁴to nyaka urit chikena, kendo uluw yorena. An e Ruoth Nyasaye,

⁵ omiyo nyaka urit chikena gi buchena, ma ka ng’ato orito, to yudo ngima. An e Ruoth Nyasaye.

⁶Kik ng’ato moro kuomu terre gi dhako moro ma watne. An e Ruoth Nyasaye.

⁷Kik ikuod wi wuoru kuom terruok gi meru. En meru, omiyo kik ikuod wiye.

⁸ Kik iterri gi chi wuoru, nikech kitimo kamano to ikuodo wi wuoru.

⁹ Kik iterri gi nyameru hie, kata gi nyameru ma ng’at machielo onywolo, bed ni onywole dala kata kamoro machielo.

¹⁰Kik iterri gi nyar wuodi kata gi nyar nyari, nikech kitimo kamano to ikuodo wiyi iwuon

¹¹Kik iterri gi nyameru ma ot machielo. En nyameru, omiyo kik ikuod wiye.

¹² Kik iterri gi wayu, nikech en gi wuoru gin remo achiel,

¹³kata kik iterri gi nyamin meru, nikech en gi meru bende gin remo achiel.

¹⁴Kik iterri gi chi owadgi wuoru, nikech kitimo kamano to ikuodo wi wuoruno.

¹⁵ Kik iterri gi chi wuodi, nikech kitimo kamano to ikuodo wiye.

¹⁶ Kik iterri gi chi owadu nikech kitimo kamano to ikuodo wi owaduno.

¹⁷ Kik iterri gi dhako moro to nyare bende iterorigo, kata kik ikaw nyar wuod dhakono kata nyar nyar dhakono mondo iterrigo, nimar dipo kiriwori gi rembi iwuon, to mano en richo maduong’.

¹⁸Kik ikaw nyamin chiegi mondo obed nyieke, mi iriwri kode ka nyamin pod ngima.

¹⁹ Kik iriwri gi dhako ka ni e due.

²⁰ Kik iterri gi chi wadu, mi omi idok mogak.

²¹ Kik ichiw nyathini moro ni nyasaye manono miluongo ni Molek, nikech kitimoo kamano to ikwedo nying Nyasachu. An e Ruoth Nyasaye.

²² Kik inind gi ng’ama dichwo kaka dinind gi ng’ama dhako nikech mano kwero.

²³ Kik iterri gi chiayo moro, mi omiyi ibed mogak. Dhako bende kik yie mondo chiayo moro oriwre kode. Mano en gima mono.

²⁴Kik udwanyru kutimo timbe ma kamago nikech timbego ema nomiyo ogendini ma abiro riembo mondo owenu thuologi odoko joma odwanyore.

²⁵Mano e kaka pinyno nodoko mogak, mi ne akume nikech richogo, omiyo nong’ogo joma odakie oko.

²⁶Un to nyaka urit chikena. Onge ng’ato kuomu ma notim timbe makuerogo, bed ni en ja-Israel kata jadak,

²⁷nono to pinyno ong’ogou oko kuom dwanye, mana kaka nong’ogo oganda mane okuongonu dakie. Oganda mane okuongonuno notimo timbe makuerogo, mi ne gimiyo pinyno odoko mogak.

²⁹Ng’ato ang’ata motimo achiel kuom timbe makuerogo nong’ad kare oko kuom ogandagi.

³⁰Emomiyo rituru chikna kendo kik uluw timbe makuero mane weg pinyno otimo kapok ubiro. Kamano ok nudok mogak. An e Ruoth Nyasaye ma Nyasachu.