Read luo Tim jo-Lawi 2 Bible Online

Tim jo-Lawi 2 - luo bible

Tim jo-Lawi 2

¹Ka ng’ato timo ni Ruoth Nyasaye misango mar cham, to nyaka ochiw mogo mayom, kendo ool mo kuome, mi omedie ubani.

²Eka nokele ni jodolo ma joka Harun, kendo jadolo achiel nojuk mogo sanja moruw gi mo, mi nowang’ kaachiel gi ubani duto ka rapar e kendo-mar-misango. Mano en misango miwang’o mondo tikne odum mang’ue ng’ar ni Ruoth Nyasaye.

³To mogo gi mo modong’ kuom chiwono nobed mar Harun gi yawuote. En gima ler moloyo, nimar ogole kuom misango miwang’o ni Ruoth Nyasaye.

⁴Ka ichiwo gima otedi mondo otimgo misango mar cham, to nyaka obed makati matindotindo ma ok ketie thowi, molos gi mogo mayom modwal gi mo, kata chapat ma ok ketie thowi, mowir gi mo.

⁵To ka en gima ochiel e tawo, to nyaka obed mar mogo mayom moruw gi mo, to ok oketie thowi.

⁶Nyaka ging’inge madundedunde, kendo olie mo. Mano en misango mar cham.

⁷Ka ichiwo gima otedi e sufuria mondo otimgo misango mar cham, to nyaka obed mar mogo mayom modwal gi mo.

⁸Kel ni Ruoth Nyasaye misango molos kamano, kendo imiye jadolo, mi jadolo notere e kendo-mar-misango.

⁹Enopog moko mondo owang’ e kendo-mar-misango ka rapar. En misango miwang’o mondo tikne odum mang’ue ng’ar ni Ruoth Nyasaye.

¹⁰To gima odong’ kuom chiwono nobed mar Harun gi yawuote. En gima ler moloyo, nikech ogole kuom misango miwang’o ni Ruoth Nyasaye.

¹¹Misengni duto mag cham muchiwo ni Ruoth Nyasaye nyaka bed ma ok oketie thowi. Bende kutimo ni Ruoth Nyasaye misango miwang’o, to kik thowi kata mor kich bedie.

¹²To gigo unyalo chiwo ni Ruoth Nyasaye ka misango mar chamb agwela, to kik wang’gi e kendo-mar-misango kaka iwang’o misango madum tik mang’ue ng’ar.

¹³Misengni duto mag cham mutimo nyaka ketie chumbi majiwo singruok mane utimo gi Nyasaye. Kamano chumbi nyaka keti e misengni duto mutimo.

¹⁴Ka utimo ni Nyasaye misango mar cham gi cham mokwongo nyak, to nyaka uchiw cham manyien molodi kendo moyoki.

¹⁵Nyaka uolie mo, kendo uketie ubani. Mano en misango mar cham.

¹⁶Jadolo nokaw cham moko moruw gi mo, mi nowang’ kaachiel gi ubani duto ka rapar. En misango miwang’o ni Ruoth Nyasaye.