Read luo Tim jo-Lawi 21 Bible Online

Tim jo-Lawi 21 - luo bible

Tim jo-Lawi 21

¹Ruoth Nyasaye nowacho ni Musa ni mondo onyis jodolo ma joka Harun ni kik jadolo moro amora tim gimoro ni ringre jadhoodgi moro motho, ma dimi obed mogak,

²mak mana ka ng’atno watne hie, kaka min kata wuon, kata wuode kata nyare, kata owadgi,

³kata nyamin mare hie ma nyako ngili ma pok okendi.

⁴To ka nyamin mareno osekendi, to kik otimne gimoro ma dimi obed mogak.

⁵ Jodolo kik liel yie wigi atuota, ka ginyisogo ni giywak, kata kik gitit yie tikgi, kata kik gisar dendgi.

⁶Nyaka gibed joma owal ni Nyasachgi, kendo kik gicha nying Nyasachgi, nikech gin ema gitimo misengni miwang’o ni Ruoth Nyasaye. Misengnigo gin chiemb Nyasachgi, emomiyo nyaka gibed maler.

⁷Jadolo kik kend ohodho kata nyaka maonge gi ringre kata dhako ma chwore oriembo, nimar en ng’at maler mowal ni Nyasache.

⁸Unuwale ni Ruoth Nyasaye, nikech en e jachiw chiemo ni Nyasachu. Nyaka ukwane ka ng’ama ler nikech an Ruoth Nyasaye ma apuodho jodolo, aler.

⁹Ka nyar jadolo odwanyore modoko ohodho, omiyo wuon mare bedo mogak. Nyaka wang’ nyakono gi mach mi tho.

¹⁰Jadolo maduong’ e kind owetene ma en jadolo moseol mo e wiye, mi owal mondo orwak lep dolo, kik we wiye koyuothore, kata kik yiech lawe, konyisogo gi iye owang’.

¹¹Ok nodonj kama ng’at motho nitie ma dimi obed mogak, bed ni en wuon kata min.

¹²Kik owuog oa Kama Ler, nikech dipo ka omiyo Kama Ler mar Nyasache obedo mogak, nimar osewale gi mor wir mar Nyasache. An e Ruoth Nyasaye.

¹³Jadolo maduong’ nyaka kend nyako ngili.

¹⁴Ok nokend nyako ma chwore otho, kata ma chwore oriembo, kata ma onge gi ringre, kata ma ohodho,

¹⁵To nyaka okend mana nyako ngili moa e dhoodgi, mondo kik nyithinde bed mogak kuom kiko remb jo Lawi kata remb jomoko nono, nikech an e Ruoth Nyasaye mapwodho jadolo maduong’.

¹⁶Ruoth Nyasaye nowacho ni Musa

¹⁷ni mondo onyis Harun niya, “Kuom tiengeu duto onge ng’at mong’ol ma nobi mondo ochiw chiemo ni Nyasache.

¹⁸Ng’ato ang’ata ma rang’ol kik sud machiegni, bed ni en muofu kata en puth kata ka dende kamoro okethore, kata ka gimoro otwi e dende,

¹⁹kata ka tiende kata ka bade ong’ol,

²⁰Kata ka thur wiye obiro, kata ka orachiero, kata ka wang’e dhuth, kata ka en gi aput kata adhola machuer, kata ka en buoch.

²¹Nyakwar Harun moro amora ma rang’ol ok nosud machiegni mondo otim ni Ruoth Nyasaye misango miwang’o.

²²Kaka orang’ol kamano, kik osud machiegni mondo ochiw chiemo ni Nyasache. Onyalo chamo chiemb Nyasache, bed ni ogol chiemo kuom gik maler kata kuom gik maler moloyo.

²³To kik osud machiegni gi Pasia kata gi kendo-mar-misango, nikech dipo ka omiyo kuondena maler obedo mogak ni mar orang’ol. An e Ruoth Nyasaye mapwodhogi.”

²⁴Kamano e kaka Musa nowuoyo gi Harun kaachioel gi yawuote kod jo-Israel duto.