Read luo Tim jo-Lawi 22 Bible Online

Tim jo-Lawi 22 - luo bible

Tim jo-Lawi 22

¹Ruoth Nyasaye nowacho ni Musa niya,

²“Nyis Harun gi yawuote ni nyaka giritre ahinya ka gitiyo gi mich maler ma jo-Israel chiwona, nono to gichayo nyinga maler. An e Ruoth Nyasaye.

³Wachnigi ni, ka ng’ato moro mogak osudo machiegni gi chiwo maler ma jo-Israel walo ni Ruoth Nyasaye, to nang’ad kare oko e nyima. Mano en chik momakou nyaka chieng’. An e Ruoth Nyasaye.

⁴Nyakwar Harun moro amora man gi tuo mar dhoho, kata man gi nyach machuer, kik cham chiwo maler ka pok opwodhe. Koro magi e joma obedo mogak: Ng’at momulo gimoro mosegere kuom gima otho, kata ng’at ma nyote owuok,

⁵kata ng’at momulo gimoro mamol, kata ng’at momulo ng’at mogak.

⁶Ng’ato ang’ata momulo achiel kuom gik makamago nobed mogak nyaka chieng’ podhi, kendo ok nocham chiwo malergo ka pok olwokore.

⁷Ka chieng’ osepodho to nobed maler, eka bang’ mano onyalo chamo chiwo malergo, nikech gin chiembe.

⁸Kik ocham gima otho athoya kende, kata chiayo ma ondiek onego, nikech kotimo kamano to obedo mogak. An e Ruoth Nyasaye.

⁹Jodolo nyaka rit chikna, nono to gidoko joketho, mi githo kuom chayo nyinga. An e Ruoth Nyasaye mapwodhogi.

¹⁰“Ng’ato ang’ata ma ok jadolo kik cham chiwo maler, kata en wendo molimo jadolo, kata en mana jatichne mondiki.

¹¹To misumba ma jadolo ong’iewo nyalo chamo chiwogo, kendo wasumbni monywol e dalane nyalo chamo chiemben.

¹²Ka ng’at ma ok jadolo okendo nyar jadolo, to nyakono ok nocham mich moyiedhi mogol kuom chiwo maler.

¹³To ka chwore otho, kata ka chwore oriembe kendo oonge gi nyathi, mi oduogo dak e dalagi, to onyalo chamo chiemb wuon mare. To ng’ama ok jadolo kik cham chiemono.

¹⁴“Ka ng’ato ochamo gimoro maler mochiw ni Ruoth nyasaye kokia, to enochul jadolo gino komedoe achiel kuom abich.

¹⁵Jadolo kik keth chiwo maler ma jo-Israel walo ni Ruoth Nyasaye

¹⁶ka giyie ni joma ok jodolo chamogi, ma dimi jogo bed joketho kendo yud kum, nikech an e Ruoth Nyasaye mapwodho gigo.”

¹⁷Ruoth Nyasaye nowacho ni Musa,

¹⁸ni mondo onyis Harun kod yawuote, kaachiel gi jo-Israel duto niya, “Ka ja-Israel moro amora kata japiny moro modak kuomu okelo chiwo mondo ochopgo kuong’ruok kata kaka chiwo mokelo kuom herone owuon, mi ochiwe ni Ruoth Nyasaye ka misango miwang’o pep mondo Ruoth Nyasaye oyie kode,

¹⁹to nyaka ochiw chiayo maonge songa, bed ni en rwath kata rombo kata diel.

²⁰ Kik uchiw chiayo man gi songa nimar Ruoth Nyasaye ok nyal yie kode.

²¹Ka ng’ato otimo misango mar chiwo gi dhiang’ kata gi rombo mondo ochopgo kuong’ruok, kata kaka chiwo ma okelo kuom herone owuon, to nyaka obed chiayo malong’o maonge songa eka Ruoth Nyasaye noyie kode.

²²Kik uchiw ni Ruoth Nyasaye chiayo moro ma muofu kata ma rang’ol kata man gi songa kata kalanga, kata man gi aluny kata bur. Kik uket chiayo ma kamano e kendo-mar-misango mondo obed misango miwang’o ni Ruoth Nyasaye.

²³Rwath kata rombo magana unyalo timogo misango ma ng’ato chiwo, to ok noyie kode kuom timo misango michopogo kuong’ruok.

²⁴Chiayo ma mendene otore kata ogol kata opuodi kik chiw ni Ruoth Nyasaye. Tim ma kamano okwer e pinyu.

²⁵Bende kik uyie kawo chiayo makamano kuom japiny moro mondo ochiw ni Nyasachu ka chiembe. Ka ging’ol kamano to gin gi songa mosiko, omiyo ok digimi Ruoth Nyasaye yie kodu.”

²⁶Ruoth Nyasaye owacho ni Musa niya, “Ka onywol nyaroya kata nyarombo kata nyadiel,

²⁷to ok onego poge gi min nyaka ndalo abiriyo rum. Kochiwe ni Ruoth Nyasaye ka misango miwang’o chakre chieng’ mar aboro ka dhi nyime, to noyie kode.

²⁸Kik uneg dhiang’ gi nyathine, kata rombo gi nyathine odiechieng’ achiel.

²⁹Ka uchiwo ni Ruoth Nyasaye misango mar erokamano, to chiweuru kaka chik dwaro, mondo Ruoth Nyasaye oyie kodu.

³⁰Nyaka chame duto chieng’no, kendo gimoro kik dong’ nyaka chop okinyi. An e Ruoth Nyasaye.

³¹“Nyaka urit chikena kendo uluwgi. An e Ruoth Nyasaye.

³²Kik ucha nyinga maler. Jo-Israel nyaka mi nyinga maler duong’. An e Ruoth Nyasaye mapwodhou,

³³kendo mane ogolou e piny Misri mondo obed Nyasachu. An e Ruoth Nyasaye.”