Read luo Tim jo-Lawi 24 Bible Online

Tim jo-Lawi 24 - luo bible

Tim jo-Lawi 24

¹Ruoth Nyasaye nowacho ni Musa niya,

²“Chik jo-Israel mondo okelni mor zeituni maler mondo ool e taya, mondo taya oliel pile, oko mar pasia mageng’o sandug rapar e Hemb Romo.

³Harun nyaka rit taya mondo osik ka liel pile e nyim Ruoth Nyasaye, chakre odhiambo nyaka okinyi. Mano en chik momakou gi nyikwau nyaka chieng’.

⁴Pile Harun nyaka rit teyni man kuom rachung taya maler mar dhahabu mochung’ e nyim Ruoth Nyasaye.”

⁵ “Nyaka ukaw mogo, mi utedgo makati apar gariyo, ma moro ka moro oted gi mogo moromo kilo abiriyo.

⁶Nyaka uchan-gi e laini ariyo e mesa maler mochung’ e nyim Ruothh Nyasaye, auchiel e laini ka laini.

⁷Unuket ubani maler e laini ka laini, mondo obed rapar mar makati michiwo ni Ruoth Nyasaye ka misango miwang’o.

⁸Chieng’ sabato ka chieng’ sabato Harun nochan makatigo e nyim Ruoth Nyasaye. Gin mich ma jo-Israel osingore ni nochiw nyaka chieng’.

⁹ Makatigo nodong’ ni Harun gi nyikwaye, kendo ginichamgi kamoro moyang ni Ruoth Nyasaye, nikech en mich maler moloyo. En pok migolone nyaka chieng’ kuom misengni miwang’o ni Ruoth Nyasaye.”

¹⁰Ne nitie ng’at moro e kambi jo-Israel ma min mare ne nyar Israel, to wuon mare ne ja-Misri. Nying min mare ne Shelomith, nyar Dibri ma ja-Dan. Jalo nodhi modhaw gi ja-Israel moro.

¹¹Nokwong’e koyanyo nying maler mar Ruoth Nyasaye, omiyo ne gikele ir Musa.

¹²Ne gikete e od tuech, ka girito gima Ruoth Nyasaye biro nyisogi.

¹³Ruoth Nyasaye nowacho ni Musa niya,

¹⁴“Gol ng’at moseyanyono oa e kambi, mondo ji duto mane owinje koyenyo oket lwetgi e wiye. Bang’e jo-Israel duto ogoye gi kite nyaka otho.

¹⁵Nyaka iwach ni jo-Israel ni ng’ato ang’ata moyanyo Nyasache noyud kum kuom kethone.

¹⁶Ng’at moyanyo nying Ruoth Nyasaye nyaka negi. Oganda jo-Israel nyaka goye gi kite motho. Bed ni en jadak kata ja-Israel ema ohulo nying malerno nyaka nege.

¹⁷ “Ka ng’ato ogoyo wadgi monego, to en bende nyaka nege.

¹⁸Ka ng’ato ogoyo chiayo motho, to nyaka ochul chiayo kar chiayono.

¹⁹Ka ng’ato ohinyo wadgi momiyo songa, to notimne mana kaka osetimono:

²⁰ Lero kar lero, wang’ kar wang’, kendo lak kar lak. Nyaka hiny ng’atno mana kaka osehinyo wadgi.

²¹“Ng’at mogoyo chiayo monego, nyaka chul chiayo,

²² to ng’at mogoyo wadgi monego, en bende nonege. Nyaka kum jadak mana kaka ikumo ja-Israel, nimar an e Ruoth Nyasaye ma Nyasachu.”

²³Ka ne Musa osewacho ni jo-Israel kamano, ne gigolo ng’at ma ne oyenyono oa e kambi, mi gigoye gi kite nyaka otho. Ne gitimo mana kaka Ruoth Nyasaye nochiko Musa.