Read luo Tim jo-Lawi 25 Bible Online

Tim jo-Lawi 25 - luo bible

Tim jo-Lawi 25

¹ Ruoth Nyasaye nowacho ni Musa e got Sinai

²mondo onyis jo-Israel niya, “Ka usechopo e piny ma abiro miyou, to pinyno nyaka rit sabato, kimiyogo Ruoth Nyasaye duong’.

³Kuom mano higni auchiel unyalo chuoyo puotheu, kendo loso yiendu mag mzabibu, kendo kayo chambu gi pono olembeu.

⁴To higa mar abiriyo en sabato maler mimiyogo Ruoth Nyasaye duong’, ma piny nyaka yueye. E higano, kik uchwo puotheu, kata kik ulos yiendu mag mzabibu.

⁵Kik uka orowe, kendo kik upon mzabibu manyak kendgi e yien mane ok ulosogo, nikech en higa maler ma piny yueyoe.

⁶To kata kamano, gik ma piny ochiego e hik sabato nobed chiembu, kendo chiemb wasumbu machwo gi mamon, gi mar jotichu kod wendu,

⁷kendo mar jambu gi le mae pinyu. Gik moko duto ma piny ochiego nobed chiembu.

⁸“Nyaka ukwann sabato abiriyo mag higni ma en higni abiriyo nyadibiriyo, tiende ni higni piero ang’wen gochiko.

⁹Due apar, due mar abiriyo e higano, ma en chieng’ pwodhruok, unugo tung’ e pinyu duto.

¹⁰Kamano unuwal higa mar piero abich, kugoyo milome mondo obed higa miweyoe jopinyu duto thuolo. Higano nobed higa mar mor, ma ng’ato ka ng’ato nodogie pinygi ir joodgi.

¹¹Higa mar piero abichno nobednu higa mar mor. Kik uchuoye kata kik ukae orowe, kendo kik uponie mzabibu monyak anyaka e yien mane ok uloso,

¹²ni mar en higa mar mor, ma nyaka uwal maler ni Ruoth Nyasaye. Unucham gik monyak e lowo.

¹³“E higa mar mor nogono, ng’ato ka ng’ato kuomu nodog thurgi.

¹⁴Ka ng’ato ng’iewo lop wadgi, to kik ng’ato wuond wadgi.

¹⁵Nyaka kwan higni, chakre higa mar mor mokadho, kendo nengo noket maromre gi higni ma pod ibiro keyoe.

¹⁶Ka hignigo ng’eny to nochul nengo mamalo, to ka ginok, nochul nengo mapiny, nikech cham mibiro kayoe ema ong’iewo.

¹⁷Kik ng’ato kuomu wuond wadgi, to mondo uluor Nyasachu, nikech an e Ruoth Nyasaye ma Nyasachu.

¹⁸“Rituru chikena, kendo uluwgi, eka unudag e pinyno gi kue.

¹⁹Lowo nochieg cham, mi unuchiem muyieng’, kendo unudag gi kue.

²⁰Kapo ni upenjo gima ubiro chamo e higa mar abiriyo ka ok uchuoyo, kata ka ok ukeyo,

²¹to nadwoku kama: Abiro guedhou e higa mar auchiel, mi piny nochieg cham moromou chamo kuom higni adek.

²²Kuchuoyo e higa mar aboro, to noyud ka pod uchamo cham machon. Unubed kuchamo cham machon nyaka chop uka cham manyien mar higa mar ochiko.

²³“Ka ng’ato ong’iewo lowo kuom wadgi, to lowono ok nobed mare nyaka chieng’, nikech an e wuon lowo, to un un mana jodakna.

²⁴E pinyu duto unuyie mondo puodho ma noseng’iew owar.

²⁵“Ka wadu moro odoko modhier, mi ong’iewo lope moro, to watne machiegni nyaka war lowono.

²⁶To ka ng’atno onge gi watne manyalo waro lowono, to en owuon onyalo ware koyudo pesa.

²⁷Enokwan higni, chakre higa ma nong’iewe mi nochul ng’at ma nong’ieweno pesa moromo higni modong’ nyaka higa mar mor chopi. Eka nokaw lope odok mare kendo.

²⁸To ka ok onyal ware, to lowono nodog e lwet ng’at ma ne ong’iewe cha nyaka chop higa mar mor. To e higa mar mor, lowono nowe odog ni wuon, mi wuon-go nokawe.

²⁹“Ka ng’ato oyie, mi wadgi ong’iewo ode mar dak manie dala mochiel gi ohinga, to onyalo ware mana ka higa achiel pok orumo nyaka ne ng’iewe. Higano duto enobed gi thuolo mar ware,

³⁰to ka ok oware ka higa pok orumo, to odno nosik kobedo mar ng’at mane ong’iewe, kaachiel gi nyikwaye nyaka chieng’. Ok noweye odog ni wuon e higa mar mor.

³¹To udi manie mier ma ok ochiel gi ohinga nokwan mana kaka ikwano lowo. Gin gik ma inyalo waro, kendo e higa mar mor ginidog ni wegi.

³²Jo-Lawi to nobed gi thuolo mochwere mar waro udi manie miechgi.

³³Ka ja-Lawi moro ok yowaro ode manie dalagi, to odno nyaka dogne e higa mar mor, nimar udi manie miech jo-Lawi e mwandugi e piny Israel.

³⁴To puothe molworo miechgi ok nyal ng’iew, nikech gin mwandugi nyaka chieng’.

³⁵ “Ka ja-Israel wadu odoko modhier ma ok onyal konyore, to nyaka okonye mana kaka unyalo konyo japiny moro kata wendo, kendo nodag kodu.

³⁶Kuhole gimoro, to kik ukaw kuome ohala, to luoruru Nyasachu, kendo uyie owadu odag kodu.

³⁷ Kik uhole pesa mondo uyudie ohala. Kata kik ukaw ohala kuom chiemo muhole.

³⁸An e Ruoth Nyasaye ma Nyasachu mane ogolou e piny Misri mondo omiu piny Kanaan, kendo mondo obed Nyasachu.

³⁹ “Ka wadu odoko modhier, kendo obiro iri, mi ing’iewe, to kik ikete mondo otini ka misumba.

⁴⁰To mondo obedi kaka jatich michulo, kendo kaka wendo modak kodi. Enotini nyaka chop higa mar mor,

⁴¹eka nowe tiyoni, mi nodog gi nyithinde kuom joodgi kendo e lop kwerene.

⁴²Jo-Israel gin wasumbni maga mane agolo e piny Misri, emomiyo ok onego ng’iewgi kaka ing’iewo wasumbni.

⁴³Kik isand ja-Israel waduno to nyaka iluor Nyasachu.

⁴⁴“Kudwaro wasumbni machwo kata mamon, to unyalo ng’iewogi kuom ogendini mokiewo kodu.

⁴⁵To bende unyalo ng’iewo nyithind jodak man kuomu, kod joodgi monywol e piny, mi ginibed mwandu,

⁴⁶kendo unyalo weyogi ni yawuotu kusetho. Unyalo loko jogo wasumbu nyaka chieng’, to jo-Israel weteu kik usand.

⁴⁷“Ka ja piny moro modak kuomu odoko jamoko, to wadu moro odoko modhier, mi odhi ir ng’atno kata ir jaodgi moro mi ong’iewe,

⁴⁸to thuolo nitie mar ware. Owadgi moro nyalo ware,

⁴⁹kata owadgi wuon mare, kata wuod wuon kata watne moro amora. To bende onyalo warore owuon, koyudo pesa.

⁵⁰Enogo nengo gi jal mane ong’ieweno, ka gikwano higni chakre higa mane ong’iewe nyaka chop higa mar mor. Pesa monego dwok ni ng’at ma nong’ieweno nyaka bed maromre gi misara ma dine ng’atno ondikogo jatich kuom higni ma ng’atno osetiyonego.

⁵¹Enoware gi pesa maromre gi higni modong’ to chop higa mar mor. Ka hignigo ng’eny, to enochul pesa mang’eny,

⁵²to ka ginok, to nochul pesa matin.

⁵³Nyaka rit ng’atno machal gi jatich mondiki, bende kik uyie mondo ng’at mane ong’ieweno osande.

⁵⁴Ka ng’atno ok owar e kinde modong’ ka pok higa mar mor ochopo, to nyaka weye odhi kaachiel gi nyithinde e higa mar mor,

⁵⁵nikech jo-Israel gin wasumbini maga. Gin maga ma nagolo e piny Misri. An e Ruoth Nyasaye ma Nyasachu.