Read luo Tim jo-Lawi 26 Bible Online

Tim jo-Lawi 26 - luo bible

Tim jo-Lawi 26

¹ “Kik ulos kido mar nyasaye ma nono, kendo kik uchung kido mopa kata siro milamo. Kidi moro amora mopa kik bed e pinyu mukulorune kulamo, nikech an e Ruoth Nyasaye ma Nyasachu.

²Nyaka urit sabatona, kendo uluor Kama Ler mara. An e Ruoth Nyasaye.

³ “Ka uwuotho e yorena, mi urito chikena, kendo uluwogi,

⁴to anakelnu koth e kinde mowinjore, mi pinyu nochieg cham kendo yiendu nonyag olembe.

⁵Unudin cham nyaka e kinde miponoe mzabibu, kendo unupon mzabibu nyaka kinde michwoyoe. Unuyud chiemo moromou, kendo unudag e pinyu gi kue.

⁶“Anakel kue e pinyu, mi ununind maonge luoro. Anatiek ondiegi e pinyu, kendo lweny ok nomi pinyu kethre.

⁷Unuriemb wasiku, kendo ununeggi.

⁸Jou abich nobed gi teko mar riembo ji mia achiel, kendo jou mia achiel nobed gi teko mar riembo ji gana apar, mi unutiek wasiku.

⁹“Anabed ka aguedhou, mi anami unyuol kendo unya mathoth, kendo anachop singruok duto ma natimo kodu.

¹⁰Chambu machon ma nie dereu noromu chamo nyaka chop kinde ma uwitogie, mondo uyud kama ukanoe cham manyien.

¹¹Analos kar dakna kuomu, kendo ok najuang’u.

¹² Anawuoth e dieru koni gi koni, mi nabed Nyasachu, kendo unubed joga.

¹³An e Ruoth Nyasaye ma Nyasachu ma nogolou e piny Misri mondo uwe bedo wasumb jo-Misri. Aseturo lodi ma ne otuenu, mi omiyo koro uwuotho tir.

¹⁴ “To ka utamoru winja, kendo ok urito chikenago duto,

¹⁵mi udagi buchena, kendo ok uluwo yorena, mi uketho singruok ma ne atimo kodu,

¹⁶to ng’euru malong’o ni anatimnu kama: Anapou gi masira kendo gi tho marach kod tuo mayuyo wang’, kendo ma miyo del dhi. Chambu muchwoyo ok nokonyu, nimar wasiku ema nochamgi.

¹⁷Anabed mosin kodu, mi wasiku nonegu. Unubed e bwo loch joma mon kodu, kendo unubwogru gi ng’wech kata ka onge joma lawou.

¹⁸“Ka pod utamoru winja bang’ gigo duto, to anamed kumou nyadibiriyo kuom richou.

¹⁹Anaketh sunga mar wich teko ma un go. Anami polo malo rieny ka chuma, kendo piny mwalo dok matek ka mula.

²⁰Unuketh tekreu nono kuchwoyo, nimar chambu ok nochiegi, kata mana yiendu bende ok nonyag olembe.

²¹“Ka pod upiem koda, mutamoru winja, to nakelnu masiche nyadibiriyo marom gi richou.

²²Anaor ondiegi mondo omak nyithindu, mi ginineg jambu kendo ginimi udong’ manok, bende wang’yore duto muluwo notho.

²³“Ka gigo duto ok omiyo uduogo ira, to usiko ka upiem koda,

²⁴an bende napiem kodu, kendo namiu kum nyadibiriyo nikech richou.

²⁵Anakel lweny kuomu mondo achulgo kuor kuom ketho singruok ma ne atimo kodu, kendo kata kuchokoru e miechu to anagou gi tuoche kendo wasiku nomaku.

²⁶Anami chiembu doko manok, mi agulu achiel norom mon apar tedoe. Ginipimnu chiemo mana e rapim, kendo kata kuchiemo, to ok unuyieng’ ngang.

²⁷“To ka bang’ mago duto, pod udagi winja, kendo usiko kupiem koda,

²⁸to an bende nasik kapiem kodu gi mirimba mager, mi nakumu nyadibiriyo nikech richou.

²⁹Kar chamo ring’o, to unucham mana yawuotu gi nyiu.

³⁰Anaketh kuonde hembko mau, kendo anamuk kendeu mag ubani. Anadhur ringreu motop mag nyisecheu manono, kendo najwang’u.

³¹Analok miechu gundni, mi anaketh kuondeu mag lemo, kendo ok anayie ng’weyo tik misengni mau madum mamit.

³²Anaketh pinyu, mi wasiku mobiro dakie nohum nono.

³³Anakeu e kind ogendini, kendo nakel lweny kuomu mi pinyu nodong’ gunda, kendo miechu nokethre chuth.

³⁴E kinde duto ma pinyu odong’ gunda, kendo udak e piny wasiku, pinyu nonind mak opur mondo ochul sabato ma ne ok urito.

³⁵Ka pinyu odong’ gunda kamano, enonind mak opure, korito sabato ma ne ok oyueyoe kudak kuno.

³⁶Jou modong’ ka ngima e piny wasikgi anago gi kihondko, mi kata mana ka giwinjo ka yamo kwadho it oboke, to giniringi ka joma wasigu lawo, kendo kata obedo ni onge ng’ama lawogi to ginipodh piny,

³⁷kendo ginituomre kendgi giwegi mana ka joma ichadho gi ligangla. Unubed maonge gi teko mar siro wasiku.

³⁸Karu nolal nono e kind ogendini, kendo piny wasiku nonang’u.

³⁹Jou modong’’ ka ngima e pinje mag wasiku nobed ka dendgi dhi adhiya nikech richogi, kendo nikech richo mag kweregi, mana kaka notimore ni kweregi.

⁴⁰“Bang’e ginihul richogi gi richo kweregi ma ne omiyo giweya, kaachiel gi richo mane omiyo gidoko wasika.

⁴¹An to nabed mamon kodgi, kendo natergi e piny wasikgi. Bang’e chunygi ma ok oyie timo kaka adwaro nobolre, kendo giniyud kum kuom richogi.

⁴² Eka anapar singruok ma ne atimo gi Jakobo kendo gi Isaka kod Ibrahim, kendo napar pinyu.

⁴³Piny nodong’ gunda ka joma odakie oseaye, kendo nonind ma ok opure mondo ochul sabato duto ma ne ok oyueyoe. Giniyud kum kuom richogi nimar ne gichayo chikena, kendo gidagi luwogi.

⁴⁴“Kata kamano, ka gin e piny wasikgi, to ok nawitgi, kendo ok najwang’gi kata tiekogi chuth, mi aketh singruok mane atimo kodgi, nimar an e Ruoth Nyasaye ma Nyasachgi.

⁴⁵Aherogi, omiyo anapar singruok mane atimo gi kweregi, ma ne agolo e piny Misri ka ogendini neno, mondo an Ruoth Nyasaye abed Nyasachgi.”

⁴⁶Mago e chike gi buche ma ne Ruoth Nyasaye omiyo Musa e got Sinai mondo jo-Israel oluw.