Read luo Tim jo-Lawi 4 Bible Online

Tim jo-Lawi 4 - luo bible

Tim jo-Lawi 4

¹Ruoth Nyasaye nowacho ni Musa niya:

²Nyis jo-Israel ni magi e chike ma omako ng’ato ang’ata ma oboth, mi oketho chikna moro amora mi otimo gimoro ma chikgo okwero:

³Ka jadolo maduong’ oketho, mi okelo chola kuom jo-Isarel, to nyaka ochiw ni Ruoth Nyasaye nyarwath maonge songa mondo otimgo misango mar golo richo, kopwodhogo ketho ma osetimono.

⁴Enokel nyarwadhno e dho Hemb Romo e nyim Ruoth Nyasaye, mi noket lwete e wiye, kendo noyang’e kanyo.

⁵Eka nokaw rembe moko, mi okel ei Hemb Romo.

⁶Enolut lith lwete e remono, kendo nokir nyadibiriyo e nyim pasia maler e nyim Ruoth Nyasaye.

⁷Bang’ mano, jadolono nomien remo moko e tunge kendo mar misango miwang’oe ubani e nyim Ruoth Nyasaye ei Hemb Romo, to nopuk remo duto modong’ e tiend kendo-mar-misango miwang’o pep manie dho Hemb Romo.

⁸To boche duto mogol kuom nyarwadhno nyaka ket tenge. Gin boche mag jambich,

⁹kod nyiroke, kaachiel gi bocho mogawogi man e bath oguro, kod jwala mabor man ewi chuny gi nyiroke.

¹⁰Mago noket tenge mana kaka iketo boche mogol kuom boche mitimogo misengni mag sawo. Jadolo nyaka wang’ bochego e kendo-mar-misango miwang’o pep.

¹¹To pien nyarwadhno gi ringe duto, kaachiel gi wiye kod tiendene gi jambiye kod owuoche,

¹²ma tiende ni nyarwadhno duto, noting’ kendo noter oko mar kambi kama owe ni puko buch kendo-mar-misango, mi nowang’e kanyo te e mach mar yien e pidh buruno.

¹³Ka oganda Israel duto odoko joketho kakia, mi gitimo gimoro ma chik Ruoth Nyasaye okwero, mi wachno ok ong’ere,

¹⁴to achien ofwenyore, to nyaka gichiw nyarwath mondo otimgo misango mar golo richo, mi gikele e nyim Hemb Romo.

¹⁵Eka jodong oganda noket lwetgi ewi nyarwadhno e nyim Ruoth Nyasaye, kendo noyang’e kanyo.

¹⁶Jadolo maduong’ nokaw remo moko kendo nokel ei Hemb Romo.

¹⁷Eka nolut lith lwete e remono kendo nokir nyadibiriyo e nyim pasia maler e nyim Ruoth Nyasaye.

¹⁸Bang’ mano nomien remo moko e tunge kendo-mar-misango man e nyim Ruoth Nyasaye ei Hemb Romo, kendo nopuk remo duto modong’ e tiend kendo-mar-misango miwang’o pep man e dho hemb romo.

¹⁹Eka nokaw boche duto mag nyarwadhno, mi nowang’gi e kendo-mar-misango.

²⁰Nowang’ nyarwadhno mana kaka iwang’o rwath mitimogo misango mar golo richo. Kamano e kaka jadolo nopwodhnigi kethogi, mi nowenigi.

²¹Enogol nyarwadhno oko mar kambi, kendo nowang’e mana kaka nowang’ rwath machielo cha. Mano en misango mar golo richo ni oganda.

²²Ka jatelo moro oketho chik moro amora mar Ruoth Nyasaye ma Nyasache kakia, mi odoko jaketho,

²³to bang’e onyise ni oseketho chik, nyaka ochiw nywok maonge songa mondo otimgo misango.

²⁴Enoket lwete ewi chiayono, kendo noyang’e e nyim Ruoth Nyasaye kama iyang’oe chiayo mitimogo misango miwang’o pep. En misango mar golo richo.

²⁵Eka jadolo nogwel remb chiayono gi lith lwete, mi nomien e tunge kendo-mar-misango miwang’o pep. To remo duto modong’ nyaka puk e tiend kendono.

²⁶Enowang’ boche duto e kendo-mar-misango mana kaka iwang’o boche mag misengni mag sawo. Kamano e kaka jadolo nopwodh ketho ng’ato mi nowene.

²⁷ Ka ng’ato ang’ata oketho chik moro amora mar Ruoth Nyasaye ma Nyasache kokia, mi odoko jaketho,,

²⁸to bang’e onyise ni oseketho chik, to nyaka okel diel maonge songa mondo otimgo misango maonge songa mondo otimgo mosango mar golo richo, kopwodhogo ketho mosetimono.

²⁹Enoket lwete ewi chiayono, kendo noyang’e e nyim Ruoth Nyasaye kama iyang’oe jamni mitimogo misengni miwang’o pep.

³⁰Eka jadolo nogwel remo gi lith lwete, mi nomien e tunge kendo-mar-misango miwang’o pep. To remo duto nyaka puki e tiend kendono.

³¹Enogol bochene duto mana kaka igolo boche mag jamni mitimogo misengni mag sawo, mi jadolo nowang’gi e kendo-mar-misango mondo odum mamit ni Ruoth Nyasaye. Kamano e kaka jadolo nopwodh ketho ng’atno, mi nowene.

³²Ka ng’ato ochiwo rombo mondo otimgo misango mar golo richo, to nyaka obed rombo ma nyaburi maonge songa.

³³Enoket lwete e wiye, kendo noyang’e mondo otimgo misango mar golo richo, kama iyang’oe jamni mitimogo misengni miwang’o pep.

³⁴Eka jadolo nogwel remo gi lith lwete, mi nomien e tunge kendo mar misango miwang’o pep. To remo duto nopuk e tiend kendono.

³⁵Enogol boche duto, mana kaka igolo boche mag rombe mitimogo misengni mag sawo. Eka nowang’ bochego ewi misengni miwang’o ni Ruoth Nyasaye, kopwodhogo ketho ma ng’atno osetimo, mi nowene.