Read luo Tim jo-Lawi 6 Bible Online

Tim jo-Lawi 6 - luo bible

Tim jo-Lawi 6

¹ Ruoth Nyasaye nowacho ni Musa niya:

²Ka ng’ato oketho, motimo gima rach e nyim Ruoth Nyasaye, mokuong’ore gi miriambo, kowuondo wadgi kuom gima nomiye mondo okan, kata kuom gima osingne, kata kuom gima osekwalo, kata kosechamo malang’

³kata kokwanyo gimoro to oriamboe,

⁴odoko jaketho. Omiyo nyaka ochul gima osekwalo kata mosechamo malang’, kata ma nomiye mondo okan, kata mane olal to okwanyo,

⁵kata gimoro amora mane okuong’oree gi miriambo, to enochul gino pep, chieng’ mochiwoe misango mipwodhogo ketho mar gowi, komedoe achiel kuom abich mar nengo gino.

⁶Bende enokel ni Ruoth Nyasaye im maonge songa ma nengone opim ni oromo timogo misango mipwodhogo ketho mar gowi.

⁷Jadolo notimnego misango mipwodhogo ketho mar gowi, mi nowene kuom gimoro amora ma notimo, mosemiyo obedo jagowi.

⁸Ruoth Nyasaye nowacho ni Musa niya,

⁹“Koro nyis Harun gi yawuote ni chik mar misango miwang’o pep ema: Misango miwang’o pep nyaka bed e kendo mar misango otieno duto nyaka okinyi, to bende mach nyaka sik ka liel kanyo.

¹⁰Bang’e jadolo norwak law katana maber, kod sirwari mondo ogeng’go duge. Eka nogol buch misango ma mach osewang’o e kendo-mar-misango, mi noket e bath kendono.

¹¹Bang’e nolok lepe moko, eka nogol buru e kambi, mi oter oko kama oyangi.

¹²Mach nosik ka liel e kendo mar misango ma ok otho. Okinyi kokinyi, jadolo nyaka ketie yien mondo oliel, eka ochanie misango miwang’o pep, kendo owang’ie boche mag misengni mag sawo.

¹³Mach nyaka sik ka liel e kendo mar misango ma ok otho ngang’.

¹⁴To ma e chik mar misango mar cham: Joka Harun nochiwe e nyim Ruoth Nyasaye e dho kendo-mar-misango.

¹⁵Achiel kuom jodolo nojuk mogo sanja moruw gi mo, kaachiel gi ubani duto moketie. Enowang’ sanja mojukono ka rapar e kendo-mar-misango mondo odum mang’ue ng’ar ni Ruoth Nyasaye.

¹⁶To modong’, Harun gi yawuote nocham, maonge thowi, e laru mar Hemb Romo, ma en kama oyang ni Ruoth Nyasaye.

¹⁷Mogono asemiyo joka Harun ka migapgi kuom misengni motimna kiwang’o gi mach. En gima ler moloyo mana ka misango mar golo richo kendo ka misango mipwodhogo ketho mar gowi.

¹⁸Joka Harun duto machwo nyalo chame ka migapgi kuom misengni mowang’ ni Ruoth Nyasaye. Mano en chik mochwere kuom tiengeu duto. Gimoro amora mogerer kuom misengnigo nodok mowal ni Ruoth Nyasaye.

¹⁹Ruoth Nyasaye nowacho ni Musa niya,

²⁰“Mich ma Harun gi yawuote nochiw ni Ruoth Nyasaye chieng’ mowire nobed mogo moromo kilo ang’wen, ma en misango mar cham mapile. Nus mogono nochiw gokinyi, to nus machielo nochiw godhiambo.

²¹Notede gi mo e tawo, eka inikele ka oseruwore maber, mi inichiwe kong’injore matindotindo mondo otimgo misango mar cham madum mamit ni Ruoth Nyasaye.

²²Nyakwar Harun ka nyakwar Harun mobedo jadolo maduong’ ema nochiwe. Mano en chik mochwere nyaka chieng’. Nowang’e ni Ruoth Nyasaye ka misango miwang’o pep.

²³Misengni duto mag cham ma jodolo chiwo nyaka wang’ pep. Kik chamgi kata matin.”

²⁴Ruoth Nyasaye nowacho ni Musa niya,

²⁵“Nyis Harun gi yawuote ni chik mar misango mar golo richo ema: Chiach misango mar golo richo nyaka yang’ kama iyang’oe jamni mitimogo misengni miwang’o pep. En gima ler moloyo.

²⁶Jadolo motimo misangono ema nochame e laru mar Hemb Romo ma en kama oyang ni Ruoth Nyasaye.

²⁷Gimoro amora mogere kuom misangono nobed mowal ni Ruoth Nyasaye. Ka remb misangono okirore e nanga, to nyaka lwoke kama oyang ni Ruoth Nyasaye.

²⁸Agulu motedie ring misango mar golo richo nyaka negi. To ka aguch mula ema otedee, to nyaka rudhe kendo lawe gi pi.

²⁹Ng’ato ang’ata ma dichwo ma jaodgi jadolo nyalo chamo misangono. En gima ler moloyo.

³⁰Ka remb chiayo motimgo misango mar golo richo okel e Hemb Romo mondo opwodhgo richo e Kama Ler, to misangono ok nocham, to nowang’e mana gi mach.