Read luo Jeremia 1 Bible Online

Jeremia 1 - luo bible

Jeremia 1

¹Kitabuni oting’o weche kod timbe mag Jeremia wuod Hilkia. Ne en achiel kuom jodolo modak Anathoth e piny Benjamin.

² Wach Ruoth Nyasaye nobirone e higa mar apar gadek mar loch Josia wuod Amon, ruodh Juda,

³ kendo e ndalo loch Jehoyakim wuod Josia, nyaka due mar abich mar higa mar apar gachiel mar loch Zedekia wuod Josia, kane odar jo-Jerusalem, moter e tuech.

⁴An Jeremia, Ruoth Nyasaye nowachona niya,

⁵“Kane pok achueyi e ich, ne oyudo aseyieri, kendo kane pok onywoli, ne asewali mondo iti tichna, mi aketi janabi ni ogendini.”

⁶Eka nadwoke niya, “A Ruoth Nyasaye, ok ang’eyo wuoyo, nikech pod atin.”

⁷To Ruoth Nyasaye nowachona niya, “Kik iwachi ni pod itin, to dhiyo adhiya ir ji duto ma aori kuomgi, mondo iwachnigi gik moko duto ma anyisi.

⁸Kik iluorgi, nikech abiro bet kodi, kendi riti. An Ruoth Nyasaye ema awacho kamano!”

⁹Bang’e Ruoth Nyasaye notero lwete, momulo dhoga, kowachona niya, “Eri, aketo wechena e dhogi.

¹⁰Kawuono amiyi teko kuom ogendini, kendo kuom ruodhi, mondo ipudhi kendo igo piny, mondo imuki kendo ikethi, to bende mondo iger kendo ipidhi.”

¹¹Ruoth Nyasaye nopenja niya, “Jeremia, ineno ang’o?” Nadwoke ni, “Aneno bad yath machako loth.”

¹²Eka Ruoth Nyasaye nowachona niya, “Iwacho kare. An bende achako chopo wachna!”

¹³Bang’e nochako openja niya, “En ang’o kendo mineno?” Ne adwoke niya, “Aneno agulu kayienyo yo nyandwat, kendo ochiegni pukore yo koni.”

¹⁴Ruoth Nyasaye nowachona niya, “Masira biro yienyo koa yo nyandwat, mi chop kuom ji duto modak e pinyni.

¹⁵Aluongo ogendini duto man yo nyandwat mondo obi. Ruodhi maggi bende nobi, kendo norenj kombegi mag loch e dhorangeye Jerusalem, kendo e alwora mar ohinga Jerusalem, kendo e alwora mag mier moko duto mag Juda.

¹⁶Mano e kaka abiro kumo joma oseketho, moweya kendo owang’o misengni ni nyiseche mamoko, ka gilamo gik ma giloso giwegi.

¹⁷Emomiyo tim atima chir Jeremia, kendo dhi iwachnigi gik moko duto ma asenyisi. Kik iwe gimiyi luoro, nono to abiro miyo ibed maluor moloyo e nyimgi.

¹⁸Ji duto manie pinyni, kaka ruodhi mag Juda, gi jodongo gi jodolo kod ji mamoko duto, biro bedo mamon kodi. To kawuono amiyi teko mondo isirgi. Ibiro chalo gi dala mochiel motegno, kendo gi siro mar chuma, kendo gi ohinga mar mula.

¹⁹Ok giniloyi, nikech abiro bet kodi kendo riti. An Ruoth Nyasaye ema awacho kamano.”