Read luo Jeremia 13 Bible Online

Jeremia 13 - luo bible

Jeremia 13

¹Ruoth Nyasaye nowachona mondo adhi ang’iew law, atue e nungona, to kik abude e pi.

²Omiyo ne ang’iewo lawno kaka Ruoth Nyasaye ne ochika, mi arwako.

³Bang’e Ruoth Nyasaye nowuoyo koda kendo, mowachona niya,

⁴“Dhiyo e aora Yufrate, ilony law mirwakono mondo ipandi e bur lwanda.”

⁵Omiyo ne adhi mi apande but aora Yufrate kaka ne Ruoth Nyasaye ochika.

⁶Bang’ kinde moko, Ruoth Nyasaye nowachona mondo adogi Yufrate aom lawno.

⁷Kuom mano nadok Yufrate, mi arango kama ne apandoe lawno, ne ayude, mi anwang’o ka okethore, ma onge tich.

⁸Ruoth Nyasaye nochako owuoyo koda, ka wachona niya,

⁹“Mano e kaka abiro ketho sunga mar jo-Juda kaachiel gi sunga marach mar jo-Jerusalem.

¹⁰Oganda marachni osetamore winjo wachna, mi gisebedo joma wigi tek, kendo ma timbegi richo. Giselamo nyiseche mamoko, kendo gitiyonigi. Kuom mano gibiro chalo mana gi law ma koro onge tichni.

¹¹Kaka law atueya mako nungo ng’at morwake matek, e kaka nadwaro ni mondo jo-Isarel gi jo-Juda omaka matek, mondo gibed joga, kendo gikel pak kod duong’ ni nyinga. To kata kamano ne gitamore luora.”

¹²“In Jeremia, nyis jo-Isarel ni an Ruoth Nyasaye ma Nyasachgi awacho kama: ‘Agulini mag divai onego opong’ gi divai.’ To gibiro dwoki ni, ‘Wang’eyo maber ni agulini mag divai onego opong’ gi divai.’

¹³Eka ichak iwachnigi ni an Ruoth Nyasaye abiro miyo jopinyni madho divai nyaka mer. Koda ka ruodhi ma nyikwa Daudi gi jodolo gi jonabi kod jo-Jerusalem duto biro mer.

¹⁴Bang’e anarwadgi duto, wuone gi nyithindo machalre. Ok nakechgi kendo ok nawegi, bende ok nang’wonnigi ngang’, to naneggi duto.”

¹⁵“Un jo-Israel, winjuru! Ruoth Nyasaye ema wuoyo, omiyo kik usungru, mi utamru winje.

¹⁶Miuru Ruoth Nyasaye ma Nyasachu duong’, ka pok okelo mudho, mi uchwanyoru e gode gotieno, kendo kapok oloko ler mugenono mudho mandiwa.

¹⁷Ka utamoru winjo siemnni, to anaywagu gi chunya nikech sungau. Anaywagu malit, mi pi wang’a nochuer nyaka wang’a owre, nikech odar jo-Ruoth Nyasaye, kitero e tuech.”

¹⁸Ruoth Nyasaye nowacho ni Jeremia niya, “Dhiyo inyis ruoth gi min mare mondo joa e kombegi mag duong’ nikech osimbegi mag loch osea e wigi molwar piny.

¹⁹Oselwor miech piny milambo, kendo onge ng’ama nyalo resogi. Osedar jo-Juda mi oter e tuech.”

²⁰Un jo-Jerusalem, neyeuru! Wasiku biro, koa malo yo nyandwat. Ere oganda mane chalonu gi kweth maber, mane omiu mondo uriti?

²¹Unuwach ni ji ang’o ka joma yande uparo ni osiepeu ema koro oket e wiu ka jotendu? Ubiro bedo gi rem mana ka dhako ma muoch kayo!

²²To eka upenjo gimomiyo gima kama osetimorenu, kendo gimomiyo oseyiech lepu kuomu, mi odwanyu, to ubiro yudo ni mano otimore nikech richou lich.

²³Bende ja-Nubi nyalo loko kit dende? Koso kwach dilok kite marabok dok kido moro nono? Kapo ni gigo nyalo timore, to kara un bende mutimo gik maricho unyalo timo gik mabeyo!

²⁴Ruoth Nyasaye biro keyou ka mihudhi ma yamo mager moa e thim keyo.

²⁵Ruoth Nyasaye osewacho ni mano e gima biro timorenu. Osechano mondo otimnu kamano nikech useweye, mi ugeno mana kuom nyiseche manono.

²⁶Ruoth Nyasaye owuon ema noyiech lepu kuomu, mi dugu nonen.

²⁷Ruoth Nyasaye oseneno kaka utimo gik ma omon-go. Ulawo nyiseche manono e gode kendo e pewe, mana ka ng’at ma gombo chi wadgi, kendo ka faras ma dichwo ma lawo madhako! Un jo-Jerusalem urumo! Unuben maler karang’o?