Read luo Jeremia 14 Bible Online

Jeremia 14 - luo bible

Jeremia 14

¹Ruoth Nyasaye nowuoyo gi Jeremia kuom oro mane omako piny niya,

²“Jo-Juda ywak kendo miechgi kethore. Jogi oriere piny kokuyo, kendo jo-Jerusalem ywak mondo okonygi.

³Jodongo oro jotichgi mondo oumbnigi, to ka gichopo e sokni, to ok giyud pi, omiyo giduogo gi dapige nono. Giumo wigi nikech gidhier nono, kendo gikia gima ginyalo timo.

⁴Chuny jopur lit, nikech koth onge, kendo piny otwo, omiyo giumo wigi.

⁵Mwanda bende nywolo nyathi, to oweyo mana kanyo nikech lum onge.

⁶Kenje mag thim chung’ ewi gode, kendo gamo yueyo mana ka bwe. Wengegi wingni nikech lum onge.

⁷“Joga ywakna niya, ‘A Ruoth Nyasaye, kata ka richowa nyiso ni wan joketho, to yie ikonywa kaka isesingori. Adier, waseweyi ndalo mang’eny, kwaketho e nyimi.

⁸To in kendi ema jo-Israel ogeno kuomi, nimar in ema iresowa ka wanie chandruok. Ere gima omiyo ichalo wendo e pinywa ma bworo kuom otieno achiel kende?

⁹Ere gima omiyo ichalo gi ng’at mobwok kata ka jalweny ma onge gi teko ma dokonygo ng’ato? Adier, in Ruoth Nyasaye in kodwa, kendo wan jogi, omiyo kik iwitwa.’ ”

¹⁰Ruoth Nyasaye wuoyo kuom jogi niya, “Gihero ringo weya kamano, kendo gibayo kamoro amora ma gihero. Kuom mano, ok amor kodgi, to aparo richo ma gisetimo, kendo abiro kumogi nikech richogigo.”

¹¹Ruoth Nyasaye nowachona niya, “Kik ikwaya mondo akony jogi.

¹²Kata ka gitueyo chiemo, to ok nawinj ywakgi, kendo kata ka gichiwona misengni miwang’o pep, gi mag erokamano, to ok nabed mamor kodgi. Abiro miyo githo e lweny, kendo kech gi tuo biro negogi.”

¹³An to ne adwoke ni, “A Ruoth Nyasaye, donge ing’eyo ni jonabi wacho ni ji niya, ‘Kech kata lweny biro bedo maonge, nimar nisingori ni kue kende ema nobed e pinywa’?”

¹⁴To Ruoth Nyasaye nowachona niya, “Jonabigo koro weche mag miriambo e nyinga. An ne ok aorogi, kendo ne ok amiyogi chik, bende ne ok awuoyo kodgi. Gik ma giwachonugo gin fweny ma ok owuok kuoma, to gikoro mana weche manono ma giparo apara.

¹⁵An Ruoth Nyasaye anyisi gima abiro timo ni jonabi mane ok aorogo. Giwuoyo gi nyinga ka giwacho ni lweny kod kech ok bi mako pinyni, to adier, kech gi lweny ema abiro negogigo.

¹⁶Joma ne giwachonigi gigo bende lweny gi kech biro nego. Ringregi kaachiel gi mag mondgi kod nyithindgi nowiti e yore mag Jerusalem, ma onge ng’ama noyiki, nikech abiro kumogi kuom timbegi maricho.

¹⁷“In Jeremia, wach ni ji kama: ‘Pi wang’a mondo omol odiechieng’ gotieno! Onego kik awe ywak nimar joga osego matek, mi ohinyore malit.

¹⁸Ka awuok oko e pap, to aneno ringre joma onegi e lweny, to ka adonjo e dala moro, to aneno joma kech nego. Jonabi gi jodolo dhi nyime gi tijegi, to chutho ok ging’eyo gima gitimo.’ ”

¹⁹“A Ruoth Nyasaye iseweyo jo-Juda chuth koso? Adier, ichayo jo-Sayun? Ere gimomiyo isehinyowa malit kamano, ma ok wanyal chango? Ne wageno ni wabiro yudo gik mabeyo, to onge gima ber mane wayudo. Ne waparo ni ibiro changowa, to masira malit ema nopoyowa.

²⁰A Ruoth Nyasaye, wahulo richowa kaachiel gi richo kwerewa. Adier, waseketho e nyimi.

²¹Kik ijwang’wa, nikech dipo ka nyingi okethore. Bende kik iyie jomoko cha Jerusalem, kama kom duong’ni nitie. Rit singruok mane itimo kodwa, kendo kik ikethe.

²²Bende nyiseche manono mag ogendini nyalo kelo koth adier? Koso polo giwegi nigi teko mar miyo koth chue? Ooyo, in ema waketo chunywa kuomi, A Ruoth Nyasaye ma Nyasachwa, nikech in kende ema inyalo timo gik ma kamago.”