Read luo Jeremia 15 Bible Online

Jeremia 15 - luo bible

Jeremia 15

¹ Ruoth Nyasaye nowachona niya, “Kata da bed ni Musa gi Samuel ema jochung’ e nyima ka, to ok anyal weyo ni jogi richogi. Wachnigi mondo gia e wang’a.

² To ka gipenjo ni gidhi kanye, to nyisgi ni Ruoth Nyasaye owacho kama: Jomoko kuomu tuo biro nego, kendo mano e kuma gibiro dhiye. To moko biro tho e lweny, kendo kuno ema gibiro dhiye! Bende moko kech biro nego, mi kuno ema gibiro dhiye! To moko ibiro tero e tuech, kendo kuno ema gibiro dhiye!

³“An Ruoth Nyasaye asechano ni masiche ang’wen biro makogi. Ibiro neggi mi guogi biro kidho ringregi. Winy nochamgi kendo ondiegi nocham ringregi modong’.

⁴ Abiro miyo ogendini duto mag piny bwog konenogi, nikech gik maricho mane Manase wuod Hezekia otimo Jerusalem kane en ruodh Juda.

⁵“Ere ng’ama biro kechou, un jo-Jerusalem? Koso ng’ama biro ywagou? En ng’a ma biro chung’ mondo omosu?

⁶Ne uweya, kendo udagi wachna, omiyo ne abiro, mi atiekou, nikech ne ok anyal geng’o mirimba kendo.

⁷Ne akeyou e mier duto, mana ka mihudhi ma yamo keyo. Un joga ne atiekou, mi anego nyithindu, nikech ne udagi weyo timbeu maricho.

⁸Ne anego chwo mang’eny, mi ubedo gi mond liete mathoth ka kuoyo mae dhonam ne anego yawuotu godiechieng’, mi akelo ne minegi kuyo.

⁹Dhako man gi yawuowi abiriyo opodho piny ka muche orumo, nikech yawuotego duto osenegi. Piny othone mudho ka wiye okuot, kendo chunye chandore. Abiro miyo wasigu neg jou ma pod odong’ ka ngima. An Ruoth Nyasaye ema awacho kamano.”

¹⁰Jeremia noywagore niya, “Yaye! Hapa rach! Ere gima omiyo ne mama onywola, nimar ji duto osiko ka dhaw adhawa koda? Pok aholo ng’ato pesana, bende pok aholo pesa kuom ng’ato, to kata kamano, ji duto kuong’a.

¹¹A Ruoth Nyasaye, kapo ni ok asetiyoni maber, kata ka ok asekwayi mondo ikech wasika ka chandruok omako to kuong’ duto ma gikuong’ago mondo omaka.

¹²Onge ng’ama nyalo turo chuma, to moloyo chuma monywas gi mula, moa e piny ma yo nyandwat.”

¹³Ruoth Nyasaye nodwoka niya, “Abiro kelo wasigu oyak mwandu joga, mondo akumgi kuom richo ma gisetimo e pinygi duto.

¹⁴Abiro miyo giti ni wasikgi e piny ma ok ging’eyo, nikech mirimba chalo mach, kendo biro liel nyaka chieng’.”

¹⁵Jeremia nodwoke niya, “Ruoth Nyasaye, in ing’eyo weche duto, omiyo para kendo ikonya. Chul kuor ni joma sanda. Kik iwegi, nono to ginega. Ng’e ni giyanya nikech in.

¹⁶Ne iwuoyo koda, mi awinjo wecheni duto. A Ruoth Nyasaye Manyalo Gik Moko Duto, an ng’ati, omiyo wecheni opong’o chunya gi mor kod ilo.

¹⁷Ne ok abet e kanyakla mar joma mor, bende ne ok aneno ber, to ne an mana kenda, ka apong’ gi siwuori, nikech tich mane imiya.

¹⁸Ere gima omiyo asiko ka an gi rem malit? Ang’o momiyo adhondena ok nyal chango? Koso idwaro bedona ka aora ma duono ndalo oro?”

¹⁹To Ruoth Nyasaye nodwoka niya, “Ka iduogo ira, to abiro rwaki, mi inichak ibed jatichna, ka iwacho weche makare, ma ok weche manono, to inichak ibed janabina. Ji biro biro iri, to ok inidhi irgi.

²⁰Abiro loki motegno ka ohinga mar chuma, mondo eka isir jogo. Gibiro kedo kodi, to ok giniloyi, nikech abiro bet kodi mondo ariti.

²¹Abiro resi kuom joma timbegi richo, kendo abiro konyi kuom jomahundu. An Ruoth Nyasaye ema awacho kamano.”