Read luo Jeremia 17 Bible Online

Jeremia 17 - luo bible

Jeremia 17

¹Ruoth Nyasaye wacho niya, “Un jo-Juda, richou ondik gi kalamb chuma, kendo ogorgi gi gima bith e chunyu, kendo e tunge kendeu mag liswa.

²Yawuotu paro kende-mag-liswa kod sirni milamo mane ochung’ e tiend yien duto motimo tiep, kendo e pidhe

³kod gode duto manie pewe. Abiro miyo wasiku yak mwanduu duto, nikech richo ma usetimo kuonde duto e pinyu.

⁴Ubiro a e piny mane amiyou, kendo abiro miyo utiyo ni wasiku e piny ma ok ung’eyo, nimar mirimba chal gi machh, kendo biro liel nyaka chieng’.”

⁵Ruoth Nyasaye wacho niya, “Okuong’ ng’at ma baro weya, to geno mana kuom dhano, ka parone bor koda.

⁶Ochalo kudho manie thim, madongo e piny motwo, mana e lowo motimo chumbi, ma onge gima odongoe maber. Onge gima ber ma ng’atno nyalo yudo.

⁷To oguedh ng’at ma ogena kendo oyie kuoma,

⁸ nimar ochalo gi yath mopidh but aora, matero tiendene kochomo pi. Onge gima thage, kata ndalo oro, ma chieng’ rienyie mager, nikech pote osiko ka ng’ich ang’icha. Ok odew kata ka koth ok chue, to osiko konyago anyaga olemo.

⁹“Ere ng’ama nyalo ng’eyo gima chuny dhano paro? Onge gima jamriambo kaka chuny dhano. En gi tuoche mang’eny ma ok nyal chango.

¹⁰ An Ruoth Nyasaye amanyo paro mar dhano, kendo apimo rieko mag ji. Atimo ni ng’ato ka ng’ato mana kaka ochalo, kendo mana ka luwore gi timbene.

¹¹Ng’ato ma yudo pesa e yor miriambo chalo gi winyo matoyo tong’ mane ok otoko. Gibiro lalne kapok obet ng’at moti, kendo bang’e nolokre mana ng’at mofuwo.”

¹²Hekalu marwa chal gi kom duong’ mang’ongo, mogur ewi got mabor nyaka ne piny chakre.

¹³Ruoth Nyasaye ema jo-Israel ogeno kuome, omiyo ji duto moweye noyud wichkuot. Ginilal nono mana ka nying mondik e buru, nikech giseweyo Ruoth Nyasaye ma en soko mar pi maliw.

¹⁴Jeremia nokwayo niya, “A Ruoth Nyasaye, changa mondo adok mangima. Resa mondo ayud kue. In ema apaki.

¹⁵Ji penja ni, ‘Ere masiche mane Ruoth Nyasaye obwogowago? Wadwaro mondo okelgi sani!’

¹⁶To Ruoth Nyasaye, bende ne akwayi mondo ikelnigi masira? In Ruoth Nyasaye ing’eyo ni ne ok agomb mondo giyud thagruok, kendo in ing’eyo gima asewacho.

¹⁷Kik ilokrina masira, nimar in e kara mar resruok ka masira oyuda.

¹⁸Kel wichkuot kuom joma sanda, to an mondo iweya, kendo kelnigi kihondko, to an kik ibwoga. Kelnigi masira, kendo kethgi chuth.”

¹⁹Ruoth Nyasaye nowachona niya, “Jeremia, dhiyo mondo ichung’ e dhorangach miluongo ni Ranga Ji, kama ruodhi mag Juda donjogo kendo wuokgo Jerusalem. Bang’e idhi e dhorangeye mamoko mag dala.

²⁰Nyis ruodhi kod jo-Juda duto, kaachiel gi ji duto modak Jerusalem maluwo dhorangeyegi mondo ochik itgi owinj gima awacho.

²¹ Nyisgi ni ka ok gidwar tho, to kik giting’ misike chieng’ Sabato. Bende kik giting’ gimoro ka gikadhogo e dhorangeye mag Jerusalem chieng’no.

²² Kata mana ting’o gik moko ka gigolo e utgi kik giting’. Nyaka girit chieng’ Sabato obed maler, kaka ne achiko kweregi, kendo kik giti tich moro chieng’no.

²³To kweregi ne ok odewo winjo wachna, kendo wigi ne odoko matek, mi gidagi luora, kata obedo ni asekumogi kamano.

²⁴“Nyisgi ni nyaka giluora gi chunygi duto. Kik giting’ misigo moro amora ka gikadho e dhorangeye mag dalani chieng’ Sabato, to girit chieng’ Sabato obed maler, mak gitiyo tich moro.

²⁵Kamano eka ruodhi maggi gi jodonggi didonj e dhorangeye mag Jerusalem, kendo bed gi duong’ mane ruoth Daudi nigo. Gin kaachiel gi jo-Juda kod jo-Jerusalem giniidh geche gi farese, kendo ji nodag Jerusalem nyaka chieng’.

²⁶Ji nobi koa e miech Juda kod mier mokiewo gi Jerusalem. Bende ji moa e piny Benjamin nobi kaachiel gi joma odak e tiend gode, gi ewi gode, kod e piny Negeb. Ginikel misengni miwang’o pep gi misengni mag cham kod ubani, kaachiel gi misengni mag erokamano gi misengni mamoko e Hekalu mara.

²⁷To ka ok giluora, mi gitamore rito chieng’ Sabato obed maler, kendo giting’o misigo moro amora ka gikadho e dhorangeye mag Jerusalem chieng’no, to anamok mach e dhorangeye mag Jerusalem, mi majno nowang’ ut ruodhi mag Jerusalem, kendo onge ng’ama nonege.”