Read luo Jeremia 19 Bible Online

Jeremia 19 - luo bible

Jeremia 19

¹Ruoth Nyasaye nonyisa mondo adhi ang’iew agulu. Bende nonyisa mondo akaw jodongo moko kod jodolo madongo,

² adhigo e holo mar Ben-hinom, mokiewo gi dhorangach miluongo ni Ranga Tegni. Kuno ema ne adhi huloe wach mane obiro miya.

³Ruoth Nyasaye nokona mondo awach niya, “Winjuru un ruodhi mag Juda kod jo-Jerusalem. An Ruoth Nyasaye Manyalo Gik Moko Duto kendo ma Nyasach Israel, awacho kama: Abiro kelo masira malich kuom dalani, ma ng’ato ka ng’ato mowinjo, to ite nopopni.

⁴Abiro timo kamano nikech useweya, mudwanyo dalani, kutimoe lisweche ni nyiseche mamoko ma ok ung’eyo, to kata mana kwereu gi ruodhi mag Juda bende ne ok ong’eyo. Usemiyo remb ji maonge ketho opong’o ka,

⁵ kendo usegero kende-mag-liswa mondo uwang’ie nyithindu ka liswa ni Baal. To ne ok achikou mondo utim kamano, bende wach ma kamano ne ok aparo kata matin.

⁶Emomiyo an Ruoth Nyasaye, awacho ni ndalo biro ma ok noluongie holoni ni Tofeth, kata ni holo Ben-hinom, to noluonge ni holo Nek.

⁷Ka eri ema nakethie gik moko duto ma jo-Juda gi jo-Jerusalem chano timo. Anawe wasikgi logi, mi neggi e lweny, kendo anami winy gi ondiegi cham ringregi.

⁸Anaketh dalani gi keth malich, mi ng’ato ang’ata makadho machiegni nobwogi, kawuoro gima osetimore ni dalani.

⁹Anami ji modak ka cham ringre nyithindgi giwegi. Bende ginicham ringre jowadgi e kinde marach ma wasigu nobed ka lworo dalagi, ka dwaro negogi.”

¹⁰Bang’ wacho wechego, Ruoth Nyasaye nonyisa mondo ato agulu cha e nyim joma ne asedhigogo,

¹¹kendo awachnigi ni Ruoth Nyasaye Manyalo Gik Moko Duto nosewacho kama: “Abiro toyo jogi gi dalani mana kaka itoyo agulu ma ok nyal chak chom. Joma otho noyik kata mana e Tofeth, nikech ok noyud kamoro nono ma diyikgie.

¹²Mano e kaka abiro timo ni dalani, kaachiel gi joma odakie, kendo analoke mana ka Tofeth. An Ruoth Nyasaye ema awacho kamano.

¹³Naketh udi mag Jerusalem gi ut ruodhi Juda, to moloyo udi duto ma osewang’ ubani ewi tetgi ni sulue, kendo ma osepukie lisweche miolo piny ni nyiseche mamoko, mi ginibed mogak mana ka Tofeth.”

¹⁴Bang’ wechego, ne awuok aa Tofeth, kuma ne Ruoth Nyasaye oorae, mondo adhi ahulie wachne. Ne adhi mi achung’ e laru mar Hekalu, eka anyiso ji duto niya,

¹⁵“Ruoth Nyasaye Manyalo Gik Moko Duto ma Nyasach Israel owacho ni obiro kelo masiche duto mane osiemogo dalani kaachiel gi mier duto mokiewo kode, nikech un joma tokgi tek, motamore winjo wachne.”