Read luo Jeremia 20 Bible Online

Jeremia 20 - luo bible

Jeremia 20

¹Kane Pashur wuod Imer jadolo, kendo jatelo maduong’ e Hekalu owinjo gik mane Jeremia okoro,

²nogolo chik mochwad Jeremia, kendo otueye e lodi e dhoranga Hekalu miluongo ni Ranga Benjamin mamalo.

³Kinyne gokinyi, Pashur ne ogonyo Jeremia, mi Jeremia nowachone niya, “Ruoth Nyasaye ok luongi ni Pashur, to oluongi ni Magor-misabib, tiende ni, masira ni kuonde duto.

⁴Ruoth Nyasaye osewacho ni obiro miyo ilokri masira ni in iwuon, kendo ni osiepeni, kendo wasigu noneg osiepenigo duto e lweny mana kineno. Abiro keto jo-Juda duto e teko mar ruodh Babulon, kendo enoter moko e tuech Babulon, to moko nogol chik mondo onegi.

⁵Bende anawe wasikgi yak mwandu duto manie Jerusalem kaachiel gi gik moko duto mantie, koda ka gik mabeyo duto mag ruodhi Juda, mi gikaw gidhigo Babulon

⁶To in Pashur, nomaki kaachiel gi joodi, mi teri Babulon kuma inithoe kendo yikie but osiepeni ma isebedo ka ihulonigi weche mag miriambo!”

⁷“A Ruoth Nyasaye, ne iwuonda, mi iwuonda adier. In itek moloya, omiyo ne ihewa. Ji duto tugo koda kendo ginyiera odiechieng’ duto.

⁸E kinde duto ma awuoyoe, to aywak kendo akok niya, ‘Mahundu gi masira nitie!’ A Ruoth Nyasaye, gichara kendo giyanya kinde duto nikech ahulo wachni.

⁹To ka awacho ni abiro weyi mondo kik achak awuo e nyingi, to wachni wang’o chunya, mana ka mach. Opong’o chokena, kendo ohewa ting’o ma ok anyal siro.

¹⁰Awinjo ka ji kuodha gi nying’ ma gichaka ni ‘Masira ni kuonde duto,’ kendo giwacho niya, ‘Kwedeuru! Ee, wakwede!’ Kata mana osiepena ma ageno bende gombona mana chwanyruok. Giwacho niya, ‘Dipo ka oyondhe, mi omoko, kendo wachulone kuor.’

¹¹To in Ruoth Nyasaye, in koda, itek, kendo iduong’, omiyo joma sanda biro chwanyore, kendo ok ginyal gimoro. Wigi biro kuot malich, nikech ok gibi loyo. Wichkuotgino nosik nyaka chieng’, kendo wich ok nowilgo.

¹²In Ruoth Nyasaye Manyalo Gik Moko Duto imiyo ji tem makare, kendo inono chunygi gi parogi. Omiyo yie ichulna kuor kuom wasika, nimar aketo wechena duto e lweti.

¹³“Weruru ni Ruoth Nyasaye, kendo pakeuru, nikech osereso joma ithiro e lwet joma timbegi richo.

¹⁴ “Okuong’ chieng’ mane mama onywolae!

¹⁵Okuong’ ng’at mane omiyo wuora mor, kuom kelone wach ni onywolne nyathi ma wuowi!

¹⁶Mad ng’atno chal gi mier mane Ruoth Nyasaye oketho mak okecho. Mad owinj ka ji ywagore malit gokinyi, kendo owinj tung’ lweny godiechieng’ tir,

¹⁷nikech ne ok onega kapok onywola. Kamano dine oyika ei mama, mi ok dine onywola.

¹⁸Ere gima omiyo ne onywola mana ni mondo ane lit gi masira, kendo atho mana gi wichkuot?”