Read luo Jeremia 21 Bible Online

Jeremia 21 - luo bible

Jeremia 21

¹Ruoth Zedekia nooro Pashur wuod Malkia kod Zefania wuod Maaseya jadolo ir Jeremia kokwaye niya,

² “Yie ipenjnwa Ruoth Nyasaye wach, nikech Nebukadnezar ruodh Babulon kedo kodwa. Dipo ka Ruoth Nyasaye otimonwa hono moro kaka ne ojatimo, mi ochun Nebukadnezar mondo owewa.”

³Eka Ruoth Nyasaye nowuoyo gi Jeremia, mi Jeremia nowacho ni jootego

⁴ni mondo onyis Zedekia ni Ruoth Nyasaye ma Nyasach Israel owacho niya, “Jolweny ma konyo Zedekia kedo gi ruodh Babulon gi joge mag lweny molworo ohinga mar Jerusalem abiro dwoko ei dala, kendo abiro dhuro gikgi mag lweny pidhe pidhe e chuny dala.

⁵An awuon abiro kedo kodu ka iya owang’, kendo ka an gi mirima mager.

⁶Abiro nego ji duto modak dalani. Tuo marach biro nego ji kaachiel gi jamni.

⁷To Zedekia ruodh Juda gi jodonge kod jodalani duto ma otony e lweny, kendo otony e kech gi tuo, abiro keto e lwet ruoth Nebukadnezar, kendo e lwet wasikgi ma dwaro negogi. Nebukadnezar biro negogi, kendo ok obi weyogi kata kechogi kata timonigi ng’wono. An Ruoth Nyasaye awacho kamano!”

⁸Ruoth Nyasaye ne ochako owacho ni Jeremia mondo onyis ji kama: “Winjuru an Ruoth Nyasaye aketonu yore ariyo mondo uyier achiel kuomgi. Achiel en dhi e ngima, to machielo en dhi e tho.

⁹Ng’ato ang’ata modong’ Jerusalem, lweny kata kech kata tuo noneg, to ng’ato ang’ata modhi ochiwore e lwet jo-Babulon ma koro monjo dalani, ok nonegi. To enores mana ngimane kende.

¹⁰Aseng’ado wach ni ok anyal weyo dalani, to nyaka akethe. Ibiro kete e lwet ruodh Babulon, kendo obiro wang’e morum pep. An Ruoth Nyasaye ema awacho kamano!”

¹¹“In Jeremia, nyis jood ruodh Juda ma nyikwa ruoth Daudi mondo owinj gima Ruoth Nyasaye owacho.

¹²Timuru gik makare pile. Konyuru ng’at ma ithiro e lwet joma thire, ka ok kamano, to timbeu maricho biro wang’o iya, ka mach ma ok nyal negi.

¹³Un jo-Jerusalem, dalau obet e bath holni mana ka lwanda mogingore e pap. To an Ruoth Nyasaye abiro kedo kodu. Uwacho ni onge ng’at ma nyalo monjou kata ma nyalo mwomo ohingau.

¹⁴To an Ruoth Nyasaye abiro kumou mana maromre gi kethou. Abiro wang’o od ruodhu gi mach ma nowang’ gik moko duto machiegni kode. An Ruoth Nyasaye ema awacho kamano.”