Read luo Jeremia 23 Bible Online

Jeremia 23 - luo bible

Jeremia 23

¹“Enobed malich manade kuom jotelo ma weyo joga inego kendo ikeyo.

²An Ruoth Nyasaye ma Nyasach Israel awuoyo kuom jotelo mane onego rit joga niya, ‘Usekeyo joga, mi uriembo, bende ok useritogi maber. Koro abiro kumou nikech gik maricho ma usetimo.

³Abiro choko joga modong’, kagolo e pinje duto mane akeyogie, kendo nadwokgi e pinygi. Gininywol nyithindo mang’eny mi ginya.

⁴Anaketnigi jotelo ma noritgi maber, mi onge gima nobwoggi kata ma nomi gibed maluor, bende onge ng’ato kuomgi ma noyud kolal. An Ruoth Nyasaye ema awacho kamano.’

⁵ “Ndalo biro ma nayierie nyakwar Daudi hie mondo obed ruoth. Enorit piny gi rieko, kotimo gik ma owinjore kendo makare e piny.

⁶E ndalo lochne, jo-Juda nodag gi kue, kendo jo-Israel bende nodag maonge ng’ama chandogi. Ginichak ruodhno ni ‘Ruoth Nyasaye ma resowa.’ ”

⁷“An Ruoth Nyasayye awacho niya, ‘Ndalo biro ma onge ng’ama nokuong’re gi nyinga ka Nyasaye mangima mane ogolo jo-Israel e piny Misri,

⁸to ginikuongre gi nyinga mana ka Nyasaye mangima mane ogolo jo-Israel e piny man nyandwat, kendo e pinje mamoko duto mane asekeyogie. Bang’e eka ginidag e pinygi giwegi.’ ”

⁹Jeremia nowuoyo kuom jonabi niya, “Chunya ool morumo, kendo atetni. Achal gi ng’at momer, mosemadho kong’o mang’eny, mana nikech Ruoth Nyasaye, kendo nikech wechene maler.”

¹⁰Joma oseweyo Ruoth Nyasaye opong’o piny. Timbegi richo, kendo gikonyore gi tekogi e yo marach. Piny ywak kendo lege otwo nikech osekuong’gi.

¹¹Ruoth Nyasaye wacho niya, “Timbe jonabi gi timbe jodolo ok ler. Asejukogi ka gitimo richo kata mana e Hekalu mara!

¹²Yore ma giluwo biro bedo mapothpoth kendo motimo mudho. Abiro miyo gichwanyre kendo gipodhi, nikech abiro kelo masira kuomgi chieng’ makumogie. An Ruoth Nyasaye ema awacho kamano.

¹³“Aseneno ni jonabi mag Samaria gin joma ofuwo. Ne gikoro weche e nying Baal, mi gimiyo joga Israel olal.

¹⁴ To bende aseneno ka jonabi mag Jerusalem timo mana gik mamono. Giterore, to kendo giwacho miriambo, bende gijiwo joma timo richo, omiyo onge ng’ama nyalo weyo timbene maricho. Giduto gichalna gi jo-Sodom gi jo-Gomora.

¹⁵Kuom mano, an Ruoth Nyasaye Manyalo Gik Moko Duto, awuoyo kuom jonabi mag Jerusalem, ni abiro miyogi alode makech mondo gicham, kod pi motimo kwiri mondo gimodhi, nikech giselando weche makwedo Nyasaye e pinygi duto.”

¹⁶Ruoth Nyasaye Manyalo Gik Moko Duto wacho ji jo-Jerusalem niya, “Kik uwinj gima jonabi wachonu, nikech gimiyo ugeno kuom gik ma ok bi timore. Ginyisou gik ma giparo apara giwegi, to ok gik ma an ema awacho.

¹⁷Gisiko ka giwacho ni ji motamore winjo wachna niya, ‘Gik moko duto biro dhinu maber.’ Bende giwacho ni joma wigi tek ni masira ok nomakgi.

¹⁸To onge kata ng’ato achiel kuom jonabigo moseng’eyo weche mopondo mag Ruoth Nyasaye. Bende onge ng’ato kuomgi mosewinjo kata moseng’eyo wechne, kata mana mosechiko ite kuom gik ma an Ruoth Nyasaye awacho.

¹⁹Mirimba chalo gi ahiti maduong’ ma biro utho joricho.

²⁰Ok obi rumo kapok otieko timo gik ma adwaro. E ndalo mabiro un joga ubiro ng’eyo tiend wechegi duto malong’o!”

²¹Ruoth Nyasaye nowacho niya, “An, ne ok aoro jonabgo, to ne girikni arika ka gidhi. Bende ne ok amiyogi wach moro, to pod ne giwuoyo mana e nyinga!

²²Ka dine ging’e parona mopondo, to dine gilando wachna ni joga mondo owe yoregi gi timbegi maricho.

²³“An, an Nyasaye man kuonde duto, to ok man kanyachiel kende.

²⁴Onge ng’ama nyalo pondo kamoro ma ok anyal nene. Donge ung’eyo ni an, an kuonde duto, e polo kendo e piny.

²⁵Asewinjo weche mag miriambo ma jonabigo osehulo e nyinga ka giwacho ni giseleko, mi giyudo wach moa kuoma.

²⁶Koro jonabigo biro wuondo joga gi miriambo ma giparo apara nyaka karang’o?.

²⁷Giparo ni lek ma giwachogo biro miyo wi joga wil koda kaka wi kweregi nowil koda, modok ni Baal.

²⁸Janabi ma oseleko lek, onego owach ni en mana lek, to janabi moseyudo wachna onego ohul wachnano kare. Koso mihudhi gi cham yande chalre?

²⁹Wachna chalo gi mach kendo chalo gi nyundo ma baro lwanda matindotindo. An Ruoth Nyasaye ema awacho kamano.

³⁰Amon gi jonabi ma kawo weche jowetegi, kendo hulo kagima gin wechena.

³¹Bende amon gi jonabi ma wacho wechegi giwegi, to wuondore ni wechego oa kuoma.

³²Winjuru gima awacho, an Ruoth Nyasaye! Amon gi jonabi mahulo lek mag miriambo, nimar giwito joga kod sungagi gi lekgigo. Ne ok aorogi, bende ne ok achikogi mondo gidhi gitim kamano, omiyo onge gima gikonyogo jogagi. An Ruoth Nyasaye ema awacho.”

³³“In Jeremia, ka ng’ato kuom joga kata kuom jonabi kata kuom jodolo openji wach moa kuoma, kowacho niya, ‘Ere ting’ mapek moa kuom Ruoth Nyasaye,’ to wachne ni, ‘Un e ting’ mapek ma Ruoth Nyasaye nigo, kendo obiro witou.’

³⁴To kapo ni janabi kata jadolo kata achiel kuom jogi omulo wechego, kawacho niya, ‘Wach mapek moa kuom Ruoth Nyasaye,’ to anakume kaachiel gi joode.

³⁵Kar mulo wechego to ng’ato ka ng’ato mondo openj osiepene kaachiel gi jowetene niya, ‘Ere kaka Ruoth odwokowa?’ Kata ni, ‘Ruoth Nyasaye osewacho nang’o?’

³⁶To kik gichak gimul weche ma wacho ni, ‘Wach Ruoth Nyasaye en ting’ mapek,’ nikmech ka ng’ato omulogi, to anami wachna bedne mapek adier! Ji oseketho weche Nyasachgi, ma Nyasaye mangima, kendo ma Ruoth Nyasaye anyalo Gik Moko Duto.

³⁷“Jeremia, in ema nyaka ipenj jonabi niya, ‘Ere kaka Ruoth Nyasaye nodwokou? Nowacho nang’o?’

³⁸To ka giwacho niya, ‘Wach Ruoth Nyasaye en ting’ mapek,’ to iwachnigi ni, abiro ting’ogi mi awitgi kuma bor, nikech gisemulo weche mane akwerogi ni kik gimul.

³⁹Gibiro lal e wang’a, kaachiel gi dala maduong’ mane amiyogi gi kweregi.

⁴⁰Abiro miyogi wichkuot mochwere kod achaya ma wich ok nowilgo.”