Read luo Jeremia 24 Bible Online

Jeremia 24 - luo bible

Jeremia 24

¹ Ruoth Nyasaye ne onyisa atonge ariyo moting’o ng’owo, koket e nyim Hekalu, mano notimore kane Nebukadnezar ruodh Babulon osetero Jekonia wuod Jehoyakim ma ruodh Juda e tuech Babulon, kaachiel gi jotend Juda gi jotheth kod joma olony e tich lwedo.

²Atonga achiel noting’o ng’owo mabeyo machiek atamalo, to atonga machielo noting’o ng’owo maricho ma ok nyal cham.

³Bang’ mano, Ruoth Nyasaye nopenja niya, “Jeremia, ang’o mineno?” Ne adwoke ni, “Aneno ng’owo, ma moko kuomgi beyo ahinya to moko richo ahinya ma ok nyal cham.”

⁴Eka ne Ruoth Nyasaye owachona niya,

⁵“An Ruoth Nyasaye ma Nyasach Israel akwano joma ne oter e tuech Babulon ka ng’owo mabeyogo, kendo abiro guedhogi.

⁶Abiro ritogi maber, kendo anaduoggi e pinyni. Abiro gerogi, kendo ok namukgi. Abiro pidhogi, kendo ok napudhgi.

⁷Anamigi chuny mar ng’eyo ni an e Ruoth Nyasaye. Bang’e ginibed joga, kendo anabed Nyasachgi, nikech giniduog ira gi chunygi duto.

⁸“To Zedekia ruodh Juda gi jodonge kod jo-Jerusalem mamoko duto mosedong’ kae, kata mosedhi Misri, abiro kwano mana ka ng’owo maricho ma ok nyal chamgo!

⁹Abiro kelo kuomgi masira malich ma nomi ogendini duto bed maluor. Ji nobed ka ngerogi, kendo tugo kodgi. Bende ji nochargi, kendo noluong nyinggi ka gima okuong’ kuonde duto ma akeyogie.

¹⁰Anakel kuomgi lweny gi kech kod tuo, nyaka chop girum pep e piny mane amiyogi gi kweregi.”