Read luo Jeremia 28 Bible Online

Jeremia 28 - luo bible

Jeremia 28

¹ E higano, e due mar abich mar higa mar ang’wen mar loch Zedekia ruodh Juda, Hanania janabi, ma wuod Azur ja-Gibeon, nowuoyo gi Jeremia e Hekalu kowachone e nyim jodolo kod ji,

²ni Ruoth Nyasaye Manyalo Gik Moko Duto kendo ma Nyasach Israel owacho kama: “Aseturo jok mar ruodh Babulon,

³kendo ka pok higni ariyo orumo, to abiro dwoko gik lemo duto mane ruoth Nebukadnezar okawo motero Babulon.

⁴Bende abiro duogo Jekonia wuod Jehoyakim ma ruodh Juda kaachiel gi jo-Juda mane odar moter Babulon e tuech. Adier, abiro turo jok mar ruodh Babulon. An Ruoth Nyasaye ema awacho kamano.”

⁵To Jeremia janabi nodwoko Hanania janabi e nyim jodolo gi ji duto mane oyudo ochung’ e Hekalu,

⁶kowacho niya, “Mad Ruoth Nyasaye tim kamano! Dang’ bed maber ka omiyo wecheni duto otimore, mi oduogo gik lemo duto mane oter Babulon, kaachiel gi joma ne odar mi oter kuno e tuech!

⁷To in Hanania, kaachiel gi ji duto, winjuru gima awachonu.

⁸Jonabi machon mane okwongonwa ne koro wach ni lweny gi kech kod tuo biro biro kuom ogendini mang’eny gi pinje marateke.

⁹To ubiro ng’eyo ka janabi ma koro wach kue en janabi ma Ruoth Nyasaye oseoro adier, mana ka gik ma okoro otimore.”

¹⁰Bang’ mano, Hanania nogolo jok e ng’ut Jeremia, moturo matindo tindo.

¹¹Eka nowacho e nyim ji duto niya, “Ruoth Nyasaye osewacho ni kaka aseturo jokni e kaka obiro turo jok ma ruoth Nebukadnezar oseketo e ng’ut ogendini, kendo obiro timo kamano kapok higni ariyo orumo.”

¹²To bang’ kinde moko, kane Hanania oseturo jok mane nie ng’ut Jeremia, Ruoth Nyasaye nowacho ni Jeremia

¹³mondo odhi onyis Hanania niya, “Ruoth Nyasaye osewacho ni inyalo turo jok mar yien, to obiro keto jok mar nyinyo kare.

¹⁴Ruoth Nyasaye Manyalo Gik Moko Duto kendo ma Nyasach Israel osewacho ni obiro keto jok mar nyinyo kuom ogendini duto, kendo giniti ni Nebukadnezar ruodh Babulon. Bende osewacho ni obiro miyo kata mana le mae bungu ti ni Nebukadnezar.”

¹⁵Bang’e Jeremia nowacho ni Hanania niya, “Koro winji, Hanania. Ruoth Nyasaye ok oori, to imiyo jogi geno mana miriambo.

¹⁶Omiyo Ruoth Nyasaye owuon wacho ni obiro tieki e wang’ pinyni, nimar ibiro tho ka pok higani orumo, nikech isejiwo ji mondo otamre mako chikne.”

¹⁷Kamano Hanania janabi notho e due mar abiriyo mar higano.