Read luo Jeremia 29 Bible Online

Jeremia 29 - luo bible

Jeremia 29

¹ Jeremia nondiko ni jotelo mane odong’ kuom joma otue, kaachiel gi jodolo gi jonabi kod ji duto mane Nebukadnezar ogolo Jerusalem motero Babulon.

²Nondiko baruano kane ruoth gi min mare gi jodong od ruoth gi jotend Juda kod jo-Jerusalem gi jotheth kod joma olony e tich lwedo osea Jerusalem.

³Jeremia noketo baruano e lwet Elasa wuod Shafan gi Gemaria wuod Hilkia mane oyudo Zedekia ruodh Juda ooro ir Nebukadnezar ruodh Babulon. Jeremia nondiko baruano kama:

⁴“Ruoth Nyasaye Manyalo Gik Moko Duto kendo ma Nyasach Israel wacho ni jogo duto mane omiyo Nebukadnezar ogolo Jerusalem motero Babulon e tuech niya,

⁵‘Geruru udi mondo udagie. Losuru puothe kendo chamuru gik monyakie.

⁶Kenduru mon, mondo ubed gi nyithindo, bende kenduru ni yawuotu, kendo uwe nyiu okendi, mondo gin bende gibed gi nyithindgi. Kamano unya kuno, mondo kik udong’ chien.

⁷Tiuru matek mondo ulos dala moro amora ma asemiyo oterue e tuech. Lamuru ni dalano nikech ka odhi maber to un bende ubiro dhi maber.

⁸An Ruoth Nyasaye ma Nyasach Israel asiemou ni kik jonabi modak kodu kata jokor wach wuondu. Kik uchik itu ni lekgi,

⁹nimar giwachonu miriambo e nyinga, to an ne ok aorogi. An Ruoth Nyasaye ema awacho kamano.’ ”

¹⁰ Ruoth Nyasaye wacho niya, “Ka higni piero abiriyo mag loch Babulon oserumo, to anaparu mi aduogu e pinyu kachopogo singruok mane atimonu.

¹¹An awuon ema ang’eyo gima achanonu. En gima ber to ok gima rach, kendo abiro kelonu gik mabeyo duto mugeno. An Ruoth Nyasaye ema awacho kamano.

¹²Bang’e unuluonga, kendo unubi ulama, mi nadwoku.

¹³ Unudwara, mi unuyuda, nikech unudwara gi chunyu duto.

¹⁴Adier, awacho ni un uyuda, mi anadwoku e pinyu. Anagolu e pinje duto kuonde ma asekeyoue, mi anadwoku e piny mane agoloue, kane amiyo oteru e tuech. An Ruoth Nyasaye ema awacho kamano.

¹⁵“Un uwacho ni Ruoth Nyasaye osemiyou jonabi e Babulon.

¹⁶To winjuru gima Ruoth Nyasaye wacho kuom ruoth marito piny kaka ne Daudi orito, kendo kuom jodalani, tiende ni wedeu mane ok odar moter e tuech kodu.

¹⁷Ruoth Nyasaye Manyalo Gik Moko Duto wacho niya, ‘Abiro kelo lweny gi kech gi tuoche kuomgi, kendo abiro miyo gichal ka ng’owo motop ma ok nyal cham.

¹⁸Abiro chandogi gi lweny gi kech gi tuoche, mi ogendini duto mag piny biro bedo maluor koneno gima otimorenigi. Kamoro amora ma akeyogie, ji nobed kangerogi kendo tugo kodgi. Ginichargi, kendo giniluong nyinggi ka gima okuong’.

¹⁹Mano biro timore nikech ne gitamore winjo wach asiko ka aoro jotichna ma jonabi mondo oternigi. An Ruoth Nyasaye ema awacho kamano.

²⁰Un duto joma ne amiyo ruodh Babulon ogolo Jerusalem kendo odhigo kaka joma otue, winjuru gima an Ruoth Nyasaye awacho.’

²¹“An Ruoth Nyasaye Manyalo Gik Moko Duto kendo ma Nyasach Israel, kuom Ahab wuod Koloya, gi Zedekia wuod Maaseya, ma wachonu miriambo e nyinga asewuoyoe niya, ‘Abiro ketogi e lwet Nebukadnezar ruodh Babulon, mi obiro negogi mana kuneno.

²²Ka joma ne ogol Jerusalem moter Babulon e tuech dwaro kuong’o ng’ato, to giniwach niya, “Ruoth Nyasaye mondo otimni kaka notimo ni Zedekia gi Ahab, mane ruodh Babulon owang’o ka ngima gi mach!”

²³Mano e gima biro timorenigi nikech ne gilokore joma ofuwo, ka giterore, kendo giwacho miriambo e nyinga, to ne ok amiyogi wach mondo gihul. Ang’eyo gima gisetimo, kendo asebedo janeno kuom timbegi. An Ruoth Nyasaye ema awacho kamano.’ ”

²⁴Ruoth Nyasaye Manyalo Gik Moko Duto kendo ma Nyasach Israel mondo onyis Shemaya ma ja-Nehelam niya,

²⁵“Ne indiko barua e nyingi iwuon, mioro ni jo-Jerusalem duto, kendo ni Zefania ma wuod Maaseya jadolo kendo ni jodolo mamoko duto. Niwacho ni Zefania ei baruano niya,

²⁶‘Ruoth Nyasaye ne oketi jadolo kar Jehoyada, kendo koro in e jatelo maduong’ e Hekalu, kuom mano, en tiji mondo ine ni ng’ato ang’ata ma janeko to wuondore ni en janabi to mondo otue gi nyororo kod chuma molworo ng’ute.

²⁷Ka kamano, to ere gimomiyo ok isekwero Jeremia ma ja-Anathoth, mosebedo kawuoyo gi ji ka gima en janabi?

²⁸Nyaka kwere nikech nowacho ni jo-Juda man Babulon ni ginibed e tuech kuno aming’a. Omiyo onego giger udi gidagie, kendo gilos puothe, gicham gik monyakie.’ ”

²⁹Zefania janabi nosomo baruano ni Jeremia.

³⁰Bang’e Ruoth Nyasaye nowacho ni Jeremia,

³¹mondo oor wach ni ji duto mane oter Babulon e tuech, konyisogi gima ne Ruoth Nyasaye owacho kuom Shemaya.

³²Nowacho niya, “An Ruoth Nyasaye abiro kumo Shemaya gi nyikwaye duto, nikech ne owuoyo ka gima en janabi, mi omiyo uyie weche mag miriambo, to ne ok aore. Ok nobed gi nyikwayo ma nochung wiye e ogandau, bende obiro tho ka pok oneno gik mabeyo ma abiro timo ni joga, nikech nowachonigi mondo gitamre mako chikena. An Ruoth Nyasaye ema awacho kamano.”