Read luo Jeremia 35 Bible Online

Jeremia 35 - luo bible

Jeremia 35

¹ E ndalo loch Jehoyakim wuod Josia ruodh Juda, Ruoth Nyasaye nowacho ni Jeremia niya

²“Dhiyo ir joka Rekab mondo iwuo kodgi. Bang’e ikelgi e ot achiel kuom ut Hekalu mondo imigi divai gimadhi.”

³Kuom mano Jeremia nokawo Jazania wuod Jeremia machielo, ma nyakwar Habazia kod owetene gi joka Rekab duto,

⁴mi okelogi e Hekalu. Ne oterogi e od yawuot Hanan wuod Igdalia ng’at Nyasaye. Odno ne nie bath od jodong Hekalu, kendo ewi od Maaseya wuod Shalum mane jatich maduong’ e Hekalu.

⁵Bang’e Jeremia noketo kikombe gi tewni ma divai opong’o e nyim joka Rekab, mowachonigi niya, “Madhuru divai.”

⁶To ne gidwoke niya, “Ok wamadh divai nikech Jonadab wuod Rekab ma kwarwa nowachonwa ni wan kata nyikwawa kik wamadh divai nyaka chieng’.

⁷Bende nokwerowa ni kik wager udi kata kik wapur puothe, kendo ni kik wapidh yiend mzabibu kata kik wabed gi gik makamago. Nochikowa mana ni mondo wadag mana e hembe kuom ngimawa duto, ni eka wanadag aming’a e piny ma wanie weloni.

⁸Waserito chike duto mag Jonadab wuod Rekab ma kwarwa. Wan wawegi ok wamadh divai, kata mana mondwa gi yawuotwa kod nyiwa bende ok madhi.

⁹Ok wager udi mondo wadagie, bende waonge gi puothe mag mzabibu, kata puothe mamoko, kata cham,

¹⁰to wadak mana e hembe, kamano, chike dutoo mane kwarwa Jonadab omiyowa waserito maber.

¹¹To kane Nebukadnezar ruodh Babulon omonjo pinywani, ne waneno ni ber mondo wabi Jerusalem, dipo ka jolweny mag Babulon gi mag Aram omakowa. Mano emomiyo wadak Jerusalem.”

¹²Bang’ wechego, Ruoth Nyasaye Manyalo Gik Moko Duto kendo ma Nyasach Israel nowacho ni Jeremia

¹³mondo odhi owach ni jo-Juda gi jo-Jerusalem niya, “An Ruoth Nyasaye apenjou gima omiyo utamoru winja, kata rito chikena?

¹⁴Nyikwa Jonadab oserito chik mane kwargi omiyogi mi ok gimadh divai, kendo kata nyaka sani onge ng’ato kuomgi mametho, nikech girito chik mane kwargi ogolo. To an asebedo ka awuoyonu pile, to utamoru.

¹⁵Bende asebedo ka aoronu jotichna ma jonabi, kendo gisekwerou ni mondo uwe timbe maricho, utim gik makare. Ne gisiemou ni uwe lamo nyiseche mamoko mondo udag aming’a e piny mane amiyou gi kwereu. To ne ok unyal winja, kata chiko itu kuom gima awacho.

¹⁶Nyikwa Jonadab oserito chik mane kwargi omiyogi, to un to utamoru winja.

¹⁷Omiyo an Ruoth Nyasaye Manyalo Gik Moko Duto kendo ma Nyasach Israel abiro kelo kuomu un jo-Juda gi jo-Jerusalem masiche duto mane asesiemougo, nikech ne ok unyal winja ka awuoyo kodu, bende ne ok unyal dwoka ka aluongou.”

¹⁸Bang’e Jeremia nowacho ni joka Rekab ni Ruoth Nyasaye ma Nyasach Israel osewacho niya, “Userito chik mane kwaru Jonadab omiyou, kutimo gik moko duto mane ochikou.

¹⁹Kuom mano an Ruoth Nyasaye Manyalo Gik Moko Duto, kendo ma Nyasach Israel asingora ni e kinde duto nobedie nyakwar Jonadab wuod Rekab ma tiyona.”