Read luo Jeremia 36 Bible Online

Jeremia 36 - luo bible

Jeremia 36

¹ E higa mar ang’wen mar loch Jehoyakim ruodh Juda, Ruoth Nyasaye nowacho ni Jeremia niya,

²“Kaw kitabu mondo indikie weche duto ma asenyisi kuom Israel gi Juda kod ogendini duto, chakre chieng’ mane akwongo losoe kodi e ndalo loch ruoth Josia nyaka chil kawuono.

³Kamoro ka jo-Juda owinjo masiche duto ma achano kelo kuomgi, to ginyalo weyo yoregi maricho. Bang’e anyaloweyonigi timbegi maricho kod richogi.”

⁴Mano omiyo Jeremia noluongo Baruk wuod Neria, mi oluwone weche duto mane Ruoth nyasaye osenyise, kendo Baruk nondikogi duto e kitabu.

⁵Bang’e Jeremia nomiyo Baruk chik niya, “Tinde ok oyiena donjo e Hekalu

⁶Omiyo adwaro ni wang’ni ka ji tueyo chiemo, to mondo idhi kuno isom weche manie kitabuni matek mondo giwinj gik moko duto ma Ruoth Nyasaye osenyisa, mi awachoni indiko. Nyaka itim kamano kama ji duto nyalo winjigo, koda ka jo-Juda mobiro ka oa e miechgi.

⁷Kamoro dipo ka gilamo Ruoth Nyasaye, mi gilokore giweyo yoregi maricho, nimar osesiemogi ni obiro kumogi gi mirimbe mager.”

⁸Kamano Baruk nodhi e Hekalu mosomo weche Ruoth Nyasaye manie kitabuno, mana kaka Jeremia nonyise.

⁹E due mar ochiko, higa mar abich, mar loch Jehoyakim wuod Josia ruodh Juda, jo-Jerusalem duto kaachiel gi ji mane oa e miech Juda ne oriyo kech mondo Ruoth Nyasaye okechgi.

¹⁰Eka Baruk nosomonigi weche duto mane Jeremia owachone, mi ondiko e kitabu. Ne osomo wechego e Hekalu gi e od Gemaria wuod Shafan ma jang’ad ni ruoth rieko. Odno ne nie laru mamalo e dhoranga Hekalu miluongo ni ‘Rangach Manyien.’

¹¹Kane Mikaya wuod Gemaria ma nyakwar Shafan owinjo ka Baruk somo weche Ruoth Nyasaye e kitabuno,

¹²ne odhi e dala ruoth modonjo ei od jang’ad ni ruoth rieko, kama ne oyudo jotelo duto nitie ka yalo. Elishama ma jang’ad ni ruoth rieko, kod Delaya wuod Shemia gi Elnathan wuod Akbor, gi Gemaria wuod Shefan gi Zedekia wuod Hanania kod jotelo mamoko duto ne oyudo ni kuno.

¹³Mikaya nonyisogi weche duto mane osewinjo ka Baruk somo ni ji.

¹⁴Eka jotelogo nooro Jehudi wuod Nethania ma wuod Shelemia ma wuod Kushi mondo onyis Baruk okel kitabu mane oyudo osesomo ni jino. Omiyo Baruk nokawo kitabuno mi odhigo irgi.

¹⁵Kane ginene, ne giwachone niya, “Bed piny mondo isomnwa kitabuno.” Kuom mano Baruk nobet piny, mosomonigi,

¹⁶kendo kane osetieko some duto, jotelogo nowuoyo e kindgi giwegi ka wuoro. Eka ne giwacho ni Baruk niya, “Nyaka wanyis ruoth wachni.”

¹⁷Bang’ mano ne gipenje niya, “Nyiswa ane, ere kaka ne indiko wechegi duto? Koso Jeremia ema ne wuoyoni to indiko?”

¹⁸Baruk nodwokogi niya, “Jeremia ema ne owachona wechego duto, mi andiko gi wino e kitabuni.”

¹⁹Bang’e ne giwachone niya, “Un gi Jeremia nyaka upondi, mondo kik ng’ato ng’e kama untie.”

²⁰Jotelogo nokawo kitabuno mokano e od Elishama ma jang’ad ni ruoth rieko, eka ne gidhi e laru mar od ruoth, mi ginyiso ruoth weche duto.

²¹Ruoth ne ooro Jehu mondo odhi oomne kitabuno, mi Jehu nodhi oome e od Elishama mosome ni ruoth kod jodongo duto mane nigi ruoth.

²²Ne en due mar ochiko, kinde ma koyo ng’ichie, kendo ne oyudo ruoth obet ka oyo mach e ode modakie ndalo koyo.

²³E kinde ka kinde mane Jehudi tieko somo laini adek kata ang’wen, ruoth ne ng’ado kuondego gi pala moro matin, kendo owito e mach. Ne otimo atima kamano nyaka ne otieko kitabuno.

²⁴To ruoth, kata ng’ato ang’ata kuom jodonge ne ok obedo maluor, kata yiecho lepgi ma dinyis ni giloko chunygi.

²⁵Kata obedo ni Elnathan gi Delaya gi Gemaria ne jokwayo ruoth ni mondo kik owang’ kitabuno, to ne ok odewogi.

²⁶Bang’e nogolo chik mondo jaduong’ Jerameel kaachiel gi Seraya wuod Azriel kod Shelemia wuod Abdiel jodhi omak Jeremia gi Baruk jandiko mare. To noyudo ka Ruoth Nyasaye osepandogi.

²⁷Kane ruoth Jehoyakim osewang’o kitabu mane Baruk ondikoe weche mane Jeremia oluwone, Ruoth Nyasaye nonyiso Jeremia

²⁸mondo okaw kitabu machielo, kendo ondikie weche duto mane nie kitabu mokwongono.

²⁹Bende Ruoth Nyasaye ne owachone mondo onyis ruoth Jehoyakim niya, “Isewang’o kitabu, kendo isepenjo Jeremia gima omiyo ne ondiko ni ruodh Babulon biro biro ketho pinyni, kendo nego ji modakie koda ka jamni.

³⁰Kuom mano, an Ruoth Nyasaye awachoni, in ruoth Jehoyakim, ni onge nyakwari moro amora ma nobed ruoth ka Daudi. Ringri nowiti oko kama chieng’ nochamee godiechieng’, kendo koyo nochamee gotieno.

³¹Anakumi in kod nyikwayi, kaachiel gi jodongi nikech richo ma usetimo. In gi jo-Jerusalem kod jo-Juda, ok usedewo siem mane asiemougo, omiyo abiro kelo kuomu masiche duto ma asewacho.”

³²Bang’ mano, Jeremia nokawo, kitabu machielo, momiyo Baruk jandiko mare, mondikoe weche duto mane Jeremia owachone. Ne ondiko gimoro amora mane nie kitabu mane ruoth Jehoyakim osewang’o e mach. Bende Jeremia ne omedo weche mang’eny machal gi mokwongogo.