Read luo Jeremia 38 Bible Online

Jeremia 38 - luo bible

Jeremia 38

¹Shefatia wuod Matan gi Gedalia wuod Pashur gi Jukal wuod Shelemia kod Pashur wuod Malkia ne jowinjo gima ne Jeremia wacho ni ji. Ne onyiso ji

²ni Ruoth Nyasaye nosewacho niya, “Ng’ato ang’ata ma odong’ Jerusalem, lweny kata kech kata tuoche biro nego. To ng’ato ang’ata modhi ochiwore e lwet jo-Babulon ok nonegi. Enotony to ngimane kende ema noresi.”

³Bende Jeremia ne nyiso ji ni Ruoth Nyasaye nosewacho niya, “Abiro chiwo dalani e lwet jolweny mag ruodh Babulon, mi kawe.”

⁴Kane jodongogo owinjo wechego, ne ginyiso ruoth niya, “Ng’atni nyaka negi, nikech kowuoyo kama, to onyoso chuny jolweny kaachiel gi jomoko duto modong’ e dala ka. Emomiyo waneno ni ng’atni ok dwar konyo ji, to odwaro mana ni mondo giyud chandruok.”

⁵Mano omiyo ruoth Zedekia nowacho niya, “Onge wach! Kara timneuru gima uneno ni ber. Ok anyal tamou.”

⁶Kuom mano ne gikawo Jeremia, mi ginyumo e soko jaduong’ Malkia, mane nie laru mar od jorit. Sokono ne onge pi, mak mana chuodho, omiyo ne gilore piny, e iye gi tonde, mi onyumore e chuodho.

⁷To Ebed-melek, ja-Ethiopia ma jatich mabuoch mane tiyo e od ruoth, ne owinjo ni jodongogo onyumo Jeremia e sokono. E sano ne oyudo ka ruoth nie bura e dhorangach miluongo ni Ranga Benjamin.

⁸Omiyo Ebed-melek noa e od ruoth, mi odhi onyiso ruoth niya,

⁹“Jaduong’, jogi osetimo gima ok ber. Gisenyumo Jeremia e soko kama kech biro negee nikech chiemo onge e dala duto.”

¹⁰Kane ruoth owinjo kamano, nogolo chik mondo Ebed-melek odhi gi ji adek mane ni kanyo, mondo giywa Jeremia oko e soko ka pok otho.

¹¹Omiyo Ebed-melek nokawo jogo, modhigo e od kendo mar dala ruoth mi okawoe nengni moti. Eka nodhi, mi oloro ni Jeremia nengnigo gi tonde e soko,

¹²kowachone niya, “Ket nengni motigo e yuothi, mondo tonde kik hinyi.” Jeremia notimo kamano,

¹³eka ne giywaye gi tonde, mi gigole oko. Bang’ mano ne olorne alora e laru mar od jorit.

¹⁴Ruoth Zedekia nogolo chik mondo okel Jeremia janabi e rangach mar adek mar Hekalu, kendo kane osekele ire, ne owachone niya, “Adwaro penji wach, to kik ipanda gimoro kata achiel.”

¹⁵Jeremia nodwoke niya, “Ka anyisi wach ma adier, to ibiro nega, to bende ka ang’adoni rieko, to ok ibi dewo tiyogo.”

¹⁶Kane ruoth Zedekia owinjo kamano, nosingore ni Jeremia ling’ling’ niya, “Akuong’ora gi nying Ruoth Nyasaye mangima mane ochueyowa ni ok nanegi, kendo ok nachiwi e lwet joma dwaro negi.”

¹⁷Eka Jeremia nowachone niya, “Ruoth Nyasaye Manyalo Gik Moko Duto owacho ni ka iwuok ma ichiwori e lwet jotelo mag ruodh Babulon, to initony kendo dalani ok nowang’ gi mach. Adier, initony kaachiel gi joodi.

¹⁸To ka ok ichiwori e lwetgi, to gibiro kawo dalani, mi giwang’ kendo in ok nitony e lwetgi.”

¹⁹Ruoth Zedekia nodwoke niya, “Aluoro jo-Yahudi ma oseringo odok ni jo-Babulon, nikech dipo ka ochiwa e lwetgi, mi gisanda.”

²⁰Eka Jeremia nowachone niya, “Ok nochiwi e lwetgi, omiyo akwayi ni mondo iwinj wach Ruoth Nyasaye kaka asenyisi, mi inine maber kendo ok nonegi.

²¹To Ruoth Nyasaye osenyisa e fweny ni ka idagi chiwori,

²²to mon modong’ e od ruodh Juda ibiro gol, mi ter ni jotelo mag ruodh Babulon, kendo ka gidhi to giniwach niya, ‘Osiepe ruoth mogeno osewuonde, kendo gisebet ka gihewe gi rieko. Koro tinde osemoko e chuodho, omiyo osiepene oseweye!’ ”

²³Bang’ mano Jeremia nochako onyiso Zedekia niya, “Jo-Babulon nokaw mondi gi nyithindi duto, to in bende ok nitony e lwetgi. Ruodh Babulon nokawi mi teri e tuech, kendo dalani nowang’, mi rum pep.”

²⁴Zedekia nokone niya, “Kik iwe ng’ato ng’e weche ma wawacho kodigi, to eka ok gimoro ditimi.

²⁵Ka jotelo owinjo ni asewuoyo kodi, to gibiro biro penji gima wasewacho, kendo gibiro nyisi ni ka iwachonigi weche duto ma wasewacho, to ok gibi negi.

²⁶To in nyisgi mana ni ne ibiro kwaya mondo kik adwoki e od Jonathan, nimar dipo ka itho kuno.”

²⁷Adier, jotelo duto nobiro ir Jeremia, mi gipenje gima ne giwacho gi ruoth, to ne onyisogi mana kaka ruoth nosenyise mondo owachi. Omiyo ne ok ginyal timo gimoro, nikech onge ng’ato mane osewinjo weche mane Jeremia jowacho gi ruoth.

²⁸ Kuom mano nodwok Jeremia e laru mar od jorit, mi obet kanyo nyaka chieng’ mane okawie Jerusalem.