Read luo Jeremia 41 Bible Online

Jeremia 41 - luo bible

Jeremia 41

¹ E due mar abiriyo, Ishmael wuod Nethania ma nyakwar Elishama ma anywola joka ruoth, nobiro Mizpa gi ji apar mondo oneg Gedalia wuod Ahikam. Kane oyudo gichiemo kode kuno.

²Ishmael gi joge apargo noa malo monego Gedalia mane ruodh Babulon oseketo mondo obed jatend piny Juda.

³Bende ne ginego jo-Yahudi duto mane ni Mizpa gi Gedalia, kaachiel gi jolweny mag jo-Babulon mane oyudo ni kuno.

⁴Kinyne, kane pok ji ong’eyo ni Gedalia osenegi,

⁵ji piero aboro nobiro koa Shekem gi Shilo kod Samaria. Ne oyudo giselielo tikgi, mi giyiecho lepgi, kendo gisaro dendgi, bende ne giting’o cham gi ubani mondo gichiw e Hekalu.

⁶Ishmael noa Mizpa modhi romonigi kaywak. Kane ochopo irgi. Nowacho nigi niya, “Biuru mondo une Gedalia.”

⁷To gikanyono mane gichopo e chuny Mizpa, Ishmael gi joge nonegogi, mowito ringregi e bur.

⁸To ji apar kuom jogo nosayo Ishmael, kawachone niya, “Kiyie to kik inegwa! Wan gi cham gi mor zeituni kod mor kich mwasepando e bungu.” Omiyo noweyogi, mi ok onegogi kaka ne onego jowadgi mamoko.

⁹Bur mane Ishmael owitoe joma ne onegogo ne bur maduong’. Ruoth Asa ema nosekunyo burno mondo okanie pi ndalo mane Baasha ruodh Israel dwaro monje. Koro Ishmael nopong’o burno gi ringre ji mane onego.

¹⁰Bang’e ne okawo nyi ruoth kaachiel gi ji mamoko duto man Mizpa mane Nebuzaradan jatend lweny maduong’ oseketo e bwo Gedalia. Kane osemakogi kamano, nochako wuoth kochomo yo piny Amon.

¹¹Johanan wuod Karea kaachiel gi jotend lweny duto mane en-go ne jowinjo gima rach mane Ishmael osetimono.

¹²Omiyo ne gikawo jogi, mi gidhi kedo kode. Ne gijuke but yawo maduong’ man Gibeon,

¹³Kendo kane joma Ishmael tero e tuech oneno Johanan kod jotend lweny, ne gidoko mamor,

¹⁴mi giringo gidok ni Johanan.

¹⁵To Ishmael kod joge moko aboro notony e lwet Johanan, moringo odhi e piny Amon.

¹⁶Bang’e Johanan kod jotend lweny mane ni kode ne jokawo joma ne Ishmael wuod Nathania omako Mizpa, kane osenego Gedalia wuod Ahikam. Ne gin chwo gi mon kod nyithindo, kaachiel gi jotich mabuoch mane Johanan oreso Gibeon.

¹⁷Ne gia Gibeon, mi gibuoro Gerush-kimham but Jerusalem, ka gidhi e piny Misri

¹⁸mondo gitony gia e lwet jo-Babulon. Ne giluoro jo-Babulon nikech Ishmael ne osenego Gedalia, mane ruodh Babulon oketo jatend piny Juda.