Read luo Jeremia 43 Bible Online

Jeremia 43 - luo bible

Jeremia 43

¹Kane Jeremia osetieko nyiso ji weche duto mane Ruoth Nyasaye oseoro mondo onyisgi,

²Azaria wuod Hoshaya kod Johanan wuod Karea, kaachiel gi ji mamoko duto ma wigi tek, ne jowacho ni Jeremia niya, “Iriambo! Ruoth Nyasachwa ok oseori mondo ikwerwa ni kik wadhi wadag Misri.

³To Baruk wuod Neria ema osethuwi kodwa mondo iketwa e lwet jo-Babulon, mondo onegwa, kata omakwa oterwa Babulon.”

⁴Kamano Johanan gi jotend lweny kod ji duto notamore winjo chik Ruoth Nyasaye mondo odong’ e piny Juda.

⁵ Omiyo Johanan kod jotend lweny nokawo ji duto mane odong’ Juda, mi gidhigo Misri kaachiel gi ju duto mane oseduogo mondo odag e piny Juda koa e pinje mane oyudo osekegie.

⁶Ne gin chwo gi mon gi nyithindo koda ka nyi ruoth. Ne okawo ng’ato ang’ata mane Nebuzaradan ma jatend lweny maduong’ oseweyo e lwet Gedalia mondo oriti. Jeremia gi Baruk bende ne gidhigo.

⁷Ne gitamore winjo chik Ruoth Nyasaye, mi giduto gidhi Tapanhes e piny Misri.

⁸Ruoth Nyasaye nowacho ni Jeremia ka en Tapanhes niya,

⁹“Kaw kite moko madongo mondo ikuny e nyim dhoranga dala ruoth, ka jo-Juda moko neno.

¹⁰Bang’e inyisgi ni Ruoth Nyasaye Manyalo Gik Moko Duto kendo ma Nyasach Israel owacho kama: ‘Abiro luongo Nebukadnezar ruodh Babulon ma jatichna, kendo obiro keto kom lochne ewi kite ma aseketo ka eri, mi ogur hembe e wigi.

¹¹Adier, enobi, mi olo piny Misri. Joma oket ni mondo tuoche oneg, tuoche biro nego, kendo joma oket ni itero e tuech, noter e tuech, bende joma oket ni tho e lweny, biro tho e lweny!

¹²Anami owang’ hekalu mag nyiseche jo-Misri, kendo nokaw nyisechegi mi oter e tuech. Obiro manyo piny Misri, mi oyaki, kendo dong’ nono, mana kaka jakwath dondo nyuogo e lepe, mi dong’ nono. Bang’e noa Misri kosetieko timo gik moko duto modwaro timo.

¹³Obiro turo sirni milamo man Heliopolis e piny Misri, kendo obiro wang’o hekalu mag nyiseche jo-Misri.’ ”