Read luo Jeremia 48 Bible Online

Jeremia 48 - luo bible

Jeremia 48

¹ Ruoth Nyasaye Manyalo Gik Moko Duto kendo ma Nyasach Israel nowuoyo kuom jo-Moab kama: “Ywaguru jo-Nebo, nimar dalagi okethi! Kiriathaim osekaw, mi omuk kama ochiel motegno manie dalano. Joma odak kuno wigi okuot,

²kendo duong’ mar piny Moab oselal. Wasigu ikore Heshbon mondo otiek oganda jo-Moab. Dala mar Dibon biro ling’ thi ka oganda mar lweny omonje.

³Jo-Horanaim goyo koko ka wacho niya, ‘Masira! Warumo!’

⁴Piny Moab osekethi! Winjuru nyithindo ka ywak.

⁵Winjuru ywak joma oruwo e yo nyaka chop Luhith. Ywak bende winjore e yo malor Horanaim.

⁶Un jo-Moab, ringuru piyo ures ngimau! Ringuru mana ka ayuer ma seso e bungu.

⁷Ne ugeno kuom tekou gi mwanduu, to koro ibiro mako koda ka un, kendo Kemosh nyasachu ibiro ter e tuech, kaachiel gi jodonge kod jodolo mage.

⁸Onge dala kata achiel ma notony mak okethi, kendo holo gi pap duto noyaki, mi kethi. An Ruoth Nyasaye ema awacho kamano.

⁹Chunguru kidi mar liel, upargo piny Moab, nimar ibiro kethe piyopiyo, kendo mier mage biro dong’ gundni ma onge ng’ama odakie.”

¹⁰(Okuong’ ng’at ma ok otiyo tich Ruoth Nyasaye gi chunye duto! Bende okuong’ ng’at ma ok oneko gi liganglane.)

¹¹Ruoth Nyasaye wacho niya, “Pile jo-Moab osebet kodak gi kue, kendo ok osedargi, kiterogi e tuech, gichalo gi divai mowe mondo okue e agulu achiel, ma ok olok e agulini mamoko. Ndhath divai mowe kamano ok kethre, to osiko asika ka omit.

¹²Kuom mano ndalo biro ma naorie ji mondo ool jo-Moab oko, kendo okethgi, ka ng’ama puko divai oko, kendo toyo aguch divaino matindo tindo.

¹³Bang’e jo-Moab noyud ni Kemosh nyasachgi ok nyal konyogi, mana kaka jo-Israel noyudo ni Bethel ma nyasachgi mane gigeno kuome ne ok nyal konyogi.

¹⁴“Un jo-Moab, ere gimomiyo uketoru ni un thuondi mosekedo e lwenje mager?

¹⁵To piny Moab gi mier mage osekethi, kendo thuondi mage osenegi! An Ruoth Nyasaye Manyalo Gik Moko Duto ema awacho kamano.

¹⁶Piny Moab chiegni rumo, kendo ibiro kethe mapiyopiyo.

¹⁷Un joma odak machiegni kode, kendo un ji duto mong’eyo humbe, ywageuru kuwacho niya, ‘Lochne maratego osekethi, kendo humbe gi duong’ne oserumo.’

¹⁸To un joma odak Dibon, weuru duong ma un-go, mondo ubed piny e buru, nikech jaketh Moab osebiro kuomu, kendo oketho kuondeu mochiel motegno.

¹⁹Un joma odak Aroer, chung’uru e dir yo kung’icho mondo upenj joma ringo gima osetimore.

²⁰Ginidwoku niya, “Piny Moab oserumo! Ywageuru, nikech oseyudo wichkuot. Gouru milome e bath aora Arnon ni Moab osekethi.

²¹“Oseng’ad bura ni mier mae pap kaka Holon gi Jaza gi Mefath

²²gi Dibona gi Nebo gi Beth-diblathaim

²³gi Kiriathaim gi Bethgamul gi Bethmeon

²⁴gi Kerioth kod Bozra. Ee, bura oseloyo miech Moab duto, man mabor koda man machiegni.

²⁵Duong’ mar Moab oseng’iny matinditindo, kendo tekone osekethi. An Ruoth Nyasaye ema awacho kamano.

²⁶“Miuru jo-Moab kong’o mondo omer, nikech gisedagi winjo chikna, an Ruoth Nyasaye. Gibiro ng’ielore e ng’okgi giwegi, kendo ji biro nyierogi.

²⁷Un jo-Moab, parieuru kaka ne unyiero jo-Israel! Ne ucharogi mana ka gima gin joma osemaki kaachiel gi jomecho.

²⁸Koro un jo-Moab, ayeuru e miechu udhi udag e gode maboyo, mondo uchal gi akuru mogero ode e bath lwanda marabora morokore.

²⁹Jo-Moab gin josunga! Asewinjo kaka gisungore kendo gipakore ka gijaro ji, kendo giparo ni gin kende ema giloyo ji moko duto.

³⁰An Ruoth Nyasaye ang’eyo kaka gisungore, to sungagino onge tiende, kendo gik moko duto ma gitimo biro rumo.

³¹Mano emomiyo abiro ywago jo-Moab duto kod jo-Kirheres.

³²Abiro ywago jo-Sibma moloyo kaka ne aywago jo-Jazer. A yaye, dala mar Sibma, ichalo gi yiend mzabibu ma bedene oyarore nyaka Nam Kado, mi ochweyo nyaka Jazer. To koro olembeni gi divai mari osekethi!

³³Mor gi ilo osegol e piny Moab momewni. Divai tinde ok mol kuonde bicho, kendo onge joma odong’ ma dikog gi mor ka loso divai.

³⁴“Jo-Heshbon gi jo-Eleale ywak, kendo ywakgi winjore nyaka Jahaz, jo-Zoar bende winje, kendo owinjore nyaka Horonaim gi Elgath-shelishya, nikech pige mag Nimrim oseduono.

³⁵Abiro tamo jo-Moab mondo kik tim ni nyisechegi misengni miwang’o pep kod misengni mamoko kuonde moting’ore. An Ruoth Nyasaye ema awacho.

³⁶“Kamano chunya ywago jo-Moab kod jo-Kirheres mana ka ng’ama goyo tung’ e liel, nikech mwandugi duto oselal.

³⁷Ng’ato ka ng’ato osepwodho wiye, kendo olielo tike. Giduto gisaro luetegi, kendo girwako piende gugru.

³⁸Ji ywak ewi udi duto kendo e wang’ yore mag Moab nimar aseketho piny Moab, mana ka ng’ama nego agulu ma onge tich. An Ruoth Nyasaye ema awacho.

³⁹Oseketh Moab. Yaye, ywaguru, nimar Moab oseyudo wichkuot. Osekethore chuth, molokore gima bwogo ji, kendo ogendini modak machiegni nyierogo.

⁴⁰“An Ruoth Nyasaye asesingora ni oganda moro biro podho kuom jo-Moab mana kaka achuth podho kuom gima otho, koyaro buombene.

⁴¹Miechgi gi kuondegi mochiel motegno ibiro kawo. Chieng’no jolweny mag Moab nobed gi kihondko mana ka dhako ma muoch kayo.

⁴²Jo-Moab ibiro tieko chuth, mi ok ginichak gibed oganda kendo, nikech ne gitamore winjo chikna.

⁴³Masiche gi bugni kod obadho ema ochomogi. An Ruoth Nyasaye ema awacho kamano.

⁴⁴Ng’ato ang’ata ma temo tony e masira biro nyumore e bugo, to ng’ama owuok e bugo, obadho biro mako, Mago duto biro timore ni jo-Moab chieng’ ma akumogie.

⁴⁵Joma ringo, ma ok nyal yudo konyruok, temo mondo opondi e dala mar Heshbon ma chon ruoth Sihon nodakie, to gibiro yudo ni dalano osemokie mach. Mach osewang’o tong’ piny kod wi gode mag jo-Moab mohero lwenygi.

⁴⁶Ywaguru jo-Moab! Joma ne lamo Kemosh koro osetieki, kendo yawuotgi gi nyigi osemak moter e tuech.

⁴⁷To e ndalo ma biro anami jo-Moab dhi nyime maber kendo.” Mano e bura ma Ruoth Nyasaye oseng’ado ni jo-Moab.