Read luo Jeremia 6 Bible Online

Jeremia 6 - luo bible

Jeremia 6

¹Un jo-Benjamin, ringuru mondo utony! Ringuru ua Jerusalem! Gouru tung’ e Tekoa, kendo mokuru mach ewi Beth-hakerem mondo onyis ji ni lweny biro, nimar chandruok kod masira madwong’ chiegni biro koa nyandwat.

²Un jo-Sayun uchalo gi lek maber mar jamni,

³to ruodhi biro buoro kanyo gi jogi mag lweny, mana kaka jokwath dibi gi rombgi mondo okwa. Gibiro guro hembegi ka gilworou, kendo ng’ato ka ng’ato nokaw gima odwaro.

⁴Giniwach niya, “Waikreuru mondo wamonj Jerusalem! Ikreuru! Wabiro monjogi godiechieng’ tir.” To eka ginilok parogi ka giwacho niya, “Ooyo, sa koro ng’eny, piny dwaro yuso, kendo tipo lor.

⁵To ikreuru, nimar wabiro monjogi kawuono gotieno, mi wamuk ut Jerusalem mabeyo kendo madongo.”

⁶Ruoth Nyasaye Manyalo Gik Moko Duto osegolo chik niya, “Tong’uru yien, kendo uging lowo pidhe pidhe e tiend ohinga, mondo umonj Jerusalem.” Osewacho bende niya, “Abiro kumo dalani nikech bura makare onge kanyo chuth.

⁷Kaka pi soko bubni pile, e kaka richo Jerusalem bende osiko ka bubni. Dalano opong’ gi lweny kod masiche, kendo tuoche gi adhonde ema aneno kanyo.

⁸Puonjreuru kuom mano, un jo-Jerusalem, nono to aweyou, mi aloko dalau thim, ma onge ng’ama dakie.”

⁹Ruoth Nyasaye Manyalo Gik Moko Duto nowachona niya, “Duog ires jo-Israel modong’ ka ng’ama dok e puoth mzabibu mondo opon olemo modong’.”

¹⁰Ne adwoke niya, “Ere ng’ama diwinja, ka awuoyo kodgi, kata ka akwerogi kamano? Gisedino itgi, omiyo ok ginyal winjo. Gisetamore winjo wachni, kendo gitugo mana gi gima iwacho.

¹¹Kuom mano, Ruoth Nyasaye, mirimbi opong’a, kendo koro ohewa.” Eka Ruoth Nyasaye nowacho ni Jeremia nira, “Ol mirimba kata mana kuom nyithindo matugo e yore, kendo kuom yawuowi mochokore kanyakla. Mon gi chwo ibiro kawo koda ka joma oti mojwajni.

¹²Utegi gi puothegi kod mondgi bende nomi jomoko nono, nimar abiro kumo jopinyni. An Ruoth Nyasaye ema awacho kamano.

¹³“Ji duto madongo gi matindo temo yudo pesa e yore mag miganga, kata mana jonabi gi jodolo bende migengni.

¹⁴ Gichalo jothieth mathiedho jotuo marachrach, mana ka gima ok gituo, nimar giwacho ni gik moko beyo, to chutho, gik moko ok beyo.

¹⁵ Bende uparo ni wigi nokuot nikech gik makuero mane gitimogo koso? Ooyo, wigi ne ok okuot kataa matin, to bende gionge gi wichkuot! Kuom mano, ginipodhi kaka jomoko osepodho, kendo ka akumogi to ginirum. An Ruoth Nyasaye ema awacho kamano.”

¹⁶Ruoth Nyasaye wacho ni joge niya, “Chung’uru e akek yo, mondo urang wang’yore machon, kupenjo kuma yo maber nitie. Wuothuru e wang’yorno, mi unuyud kue.” To gidwoko niya, “Ok wanawuothi e wang’yorno.”

¹⁷Ruoth Nyasaye noketo jorit mondo ka gigoyo tung’ to ji owinji. To ji nowacho niya, “Ok wanawinji.”

¹⁸Omiyo Ruoth Nyasaye nowacho niya, “Winjuru un ogendini mondo ung’e gima biro timore ni joga.

¹⁹Un jo-piny, winjuru! Akelo masira kuom jogi mana moromo gi timbegi, nikech gisedagi wechena, kendo ok giserito puonjna.

²⁰Ere tiende kelona ubani moa Sheba, kata gik mang’ue ng’ar moa e pinje maboyo? Ok anayie misengni miwang’o pep, kendo ok anabed mamor gi misengni mamoko ma gitimona.”

²¹Kuom mano, Ruoth Nyasaye owacho kama: “Anami jogi chwanyre, mi podhi. Wuone gi yawuowi biro tho, kaachiel gi osiepegi kod joma odak machiegni kodgi.”

²²An Ruoth Nyasaye awacho niya, “Oganda moro biro, moa e piny man yo nyandwat. Ee, oganda marang’ongo man kuma bor ikore ni lweny.

²³Gin gi aserni kod tonge, giger kendo ok gikech ng’ato; tiend faresegi mor ka apaka mar nam mawuo. Gikore kedo gi Sayun.”

²⁴To un jo-Jerusalem uwacho niya, “Wasewinjo wachno, mi thudhno omako luetewa. Kibaji goyowa mana ka dhako ma muoch kayo.

²⁵Ok wahedhre wuok oko, kata bayo e wang’yore, nikech wasikwa oikore ni lweny kuondego, kendo masiche ng’eny koni gi koni.”

²⁶To an Ruoth Nyasaye awachonu niya, “Un joga, rwakreuru gi piende gugru, kendo bukreuru gi buru. Ywaguru malit ka ng’ama ywago wuode ma miderma, nimar ng’at ma biro tiekou biro poyou.”

²⁷“In Jeremia, aseketi japim joga. Pimgi, eka mondo ifweny timbegi.

²⁸Giduto gin joma wigi tek, moseweya. Gibayo e piny ka gikuodho ji. Chunygi tek ka mula kendo ka chuma; giduto gin joma okethore.

²⁹Kata obedo ni obuk mach matek, mondo oleny fedha kendo opwodhi, to en mana ketho kinde kayiem, nikech ng’iend fedha tamore wuok.

³⁰Emomiyo ibiro luongo joga ni fedha mowe, nikech an Ruoth Nyasaye aseweyogi.”