Read luo Jeremia 7 Bible Online

Jeremia 7 - luo bible

Jeremia 7

¹Ruoth Nyasaye nowacho ni Jeremia

²mondo odhi ochung’ e dhoranga Hekalu mar Ruoth Nyasaye, ogo milome niya, “Winjuru wach Ruoth Nyasaye, un jo-Juda duto madonjo e dhorangani, ka biro lame.

³Ruoth Nyasaye Manyalo Gik Moko Duto kendo ma Nyasach Israel, owacho ni mondo ulok yoreu gi timbeu maricho, eka owe udak kaeri.

⁴To un usiko kuwacho niya, ‘Ma Hekalu mar Ruoth Nyasaye! Hekalu mar Ruoth Nyasaye! Hekalu mar Ruoth Nyasaye!’ Wach muwachono, en miriambo, omiyo kik ugen kuome.

⁵Lokuru yoreu gi timbeu, kendo ng’ato ka ng’ato mondo otim ni wadgi gima kare.

⁶Weuru sando jopinje mamoko modak kuomu, kata nyithi kiye, kata mond liete. Bende kik uchuer remb joma onge ketho kaeri, kendo kik ulam nyiseche mamoko, nimar mano ditieku chuth.

⁷Kulokoru kamano to anyalo weyo udag kaeri e piny mane amiyo kwereu chon mondo obed margi nyaka chieng’.

⁸Onge gima uyudo kuom keto chunyu e wach miriambo muwachono.

⁹Ukwelo, unego ji, uteroru, ukuong’oru gi miriambo, utimo lisweche ni Baal, kendo ulamo nyiseche manono ma yande ok ung’eyo.

¹⁰To kusetimo gik ma kamago to eka ubiro e nyima e Hekalu ma nyinga nitieni, kendo uwacho niya, ‘Wasekwo.’ To uparo ni unyalo kwo adier, ka utimo timbe makuero kamano?

¹¹ Koso uparo ni Hekalu mara en kama jomecho pondoe? An Ruoth Nyasaye aseneno gik ma utimo!

¹² “Dhiuru Shilo, dala mane ayiero mokwongo mondo nyinga obedie, mondo uneye gima ne atimo kuno, nikech richo mag joga Israel.

¹³To koro usetimo richogo duto! Kata obedo ni ne akawo chandruok, mi aloso kodu, to ne ok udewa, bende kane aluongou, to ne ok uyiena.

¹⁴Omiyo abiro timo ni Hekalu mara mugeno kuome mana kaka natimo ni Shilo. Kata mana dalau mane amiyo kwereuni, bende abiro timone kamano.

¹⁵Abiro riembou mondo ua e wang’a mana kaka ne ariembo oweteu ma jo-Efarim duto te.

¹⁶“In Jeremia, kik ulem ni jogi, bende kik ikwaya wach moro nikech gin, kata kik ihomba, nimar ok nawinji!

¹⁷Donge ineno gik ma gitimo e miech Juda kendo e yore mag Jerusalem?

¹⁸ Nyithindo modo yien, eka wuonegi moko mach, to mon dwalo mogo mondo olosgo kek obed misango ni nyasaye ma dhako ma iluongo ni Ruodh Polo. Bende gitimo ni nyiseche mamoko misengni miolo piny, mondo gichwanyago.

¹⁹To iparo ni an Ruoth nyasaye ema gichwanya? Ooyo, gin ema gichwanyore giwegi, kendo gikelo wichkuot kuomgi kendgi.

²⁰Emomiyo an Ruoth Nyasaye, abiro olo mirimba mager ka eri. Abiro ologi kuom ji kendo kuom jamni, to bende abiro ole kuom yien gi cham. Mirimba biro chalo gi mach mager, ma ng’ato ok nyal nego.”

²¹Ruoth Nyasaye Manyalo Gik Moko Duto ma Nyasach Israel owacho niya, “Chamuru achama misengni monego wang’ pep, kaachiel gi misengni moyienu chamo.

²²Kane agolo kwereu e piny Misri, ne ok awacho gimoro kuom misengni miwang’o pep kod misengni mamoko, kata golo chik kuomgi ne ok agolo.

²³To ne achikogi matek mondo giluora, eka abed Nyasachgi, kendo gibed joga. Bende nanyisogi ni nyaka gitim gik mane achikogi, eka mondo gidhi maber.

²⁴To ne ok gidewa, bende ne ok giwinjo wachna. Ne gisiko ka gitimo timbe mag wichkuot, kendo kar dhi nyime, to ne gidok chien.

²⁵Chakre chieng’ mane kwereu owuokie Misri nyaka chil kawuono, asekawo chandruok, mi aoronigi jotichna ma jonabi.

²⁶To kata kamano ne ok gidewa, bende ne ok giwinja, to wigi nomedo doko matek moloyo kata mana wi kweregi.

²⁷To in Jeremia, kata obedo ni inyisogi weche duto kamano, to ok giniwinj wachni, kendo kata obedo ni iluongogi, to ok giniyieni.

²⁸Eka bang’e ininyisgi niya, ‘Ogandani odagi winjo wach Ruoth Nyasaye ma Nyasachgi, kendo ok giyie mondo opuonjgi. Ok ginyal wacho adiera, nikech adiera oselalnigi.’

²⁹“Yaye, jo-Jerusalem, ma yie wiu maboyo en ranyisi ni un joma owalna, dhiuru uliego oko, kendo udhi uywagi ewi gode, nimar an Ruoth Nyasaye asedagi joma akechogogi kendo aseweyogi.

³⁰“Jo-Juda osetimo gima rach e nyima. Giseketo nyisechegi makuero e Hekalu mara, mi gidwanyo. An Ruoth Nyasaye ema awacho kamano.

³¹ Gisegero kendo-mar-misango miluongo ni Tofeth e holo Benhinom mondo giwang’ie yawuotgi gi nyigi ka misango. To ne ok achikogi mondo gitim kamano, bende wach ma kamano ne ok aparo kata matin!

³²Mano omiyo ndalo biro chopo ma ok noluongie kanyo ni Tofeth kata ni holo Benhirom, to noluonge ni holo Nek, nikech giniyik joma otho e Tofeth, mi pong’ du ma onge kama odong’.

³³Winy gi le mae thim ema nocham ringre joma otho, kendo ng’ato ok nobedie ma diriembgi.

³⁴ Anatiek mor gi ilo duto e miech Juda, kendo e wang’ yore man Jerusalem, ma kata mana dwond miaha gi chwore ok nowinji, nikech noyud ka piny oselokore thim.