Read luo Jeremia 8 Bible Online

Jeremia 8 - luo bible

Jeremia 8

¹“E ndalono ji nogol choke ruodhi gi choke jodongo mag Juda e lietegi, kaachiel gi choke jodolo gi mag jonabi kod mag ji mamoko duto mane odak Jerusalem.

²Chokego nowit oko mondo chieng’ gi due kod sulue, mane gihero kendo gilamo, orieny kuomgi. Kar chokogi mondo oyikgi, to nowegi aweya gitow ewi lowo.

³Ji duto motony e oganda marachni, mi odak kuonde duto ma asekeyogie, nogomb mana tho kar bedo mangima. An Ruoth Nyasaye Manyalo Gik moko Duto ema awacho kamano.”

⁴In Jeremia, wach ni joga ni an Ruoth Nyasaye awacho kama: “Ka ng’ato opodho, to donge ochako ochung’? Koso ka ng’ato obaro moweyo yo, to donge oduogo e yo kendo?

⁵Ka kamano, to ere gima omiyo gibaro giweya ma ok ginyal duogo ira ngang’? Gituere kuom nyisechegi manono, kendo gidagi duogo ira.

⁶Ne achiko ita mondo awinj wechegi, to ne ok giwacho adiera kata achiel. Onge kata ng’at achiel kuomgi moseloko chunye kuom timbegi maricho, kata moseywagore kuom richo mosetimo. Ng’ato ka ng’ato mwomore e timbene, mana ka faras lweny mochodo kochiko wasigu.

⁷To kata ogungo mae kor polo ong’eyo ndalogi mag dar, kendo kata akuru gi opija gi nyamnaha bende ong’eyo ndalo ma giduogoe, joga to kia chikena.

⁸“Ere kaka ginyalo wacho ni giriek kendo ging’eyo chikena, to jopuonj chik mag miriambo osegajo chikena?

⁹Jorieko wigi okuot. Wach ogoyogi nyang’eng’o kendo dhogi omoko. Gisedagi wechena, koro ere rieko ma gin-go?

¹⁰Kuom mano mondgi kaachiel gi puothegi abiro miyo jomoko nono. Ji duto, madongo gi matindo, temo yudo pesa e yore mag miriambo, kata mana jonabi gi jodolo duto bende jomriambo,

¹¹ nimar giwacho ni gik moko dhi nyime maber to chutho gik moko ok dhi nyime maber. Kuom mano gichalo gi jothieth mathiedho jotuo marachrach, mana ka gima ok gituo.

¹² Bende uparo ni wigi okuot nikech timbe makuero mane gitimogo koso? Ooyo, wigi ok okuot kata matin, bende gionge gi wichkuot. Kuom mano, gibiro podho kaka ji mamoko osepodho, kendo ka akumogi to ginirum. An Ruoth Nyasaye ema awacho kamano.

¹³“Abiro tieko joga chutho, nikech gichalo yiend mzabibu kata ng’owo maonge olemo, ma kata potgi bende osener.”

¹⁴Jo-Nyasaye penjore niya, “Ere gimomiyo wabet abeta? Biuru wadhi e mier mochiel motegno wathoe, nimar Ruoth Nyasaye oseng’adonwa buch tho. Osemiyowa pi motimo kwiri mondo wamodhi, nikech timbewa osebedo maricho e nyime.

¹⁵Ne wageno kue, to mana kayiem nono. Bende ne wageno ni wabiro yudo resruok, to masira ema obwogowa.

¹⁶Ne wawinjo ka farese mag wasigu futo ka Dan, kendo ywakgi ne miyo piny duto yiengni. Wasigugo osebiro mondo oketh pinywa, kod gik moko duto mantie, kaachiel gi dalawani kod joma odakie.”

¹⁷Ruoth Nyasaye owacho niya, “Ng’euru ni abiro kelo thuonde mager kuomu. Gin thuonde man gi kwiri maricho, ma ok nyal bo, omiyo gibiro kayou.”

¹⁸“Akuyo ma ok anyal yudo kue, kendo chunya tuo.

¹⁹Ling’uru ane, awinjo ka joga ywak kuonde duto ma gintie, ka gipenjo niya, ‘Ruoth Nyasaye oseweyo Sayun koso? Ruodh Sayun onge kuno adier?’ To Ruoth Nyasaye ma ruodhgi dwoko niya, ‘Ere gima omiyo usemiya mirima kuom lamo nyiseche mag pinje mamoko?’ ”

²⁰Ji ywak kawacho niya, “Ndalo keyo osekadho mak wayudo gima dwaresrego.”

²¹Chunya lit, nikech itimo ni joga malit. Aywak kendo akuyo marach.

²²Yath tinde orumo e piny Gilead koso? Jathieth onge kuno adier? Ere gima omiyo pok othiedh joga?