Read luo Ywagruok 3 Bible Online

Ywagruok 3 - luo bible

Ywagruok 3

¹An ema aseneno masira mane Ruoth Nyasaye okelona kokecho.

²An e jal mane oriembo, mi ochuno mondo owuothi e mudho mandiwa.

³An ema osanda kinde duto odiechieng’ ngima.

⁴Osemiyo denda dhi adhiya; chokena bende oseturo

⁵Oselwora gi gik mamiya chuny lit kod olo.

⁶Osemiyo adak kuonde motimo mudho, mana ka ng’at mane otho chon.

⁷Osechiela gi ohinga koni gi koni ma ok anyal tony, kendo osetueya gi nyororo mapek.

⁸Bende kata ka aywak, kendo aluonge mondo okonya, to ok odwar winjo kwayona.

⁹Osegeng’o yore mane aluwo gi kite mopa, omiyo awuotho e yore mogondore.

¹⁰Obutona mana ka ondiek kata ka sibuor mobuto kama opondo.

¹¹Osegeng’o yora mi abaro tenge, kendo okidha matindo tindo, mojwang’a kucha.

¹²Oseywayo atung’e, mi ochiela gi aseche.

¹³Osehobo kora gi asere ma owuodho e olalo.

¹⁴Asedoko ng’at ma ji duto nyiero. Gigeta gi wer pile odiechieng’ duto.

¹⁵Osemiyo lit gi olo opong’o chunya.

¹⁶Osemiyo laka otur ka amuodo ge, kendo osemiyo achamo buru.

¹⁷Koro chunya onge gi kue, mi wiya osewil gi mor ma yande an go.

¹⁸Kuom mano, aywak ni tekra orumo, kendo geno mane agenogo kuom Ruoth Nyasaye bende orumo.

¹⁹Ka aparo thagruok kod kuyo ma an-go, to litna malich.

²⁰Aparogi pile, kendo chunya onyosore.

²¹To gima bende aparo, momiyo an gi geno en ni

²²hera mosiko mar Ruoth Nyasaye ochwere, kendo ng’wonone ok rum.

²³Ginyien pile, okinyi kokinyi. Chutho, adiera mare duong’.

²⁴Awacho niya, “Ruoth Nyasaye kende ema an-go, omiyo ageno kuome.”

²⁵Ruoth Nyasaye timo maber ni joma ogene kendo ma dware.

²⁶En gima ber bedo gi kue, kirito Ruoth Nyasaye mondo oresi.

²⁷Bende ber mondo ng’ato oting’ jok ka pod en wuowi,

²⁸kendo ka Nyasaye otueyo jokno kuome, to ber mondo obed kar kende koling’.

²⁹Onego obolre chuth, nikech kamoro dipo ka oresore.

³⁰Bende onego ochiw lembe ni ng’at ma dwaro thale, kendo oyie bedo ng’ama ji yanyo,

³¹nikech Ruoth Nyasaye ok nowit ng’ato nyaka chieng’.

³²Kata obedo ni okumo ji malit, to ong’wononigi bende gi herane mogundho mosiko,

³³nimar ok ohero sando dhano kata kumo.

³⁴Ruoth Nyasaye ok yie mondo osand ng’ato ang’ata motue

³⁵kata tamo ng’ato yudo adiera monego oyudi e nyim Ng’ama Duong’ Moloyo,

³⁶kata ketho buch ng’ato kiyalo.

³⁷En ng’a ma dichik gimoro mi timre, ka ok Ruoth Nyasaye ema ochano ni mondo gino otimre?

³⁸Donge ber gi rach wuok mana kuoma Ng’ama Duong’ Moloyo?

³⁹Ka kamano, to ere gima omiyo dhano adhana mathoni ng’ur, kikume nikech richone?

⁴⁰Ber wanon timbewa, kendo wapar ane kaka gibet, eka wadog ir Ruoth Nyasaye.

⁴¹Kwasudo ir Ruoth Nyasaye, to ber wasud ire gi chunywa, to ok kwating’o mana bedewa malo kende.

⁴²A Ruoth Nyasaye, wan e joma osetimo richo mi opiem kodi, to pok ing’wononwa kuom richowa.

⁴³Iselawowa ka in gi mirima mager, mi inegowa mak ikechowa.

⁴⁴Iseumori gi boche polo, mondo lemowa kik tund iri,

⁴⁵bende isemiyo ogendini kwanowa ka yugi miwito.

⁴⁶Wasikwa duto yanyowa marach kendo jarowa.

⁴⁷Luoro kod obadho oritowa kendo kethruok gi masira ochomowa.

⁴⁸Pi wang’a mol ka aora nikech joga inego.

⁴⁹Adier, pi wang’a biro chwer mak chogi

⁵⁰nyaka chop Ruoth Nyasaye rang piny gie polo, mi ne chandruokna.

⁵¹Ka aneno gima otimore ni nyi dalawa duto, to chunya chandore malit.

⁵²Joma ne mon koda kayiem nono, oseriemba malit, mana ka winy miriembo.

⁵³Ne giluta e bur ka angima, mi gibolo kite kuoma.

⁵⁴Pi ne oima, mi awacho ni, ‘Atho.’

⁵⁵To ne aluongo nyingi, yaye Ruoth Nyasaye, kane anie bur matutno.

⁵⁶Kane aywakni ni mondo kik itamri konya, to ne iwinjoo dwonda.

⁵⁷Ne isudo machiegni kane aluongi kamano, mi iwachona ni kik abed maluor.

⁵⁸A Ruoth Nyasaye, isechwaka, mi ireso ngimana.

⁵⁹Iseneno gima rach motimna, mi ing’ado bucha kare.

⁶⁰Ne ineno kaka ji chulona kuor, kendo niwinjo weche duto mane gihondho kuoma.

⁶¹A Ruoth Nyasaye isewinjo ayany ma giyanyago, kaachiel gi gik maricho mane gichano timona.

⁶²Isewinjo bende kaka wasika kuodha ling’ling’ pile, odiechieng’ duto.

⁶³Neye kaka gigeta malit gi wer kinde duto!

⁶⁴A Ruoth Nyasaye, timnigi gima oromo gi timbegi.

⁶⁵Migi bedo gi chuny matek, mondo eka ikuong’gi.

⁶⁶Lawgi kikecho kendo itiekgi chuth, mondo kik gidag e piny misechueyoni, yaye Ruoth Nyasaye.