Read luo Ywagruok 4 Bible Online

Ywagruok 4 - luo bible

Ywagruok 4

¹Mano kaka dhahabu ochido, kata mana dhahabu maberie moloyo! Kite mag Hekalu okere e akek yore duto.

²Neye kaka yawuot Sayun ma yande beyo ka dhahabu maler, tinde ipimo mana gi aguch lowo, ma dhano ema ochueyo.

³Kata mana ondieg otoyo bende dhodho nyithindgi, joga to osedoko makwiny mana ka udo ma e thim.

⁴Nyathi madhoth riyo oloyo, mi lewe omoko e dande. Nyithindo matindo kwayo chiemo, to onge ng’ama migi kata mana ng’injo.

⁵Joma yande chamo chiemo mabeyo koro ojwang’ e wang’ yore. Jogo mane odak e ngima maber, koro kwanyo chiemo mana e pidh yugi.

⁶ Kum ma joga oyudo lich moloyo kum mane okum go Sodom, nikech Sodom nolok gunda mana piyopiyo nono, ma onge ng’ama oywago.

⁷Jodong joga yande nigi ngima maber. Dendgi yande pichni kendo leny ka mo,

⁸to tinde wang’gi olil ti, mi ka ng’ato oromo kodgi to ok nyal ng’eyogi. Chokegi ogulo, kendo dendgi ojwer mana ka luth.

⁹Ji mane otho e lweny ne johawi, moloyo joma ne kech oywayo monego, kaonge gima cham.

¹⁰ Mon mang’won notedo nyithindgi giwegi. Adier, nyithindgi nolokore chiembgi e ndalo mane masira omakoe joga.

¹¹Ruoth Nyasaye ne oolo mirimbe mang’eny ka iye owang’, mi omoko mach kuom Sayun mowang’o mise mage duto.

¹²Onge ruoth moro kata mana ng’at achiel modak e piny mane oyie ni jasigu didonj e dhorangeye Jerusalem.

¹³Mago notimore nikech richo mag jonabi mage, kendo nikech timbe mamono mag jodolone, mane ochuero remb joma kare.

¹⁴Ne gibayo ka muofni e wang’ yore ka gichadhore gi remo, ma ji ok nyal mulo lepgi.

¹⁵Ji ne goyonigi koko niya, “Dhiuru kucha! Dhiuru kucha, un joma ogak. Dhiuru kucha, kik ubi machiegni.” Kuom mano ne giringo piyopiyo mi gidhi, kendo gibayo e kind ogendini ka ok ginyal nwang’o kuonde dak.

¹⁶Ruoth Nyasaye owuon ema nokeyogi, mi ok ochako oparogi kendo. Bende ne ok ong’wono ni jodolo, kata kecho jodongo ne ok okecho.

¹⁷Wengewa ojony ka warango gima dikonywa, to kara mana kayiem. Oganda mane warito kwageno ni biro konyowa, to kara ne ok nyal gimoro.

¹⁸Wasikwa manyo kuonde ma waluwo, omiyo ok wanyal wuotho e wang’ yore. Ndalowa orumo. Adier, chieng’ thowa osechopo.

¹⁹Joma lawowa nenore ni ringo matek moloyo ongo ma huyo e kor polo. Gilawo gerwa matek e kor gode, kendo gibutonwa e thim.

²⁰Ruoth mane Nyasaye oyiero, kendo ma wakwano ka ngimawa, ne gimako e bur mane gikunyo. To en e jal mane waparo ni dwadag e bwo tipone e kind ogendini.

²¹Un jo-Edom, modak e piny Uz, ero umor kendo uil, to ng’euru ni kikombe mwamadhoni, ema un bende ubiro madho! Enomeru mi unyis dugu.

²²Kum mane okumgo jo-Sayun kuom timbegi mamono koro orumo. Ok nochak oriembgi kendo, mondoo gibed wasumbni e piny wasikgi. To un jo-Edom ema Ruoth Nyasaye nokumu, kendo enoel kethou e lela.