Read luo Baruk 1 Bible Online

Baruk 1 - luo bible

Baruk 1

¹Ma e kitabu mane Baruk wuod Neraya, wuod Maseya, wuod Zedekia, wuod Hasadia, ma wuod Hilkia ondiko Babulon,

²chieng’ due abiriyo, e higa mar abich bang’ kinde mane jo-Babulon omakoe Jerusalem mi owang’o.

³Baruk nosomo kitabuni matek ni Jekonia, wuod Jehoyakim, ruodh Juda, gi ji duto mane obiro mondo owinj weche mondikie.

⁴Ne gin joma nigi dongo, gi yawuot ruoth, gi jodongo mamoko, kod ji duto matindo gi madongo te, mane odak Babulon but aora Sud.

⁵Kane gisewinjo wechegi, ne gilemo e nyim Ruoth Nyasaye ka giywak kendo ka gitueyo chiemo.

⁶Bang’e ne gichoko pesa, ka ng’ato ka ng’ato golo kar nyalone,

⁷mi gitero pesago Jerusalem mondo gikonygo jadolo maduong’ ma nyinge Jehoyakim wuod Hilkia ma wuod Shalum, gi jodolo mamoko, kaachiel gi ji duto mane ni Jerusalem.

⁸Baruk noyudo gik lemo mag Od Ruoth Nyasaye mane oyaki, mi odwokogi e piny Juda chieng’ due apar, due mar Sivan. Ne gin gik fedha mane Zedekia wuod Josia ruodh Juda oloso,

⁹kane Nebukadnezar ruodh Babulon ogolo Jekonia Jerusalem, motero Babulon kaachiel gi jodongo gi jotheth gi joma nigi dongo kod ji mamoko duto.

¹⁰Joma nochoko pesago nondiko barua niya: Waoronu pesagi mondo uchulgo lisweche miwang’o pep, gi lisweche mag golo richo, kod mag ubani. Losuru lisweche mag mogo mondo otim e kendo-mar-misango mar Ruoth Nyasaye ma Nyasachwa,

¹¹kendo kwauru Ruoth Nyasaye mondo Nebukadnezar ruodh Babulon gi wuode Belshazar odag aming’a, kendo mondo ndalo ma gin-go e pinyka obed mang’eny ma ok kwan.

¹²Bende kwauru Ruoth Nyasaye mondo omiwa teko gi rieko makare mondo Nebukadnezar ruodh Babulon gi wuode Belshazar orit ngimawa maber, kendo mondo gibed mamor kodwa, kwatiyonigi kuom higni mang’eny.

¹³Wan bende kwanwauru Ruoth Nyasaye ma Nyasachwa, nikech wasekethone, kendo ok oseweyonwa mak osandowa gi sand maduong’ nyaka chil kawuono.

¹⁴To mogik, nyaka usom kitabu mwaoronuni ratiro ka uhulo richou e Od Ruoth Nyasaye chieng’ sawo, kendo e ndalo ma utimoe chokruok maduong’.

¹⁵Nyaka uwach kama: Ruoth Nyasaye ma Nyasachwa ni kare, to wan wawinjore gi wichkuot ma wan-go ndalogi, nikech chakre kwerewa, wan jo Juda, gi jo-Jerusalem,

¹⁶kaachiel gi ruodhi mawa, gi jodongwa, kod jodolowa,

¹⁷wasebedo kwaketho e nyim Ruoth Nyasaye,

¹⁸ka watamore winjo wachne, kendo ok wachik itwa ni Ruoth Nyasachwa ka nyisowa ni mondo waluw chike mane Ruoth Nyasaye oseikonwa.

¹⁹Chakre chieng’ mane Ruoth Nyasaye ogolo kwerewa e piny Misri nyaka koroni, ok wasewinjo Ruoth Nyasachwa, to wasejwang’e ka watamore chiko itwa ni wachne.

²⁰Kuom mano, masiche gi kuong’ osemakowa, kendo osiko komakowa pile, mana kaka Nyasaye nomiyo Musa jatichne okoro, chieng’ mane ogolo kwerewa e piny Misri mondo omiwa piny maleny man gi chak kod mor kich.

²¹Kata obedo ni Ruoth Nyasachwa nooronwa jonabi mage gi weche mang’eny, to ne ok wawinjo dwonde,

²²to waduto waseluwo gombo maricho mag chunywa, ka watiyo ni nyiseche moko manono, kendo ka watimo richo e nyim Ruoth Nyasachwa.