Read luo Baruk 3 Bible Online

Baruk 3 - luo bible

Baruk 3

¹A Ruoth Nyasaye Manyalo Gik Moko Duto, kendo ma Ruodh Israel, waywakni ka chunywa chandore kendo ka luoro omakowa.

²A Ruoth Nyasaye, winjwa kendo ikechwa, nikech wasekethoni.

³In ibet e komi mar duong’ mosiko, to wan walal pile.

⁴A Ruoth Nyasaye Manyalo Gik Moko Duto, kendo ma ruodh Israel, winj ywakwa, wan jo-Israel motho, kendo ma yawuot joma ne okethoni, kodagi winjo dwondi, in Ruoth Nyasaye ma Nyasachgi. Mano emomiyo masichegi osemakowa.

⁵Kik ipar richo kwerewa, to moloyo par tekoni maduong’ kod nyingi maler.

⁶A Ruoth Nyasaye, in e Ruoth Nyasaye ma Nyasachwa adier. Wagombo miyi duong’,

⁷nikech imiyo chunywa oluori, kijiwowa mondo waluong nyingi. Wagombo miyi duong’ e piny mwadakie kosedarwani, nimar waseweyo richo duto mag kwerewa mane okethoni.

⁸Eri, pod wasiko e piny mane iterowa mikeyowae ka gik mijokgo, kendo mokuong’, kendo misando, nikech richo duto mane kwerewa otimo ka giweyi, in Ruoth Nyasaye ma Nyasachwa.

⁹Un jo-Israel, winjuru chike makelo ngima. Chikuru itu, mondo upuonjru rieko.

¹⁰Un jo-Israel, ang’o momiyo udak e piny wasiku, kendo ubedo moti e piny ma ok maru? Uchalo joma nigi chola nikech udak gi jomotho,

¹¹kendo ikwanou ka joma osedhi e piny jomotho!

¹²Gigo obet kamano nikech useweyo soko mar rieko.

¹³Ka dine uwuothi e yor Nyasaye, to dine ubedo gi kue mosiko.

¹⁴Omiyo, puonjreuru mondo ung’e kama rieko gi teko kod winjo wach, yudoree, eka unung’e kama unyalo yudoe higni mang’eny gi ngima, gi ler ma menyonu yo, kod kue.

¹⁵To ere ng’ama osenwang’o kama rieko odakie, kata ma osedonjo kama rieko okanoe mwandune?

¹⁶Eke joma yande ruodhi mag ogendini? Koso ere joma yande jodwar mager,

¹⁷kendo ma yande chiko winy ma huyo e kor polo? Eke joma yande choko mwandu ma ok kwan mag fedha kod dhahabu, ma gin gik ma ji ogeno kuomgi.

¹⁸Koso eke joma yande thedho fedha gi rieko mong’ith, kendo mane tijegi ji wuoro?

¹⁹Giselal giduto ka gidhi e piny jomotho, kendo jomoko osekawo karegi.

²⁰Tieng’ manyien osenywol modak e piny, to ne ok gipuonjore rieko, nikech ne ok gifwenyo yorene.

²¹Nyithindgi bende ne ok omake, to ne gibarone mabor.

²²Ne ok onwang’ rieko e piny Kanaan, kendo ne ok onene e piny Teman.

²³Jo-Hagar mane dwaro rieko mar pinyni gi joohala mag Midian gi Tema, gi jochuog sigendini kod joma ohero puonjruok, ok oseyudo yo materogi e rieko. Adier, ne ok gifwenyo yo ma rieko luwo.

²⁴Un jo-Israel, mano kaka kar dak mar Nyasaye duong’ ahinya! Mano kaka lochne olandore malach!

²⁵Lachne gi borne modhi malo ok nyal pim!

²⁶Chon, joma rabede marahuma ne odak e piny. Ne gin joma boyo ahinya, kendo ne gilony kuom kedo lweny,

²⁷to Nyasaye ne ok oyierogi mondo gibed joge, kendo ne ok ofwenyonigi yor rieko.

²⁸Kuom mano, ne gilal nikech fupgi, nimar ne gionge gi rieko.

²⁹Ere ng’ama oseidho modhi e polo mondo omak rieko, kogole e rumbi, kendo obiro kode piny?

³⁰Koso ere ng’ama oseng’ado nam moyude, kendo ong’iewe gi dhahabu maber moloyo, moduogo kode?

³¹Ooyo! Onge ng’ama ong’eyo yo madhi ire, kendo onge ng’ama nyalo fwenyo yo moluwo.

³²To Nyasaye, mong’eyo gik moko duto, ema osemake gi riekone owuon. En ema oseguro piny motegno nyaka chieng’, koketoe le mathoth man gi tiende ang’wen.

³³Ka ooro ler, to ler dhi kuma ooree, kendo koluonge mondo oduogi, to owinje kokirni.

³⁴Sulue rieny e sa ma Nyasaye oketonigi, ka gimor,

³⁵kendo koluongogi to gidwoke ni “Wantie”, nikech gihero rieny ni Jachuechgi.

³⁶En e Nyasachgi, kendo onge moro marom kode.

³⁷Ong’eyo yore rieko duto, kendo nopuonjogi jo-Israel ma nyikwa Jakobo, ma gin jotichne mohero moloyo. Kamano e kaka nomiyo rieko othinyore e piny, modak kod ji.