Read luo Baruk 4 Bible Online

Baruk 4 - luo bible

Baruk 4

¹Rieko en kitabu, mondikie chike Nyasaye, mosiko nyaka chieng’. Adier, en chik Nyasaye, mosiko nyaka chieng’. Joma omake siko ka ngima, to joma ojwang’e tho.

²Un joka Jakobo, duoguru ire mondo umake, kendo uwuoth e lerne,

³mondo kik uwe jopinje mamoko kaw duong’ ma un-go.

⁴Wan jo-Israel, wan johawi, nimar Nyasaye osehulonwa gik malong’one.

⁵Un joga, jiwuru chunyu, nikech un ema umiyo nying Israel osiko.

⁶Ogendini mamoko nong’iewou, to Nyasaye ne ok oyienigi mondo otieku, urum. Nukwinyo Nyasaye, emomiyo nochiwou e lwet wasiku.

⁷Adier, kane utimo lisweche ni jochiende ma ok Nyasaye, to nukwinyo Jachwechu.

⁸Wiu ne owil gi Nyasaye mochwere mane opidhou, kendo numiyo Jerusalem mane opirou mirima.

⁹Kane Jerusalem oneno ka Nyasaye sandou, nowacho niya, “Winjuru, Un joma odak e alwora mar Sayun. Nyasaye osekelona mirima mager.

¹⁰Naneno kodar yawuota gi nyiga, ka kum ma Nyasaye mochwere okumogigo.

¹¹Napidhogi kamor, to kane aneno kidarogi, naywak kendo nakuyo.

¹²Kik ugona siboi nikech wach ma asewachono, nimar an chi liel ma joge mang’eny osenegi! Athagora ka adong’ kenda, nikech richo mag nyithinda mane oweyo Chik Nyasaye.

¹³Ne ok gihero ng’eyo wechene, kata luwo yorene, kata mako chikene, kata yie mondo opuonjgi adierane.

¹⁴Un joma odak e aluora mar Sayun, suduru machiegni, mondo aparnu kaka nodar yawuota gi nyiga, mane en bura mane Nyasaye mochwere ong’adonigi.

¹⁵Nomiyo oganda moro modak mabor omonjogi. Ne en oganda makoch kendo mawuoyo gi dhok ma ok ging’eyo. Ne ok gimiyo jomoti luor, kendo ne ok ging’wono ni nyithindo.

¹⁶Ne gimaya joga, kendo ne giweya kar kenda mana ka chi liel moma yawuote gi nyige mohero.

¹⁷Koro ere kaka an dakonyu?

¹⁸Ng’ama ne okelo masichegi kende ema nyalo resou e lwet wasiku!

¹⁹Dhiuru nyithinda, dhiuru! An to nyaka adong’ kenda!

²⁰Aselonyo lewni mag kue, mi arwako lep kuecho, kendo anaywagi ni Nyasaye mochwere ndalo duto mag ngimana.

²¹Nyithinda, jiwuru chunyu, uywag ni Nyasaye. En ema enoresu e lwet wasiku machikou gi thwon.

²²Ageno ni Nyasaye mochwere biro resou, kendo amor kaparo resruok mabiro bironu piyopiyo koa kuom Nyasaye Maler ma Jawaru kendo ma Nyasaye mochwere.

²³Kane aneno kudhi, naywak kendo nakuyo, to anabed gi mor ka Nyasaye oduokonau.

²⁴Kaka joma odak e alwora mar Sayun osenenoo kaka idarou, e kaka piyopiyo nono ginine kaka Nyasaye mochwere resou, kobiro gi duong malich.

²⁵Nyithinda, beduru modhil gi sand ma Nyasaye kelonu. Wasigu osesandou, to piyopiyo nono unune ka ologi, kendo unugang tiendeu e tokgi.

²⁶Nyithinda ma ahero oseluwo yore maricho, kisembogi ka jamni ma wasigu opeyo.

²⁷Nyithinda, jiwuru chunyu, uywag ni Nyasaye. En ema nokelonu masiche, to obiro parou.

²⁸Chon nuweyo yiero Nyasaye, to koro lokuru chunyu mondo udware, kutimo kinda nyadipar moloyo.

²⁹Nyasaye mane okelonu masichegi, ema noresu, kendo nomiu mor mosiko.”

³⁰In Jerusalem, jiw chunyi, nikech ng’ama ne oluongi gi nyingi mondo ibed mare, ema noresi.

³¹Ji duto mane otimoni marach, kendo mane ogoyoni siboi kipodho, noyud chandruok.

³²Adier, chandruok nomak mier ma nyithindi nobedoe wasumbini, kendo dala mane okawo yawuoti, noyud thagruok.

³³Dala mane obedo mamor kipodho, kagoyoni siboi kuom chandruokni, noywag ka en owuon opodho.

³⁴Anariemb joge mang’eny ma osungorego, kendo nyadhi ma en-go nolokre kuyo,

³⁵nikech Nyasaye mochwere nool kuome mach ma nowang’e nyaka chieng’, kendo jochiende noda kuome mosiko.

³⁶In Jerusalem, lok wang’i yo wuokchieng’, mondo ine mor mabironi koa kuom Nyasaye.

³⁷Neye kaka yawuoti mane ineno kaa, koro duogo! Ruoth Nyasaye osegolo chik, omiyo giduogo miechgi ka gia yo wuokchieng’ gi yo podho chieng’, ka gimor ahinya nikech duong’ mar Nyasaye.